काठमाडौं- नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले मिलेनियम च्यालेञ्ज कर्पोरेशन (एमसिसी) परिमार्जनबिना पारित गर्न नसकिने बताएका छन्।
‘प्रेस संगठन, नेपाल’ को सिन्धुपाल्चोक जिल्ला संगठनले सुकुटेमा आयोजना गरेको साक्षात्कार कार्यक्रममा बोल्दै प्रचण्डले ५५ अर्ब उत्पात्तै ठूलो भनेर ठान्नु पनि जरुरी नभएको बताए।
'संशोधन नै गर्न नमान्ने हो भने नेपालले ५५ अर्बको निम्ति आफ्नो राष्ट्रिय हितलाई गलत ढंगले कम्प्रमाइज गर्दैन। यो कुरा पनि प्रष्टै हो', उनले भने, 'हाम्रो लागि नेपालको हित मुख्य कुरा हो। नेपालको हितसँग बाझिने प्रावधान छन् भने तिनलाई परिमार्जन गर्नुपर्छ।'
उनले आफूहरु अमेरिकासँग सहयोग लिन र सहकार्य गर्न चाहने स्पष्ट पारे।
प्रचण्डले एमसिसीका प्रावधानका सन्दर्भमा अमेरिकासँग कुरा भइरहेको बताए।
'अमेरिकासँग पनि सामान्य संवाद त भइरहेकै छ। प्रधानमन्त्रीले पनि कुरा गर्नुभएको छ। हामीले पनि कुरा गरेका छौं', उनले थपे, 'भनिएको छ कि यो कुनै बाइबल होइन। यो सम्झौता हुनै नसक्ने, कमा फुलस्टप फेर्नै नपाइने भन्ने होइन। योभन्दा अगाडि पनि दुइपटक संशोधन भइसकेको छ। त्यसैले संशोधन हुन नसक्ने भनेर कसैले भन्यो भने त्यो सत्य होइन।'
उनले एमसिसीबारे अध्ययन गर्न नेकपाले गठन गरेको कार्यदलले हस्ताक्षरबिनाको प्रतिवेदन बुझाएको खुलाए।
'कार्यदलले दुईवटा अध्यक्षलाई प्रतिवेदन बुझाएको छ। तर प्रतिवेदनलाई पोलिस गर्न, बिट मार्न बाँकी रहेको र परराष्ट्रमन्त्री प्रदीप ज्ञवाली बाहिर रहेको हुनाले त्यसलाई फाइनल गर्न अलिकति ढिलो भयो। हस्ताक्षर नगरी बुझाउनुभएको थियो', उनले भने, 'हस्ताक्षर गरेर बुझाउनुपर्छ भनिएको थियो।'
उनले शनिबार बिहानमात्रै कार्यदलका साथीहरुसँग कुरा भएको बताए। २१ गते हस्ताक्षरसहितको प्रतिवेदन बुझाइने उनले बताए।
प्रचण्डले परिमार्जन र संशोधन गरेरमात्रै यसलाई अघि बढाउन सकिन्छ भन्ने कार्यदलको प्रतिवेदनको जिस्ट रहेको बताए।
'यत्तिकै स्थितिमा सकिँदैन भन्ने त्यसको निचोड छ। त्यो कुरा झलनाथ खनालले पनि बाहिर भनिसक्नुभएको छ। त्यो बुझाउने बेलामा उहाँहरुले ब्रिफिङमा पनि परिमार्जन, सुधार र संशोधनबिना पारित गर्न सकिँदैन भन्ने स्पिरिटमा नै प्रतिवेदन छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
