काठमाडौं– प्रधानमन्त्री केपी शर्मा ओलीले फेरि सञ्चार माध्यमहरुमा सरकार बनाउने र परिवर्तन गर्ने कुरा छापिन सुरु भएको बताएका छन्।
निर्वाचन आयोगको चौथो निर्वाचन दिवसका अवसरमा बुधबार बोल्दै प्रधानमन्त्रीले सरकार बनाउने र सरकार परिवर्तन गर्ने कुरा सञ्चार माध्यमहरुमा छ्याप्छ्याप्ति आइरहेको बताए। जनताको अभिमतबाट बनेको सरकारलाई जालझेल, षडयन्त्र र तिकडमबाट फेर्ने कुरा दिनदिनै अखबारहरुमा छापिने गरेको उनको आरोप छ।
‘जनताको अभिमतबाट होइन, जालझेल, षडयन्त्र र तिकडमबाट सरकार फेर्ने समाचार दिनैपिच्छे अखबारहरुमा छापिएको छापियै। तीन दिनअगाडि जति मैले हेर्या थेँअब त अविश्वासको प्रस्ताव राख्न पाइन्छ भनेर खुसीयाली मनाइराख्या। अस्थिरता ल्याउन पाइन्छ भनेर खुसीयाली मनाइराख्या। अस्थिरता ल्याउने ढोका खुल्यो भनेर खुसीयाली मनाइराख्या। जनमतको कुरा होइन जालझेलको, तिकडमको बाटो हिँड्न पाइन्छ भनेर खुसीयाली मनाइराख्या’, ओलीले भने, ‘लोकतन्त्र जालझेल, तिकडमको प्रणाली होइन। लोकतन्त्र जनताको अभिमतको प्रकटीकरणको प्रणाली हो। जनताको अभिमत स्वच्छ ढंगले प्रकट हुने र त्यस अभिमतलाई अस्वीकार गर्ने लोकतान्त्रिक पद्धति हुँदैन, जनताको अभिमत स्वीकार गर्नुपर्छ अनि मात्रै लोकतन्त्र भन्ने हुन्छ ।’
प्रधानमन्त्री ओलीले प्रजातन्त्र दिवसका अवसरमा बुधबार पूर्वराजा ज्ञानेन्द्र शाहले भविष्यका कुरा नगर भनेर अर्ति उपदेश दिएको भन्दै व्यंग्य गरे। उनले भने, ‘केही मानिसले हामीलाई सल्लाह, सुझाव, अर्ति उपदेश के दिन खोजेको हो, कुन्नि यसो सुनिन्छ । भविष्यका कुरा नगर, भविष्यतर्फ नहेर, भविष्यका सुन्दर सपना नबाँड, सुन्दर भविष्यको कुरा गरेर जनताको मनोबल नउठाउ, विगततिर हेर भन्या सुनिन्छ। यो एउटा प्रतिगामी उद्देश्यसहितको सोचको प्रकटीकरण हो।’
पूर्वजहरुको गौरवलाई सधैं सम्मान गर्ने उल्लेख गर्दै ओलीले पूर्वजहरुका पौरख र उपलब्धिहरुको सम्मान गर्ने बताए। ओलीले विगतका नकारात्मक कुराहरु पनि आफुले नबिर्सेको उल्लेख गरे। दरबार हत्याकाण्ड, माघ १९ जस्ता काला उद्देश्य प्रकटीकरण भएका काला दिनहरु पनि सम्झिरहेको उल्ेलख गर्दै ओलीले आफूहरुको स्मरणशक्ति कमजोर छ भनेर नसोच्न आग्रह गरे।
प्रधानमन्त्री ओलीले जनताबाट प्राप्त अधिकारलाई सुदृढ र विस्तृत गर्दै तिनको सफलतापूर्वक कार्यान्वयनको काम सरकारले अघि बढेको बताए। देशमा सुशासन र विकासको बाटोमा सरकार अघि बढेको र यही बाटोबाट सरकारले समृद्ध नेपाल सुखी नेपाली बनाउने राष्ट्रिय आकांक्षा सफलतापूर्वक अगाडि बढाउने बताए।
आयोगको कार्यक्रममा राष्ट्रपति विद्यादेवी भण्डारी, सभामुख अग्निप्रसाद सापकोटा, राष्ट्रियसभाका अध्यक्ष गणेश तिमल्सिना र राष्ट्रिय मानवअधिकार आयोगका अध्यक्ष लगायतको सहभागिता थियो।
तस्बिरः रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
