काठमाडौं– नयाँ पुस्ताकी चर्चित गायिका निक्की कार्कीले आफूमाथि यौन दुर्व्यवहार भएको बताएकी छिन्। फेसबुकका भिडियो मार्फत आफ्ना कुरा राख्दै उनले गत सेप्टेम्बर २ मा अमेरिकाको नर्थ क्यारोलिनामा कार्यक्रम गर्न जाँदा आयोजक मध्येका एकले यौन दुर्व्यवहार गरेको आरोप लगाएकी हुन्।
अमेरिका बस्दै आएकी २० वर्षीया गायिका कार्कीले भिडियो मार्फत आयोजक मध्येका एक सुशील नेपालले आफूलाई यौन दुर्व्यवहार गरेको आरोप लगाएकी छिन्। गायक शिव परियार लगायत सहभागी उक्त कार्यक्रममा ती व्यक्तिले आफूसँग कोठा सेयर गर्नुका साथै सँगै बियर पिउन आग्रह गरेको उल्लेख गरेकी छिन्। युट्युबमा कभर गायिकाका रुपमा चर्चित उनले भिडियोको सुरुवातमा सधैं आफूले गीतबाट रमाइलो प्रस्तुत गर्ने दर्शक स्रोतालाई दुःख बिसाउन चाहेको उल्लेख गरेकी छिन्।
त्यो घटनाले आफूलाई अहिलेसम्म पनि मानसिक तनाव दिइरहेको बताउँदै प्रहरी र आयोजक मध्येका अन्यले केही नगरेको गुनासो पोखेकी छिन्। प्रहरीले पनि आयोजकले नै ती व्यक्तिलाई कारबाही गर्नुपर्ने बताएको उनले उल्लेख गरेकी छिन्। उनले भनेकी छिन्, ‘धन्न म जोगिएँ, भगवानका कृपाले केही भएन। तर, यस्तो गलत नियत भएकालाई कडाभन्दा कडा कारबाही होस् भन्ने मेरो चाहना छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
