पिपिएलमा शरद : सफल कप्तानको पहिलो असफलता

स्पोर्टस लाइभ

ऋग्वेद शर्मा सोमबार, पुस ७, २०७६ १६:५७

पोखरा- ‘यो एउटा मात्र त्यस्तो प्रतियोगिता हो जहाँ हाम्रो ब्याटिङ, बलिङ, फिल्डिङ केही पनि चलेन’ शरद भेषावकरको यो निराश भनाइले धेरै कुरा बोल्छ। किनभने शरदले क्रिकेटमा सफल कप्तानका रुपमा बनाएको छबी यसपटक धुमिलियो।

हुन पनि नेपाली फेन्चाइज टी ट्वान्टीमा शरदले कप्तानी गरेका टिम फाइनलसम्म नपुगेको यसैपटक दोस्रो पोखरा प्रिमियर लिग (पिपिएल) मा मात्रै हो। त्यसअघि उनले कप्तानी गरेको टिम ६ प्रतियोगितामा ५ पटक त फाइनल पुगेको थियो भने २ उपाधि नै जितेको थियो।

एभरेस्ट प्रिमियर लिग (इपिएल) हुँदै धनगढी प्रिमियर लिग (डिपिएल) र पिपिएलसम्म शरदको कप्तानी यसअघि निकै फापेको थियो। तर, शरदकै कप्तानीमा पहिलो पिपिएल जितेको पोखरा पल्टन यसपटक दोस्रो पिपिएलमा लिग चरणबाट नै बाहिरियो।

पहिलो इपिएलमा शरदको कप्तानीमा रहेको पञ्चकन्या तेजले फाइनलमा कलर्स एक्स फ्याक्टर्सलाई हराएर उपाधि जितेको थियो। दोस्रो इपिएलमा शरदको कप्तानीमा रहेको भैरहवा ग्लाडियटर्स विराटनगर वारियर्ससँग फाइनलमा हारेको थियो। तेस्रो इपिएलको फाइनलमा ललितपुर प्याट्रियोट्ससँग शरदको कप्तानीमा रहेको भैरहवा ग्लाडियटर्स हारेको थियो।

यस्तै पहिलो डिपिएलमा नखेले पनि दोस्रो डिपिएलमा शरदको कप्तानीमा रहेको महेन्द्रनगर युनाइटेड फाइनलमा सिवाईसी अत्तरीयासँग हारेको थियो।

शरदको यस्तै सफलताहरु देखेरै हुनुपर्छ दोस्रो सिजनको पिपिएल क्रिकेट सुरु हुनै लाग्दा बलियो टिमबारे आँकलन भइरहेको थियो। जसमा अगाडि आएको दुई नाम हो– चितवन राइनोज र पोखरा पल्टन। चितवनलाई नै फाइनलमा हराएर पोखराले पहिलो पिपिएलको उपाधि पनि जितेको थियो।

पारस खड्काको कप्तानीमा रहेको चितवन राइनोज लिग चरणका चार खेलेर जितेर शीर्ष स्थानमा छ। चितवनले मंगबलार काठमाडौं गोल्डेन वारियर्ससँग लिगको अन्तिम खेल खेल्दै छ। तर नेपाली फ्रेन्चाइज क्रिकेट लिगका सफल कप्तान शरद भेषावकरको कप्तानीमा रहेको पोखरा पल्टन भने यसपटक कमजोर देखियो।

गएको पहिलो पिपिएल जित्न सफल भेषावकर कप्तानीको पोखराले यसपटक पहिलो खेलमा काठमाडौंलाई ९ विकेटले हराए पनि त्यसपछिका चार खेल हार्दै लिग चरणबाट नै बाहिरियो।

यो हारलाई शरदले टिम ब्यवस्थापन र आफूहरुको तयारीमा देखिएको कमिसँग जोडे। ‘सुरुदेखि योजनाहरु राम्रो भएन। हामीले जो विदेशी खेलाडीहरु खोजेका थियौँ उनीहरु अन्तिम समयमा आउन सकेनन्।

त्यसैले अरु खेलाडीहरु बोलाउन पर्ने भयो। त्यसले अन्तिम समयमा राम्रो खेलाडी ल्याउन पनि सकेनौँ। टिम पनि सन्तुलित हुन सकेन’ अन्तिम खेलमा धनगढीसँग ५ विकेटको हारपछि शरदले भने।

शरदले विदेशी खेलाडी सोचेअनुसार हुन नसकेको बताइरहँदा उनको आफ्नै प्रदर्शन पनि प्रतियोगितामा राम्रो रहेन। ५ खेलमा उनले ९३.३३ को स्ट्राइक रेटमा ५६ रन मात्रै बनाए।

पहिलो खेलमा काठमाडौंविरुद्ध १ ओभर बलिङ गरेका उनले १८ रन खर्चिएर विकेटविहीन भए। ब्याटिङमा उनी आउनुअघि नै पोखराले जित निकाल्यो। दोस्रो खेलमा चितवनसँग ६ विकेट हार्दा शरदले ३९ बलमा ४५ रन हानेका थिए। उनको ब्याट चलेको चितवनविरुद्धको खेलमा मात्रै थियो।

तेस्रो खेलमा विराटनगरसँग ४५ रनले हार्दा शरदले शून्यमै आउट भएका थिए। बलिङतर्फ दुई ओभरमा १६ रन खर्चेर दुई विकेट लिएका थिए। चोथो खेलमा बुटवलसँग ८ विकेटले हार्दा शरदले १४ बलमा ७ रन मात्रै बनाएका थिए। अन्तिम खेलमा धनगढीसँग ५ विकेटले हार्दा तीन बलको सामना गरेका शरद चार रनमा हिटविकेट हुन पुगे।

‘आजको खेलमा हामीले रन रेट राम्रो बनाउनु थियो। त्यसैले ब्याटिङ पहिले गरेर राम्रो रन जोड्नुको विकल्प थिएन। त्यसैले टस जितेर पहिले ब्याटिङ नै रोज्यौँ। दुई सय रन बनाउने सोचका साथ खेलेका थियौँ। तर सजिलो भएन, विकेटहरु छिटो छिटो नै गयो’ खेलपछि शरदले भने।

यसपटक आफूहरु कमजोर भए पनि अर्को पटक सुधार गरेर राम्रो गर्ने योजना सुनाइरहँदा शरदले नेपाली फेन्चाइज क्रिकेट प्रतियोगिता हुनुपर्ने शैलीमा नभएको तर्फ पनि संकेत गरे।

‘पहिले पनि हामीले नेपाली क्रिकेटमा व्यवस्थापन राम्रो नुहँदा टिमको खेलमा असर पर्न सक्छ भनिरहेका हौं, सबै कुरा जोडिएर नै आउँछ। आउने दिनहरुमा राम्रो होस् भन्ने आश राखौँ’ उनले भने, ‘गल्तीहरुलाई स्वीकार गरेर सबै मिलेर सुधार गर्दै जानुको विकल्प छैन। टी ट्वान्टीले मात्र हाम्रो देशको क्रिकेट चाहिँ सुध्रदैँन। अझ लामो फम्र्याटका खेलहरु हुन जरुरी नै छ।’

क्रिकेट जस्तो अनिश्चितताको खेलमा सधैँ फाइनलसम्म पुग्न नसके पनि हारबाट सिक्नुपर्ने कुरा यसपटक सिक्न पाएको शरदको भनाइ छ।

अन्तिम खेलपछि शरदले अरु के भने?
आजको खेलमा हामीले रन रेट राम्रो बनाउनु थियो। त्यसैले ब्याटिङ पहिले गरेर राम्रो रन जोड्नुको विकल्प थिएन। त्यसैले टस जितेर पहिले ब्याटिङ नै रोज्यौँ। दुई सय रन बनाउने सोचका साथ खेलेका थियौँ। तर सजिलो भएन, विकेटहरु छिटो छिटो नै गयो।

पहिलो खेल जितेपछि जसरी अरु खेल खेल्यौँ हामी प्ले अफमा पुग्नका लागि योग्य नै थिएनौँ। यो एउटा मात्र त्यस्तो प्रतियोगिता हो जहाँ हाम्रो ब्याटिङ, फिल्डिङ केही पनि चलेन। मेहनत गरेर अर्को वर्ष चाहिँ राम्रो टिम बनाएर आउनुपर्छ।

यो प्रतियोगिता मेरो लागि सिक्ने मौका हो। के नराम्रो भएको छ त्यो कुराहरुमा सुधार गर्नुपर्छ। अफ द फिल्ड पनि धेरै इस्युहरु भयो यसपटक त्यही कुरा मैदानमा पनि देखियो। सबैको लागि केही सिक्ने अवसर हो।

हरेक प्रतियोगिताको फाइनलमा पुग्न पनि सकिँदैन। टी ट्वान्टी खेल नै अनुमान भन्दा बाहिर भइदिने प्रतियोगिता हो, त्यसैले म केही कुरा सिक्न पाएकोमा नै सकारात्मक छु। हार्दा कस्तो हुने रहेछ, के के कुरा बुझिने रहेछ भन्ने मैले सिक्न पाएको छु।

पहिलो सिजनको विजेता भनेर त्यस्तो दबाब त थिएन। हरेक खेल नै जित्नका लागि खेल्ने हो। त्यो प्रेसर सोचेर भन्दा पनि खेलाडी भएपछि हरेक खेललाई शतप्रतिशत मेहनत गरेर नै खेल्ने हो। यो प्रतियोगितामा जसरी खेल्यौँ हामी अगाडि बढ्न योग्य भएनौँ।

सुरुदेखि योजनाहरु राम्रो भएन। हामीले जो विदेशी खेलाडीहरु खोजेका थियौँ उनीहरु अन्तिम समयमा आउन सकेनन्। त्यसैले अरु खेलाडीहरु बोलाउन पर्ने भयो। त्यसले अन्तिम समयमा राम्रो खेलाडी ल्याउन पनि सकेनौँ। टिम पनि सन्तुलित हुन सकेन।

टिम ब्यबस्थापनमा व्यावसायिकता देखिएन। खेलाडीलाई हुनुपर्ने व्यवस्थाहरु राम्रो भएन। खेलाडीहरुसँग कुनै सम्झौता पनि भएको थिएन। पहिलेको विजेता टिम हामी प्रतियोगिता अघि ब्यवस्थापनले राम्ररी कुराकानी पनि गरेको थिएन। विजेता टिमका लागि त्यस्तो वातावरण चित्तबुझ्ने कुरा नै होइन।

खेलाडीलाई खेलिराख्न सहज वातावरण बनाउने यस्तै खाले प्रतियोगिताले हो। जे कमि कमजोरी भए पनि प्रतियोगिता भइरहेका छन्। खेलाडीले खेल्न पाइरहेका छन्, त्यो महत्वपूर्ण नै छ। गल्तीहरुलाई स्वीकार गरेर सबै मिलेर सुधार गर्दै जानुको विकल्प छैन। टी ट्वान्टीले मात्र हाम्रो देशको क्रिकेट चाहिँ सुध्रदैँन। अझ लामो फम्र्याटका खेलहरु हुन जरुरी नै छ।

सबै कुरा एकअर्कासँग सम्बन्धित हुन्छन् नै। पहिले पनि हामीले नेपाली क्रिकेटमा व्यवस्थापन राम्रो नुहँदा टिमको खेलमा असर पर्न सक्छ भनिरहेका हौं, सबै कुरा जोडिएर नै आउँछ। आउने दिनहरुमा राम्रो होस् भन्ने आश राखौँ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।