काठमाडौं– दशैं संघारमै आइसकेको छ। पेसा व्यवसायले घरबाहिर रहेकाहरु फर्किने क्रम सुरु भइसकेको छ। मुख्य सहर बजारमा किनमेल गर्नेहरुको घुइँचोले नै भनिरहेको छ- अब दसैंको रौनक सुरु भइसक्यो।
काठमाडौंको मुख्य बजार असन, न्युरोड, महाबौद्ध, भोटाहीटी, कोटेश्वर, बानेश्वर, भृकुटीमण्डप, कंलकी जस्ता व्यस्त ठाउँमा पनि ग्राहकहरुको भिड देख्न सकिन्छ। नयाँ कपडा लगाउने, मिठो खाने, साथीभाइसँग रमाउने, टाढा–टाढाबाट आफन्तहरु एकै ठाउँमा जम्मा हुने भएकाले दशैंको छुट्टै महत्व छ। दशैं आम नेपालीले उत्साहका साथ मनाउने गर्छन्। यो पर्व गाउँदेखि सहरसम्म, गरिबदेखि धनी सबैले उतिकै रमाइलो गरी मनाउँछन्।
बच्चादेखि बूढासम्म सबैले पिङ खेलेर रमाइलोसँग मनाउने गर्छन, यो पर्व। घटस्थापना सुरु भएदेखि नै हरेक नेपालीले नयाँ लुगा, गरगहना र घर सजावटका सामग्री किन्ने गर्छन्।
किनमेल गर्नेको भिड बढेपछि बाटो हिँड्ने मानिसले असहज महसुस गरेका छन्। किनमेलमा यसपाली ग्राहकहरुको मुख्य रोजाइ लत्ताकपडा, साडीकुर्ता, सुनचाँदी, भाँडा र जुताका सरसामान रहेको पसलेहरु बताउँछन्।
न्युन आय भएकालाई व्यापारीहरुले पसलबाहिर सडक किनारमा पसलको व्यवस्था गरेका छन्। दशैंमा टीका र जमरा थाप्न काठमाडौं उपत्यकाबाट बाहिरा जाने मानिसहरुले लत्ताकपडाबाहेक पनि गुदपाक र पुष्टकारी किनिरहेका छन्। काठमाडौंमै बस्नेहरुले घरमा चाहिने अत्यावश्यक सामान मरमसला, चिनी, चियापत्ती, जिरा धनियाँ किन्ने गरेका छन्।
व्यापारीहरुले पनि दशैंको बेला ग्राहकलाई आकर्षित पार्न अनेकौं अफर दिइरहेका छन्। यतिबेला बजारमा कतै ४०–५० प्रतिशत छुट लेखेको देख्न सकिन्छ भने कतै २ हजारको जुत्ता एक हजारमा बिक्री भइरहेको छ।
विभिन्न ठाउँमा सेलको व्यवस्था पनि गरिएको छ। यस्तो ठाउँमा भिड अधिक देखिन्छ। बजारमा सामान किन्न आएका ग्राहकले पोहोरभन्दा यो साल सामान किन्न सहज भएको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
