आधार क्षेत्रमै समाजवादी पार्टी कमजोर : कतै उम्मेदवारी नै परेन, कतै जमानत जफत

राजनीति

दिनेश शर्मा बुधबार, मंसिर १८, २०७६ ०७:२३

राजविराज– मधेस आन्दोलनको प्रभाव र राष्ट्रिय अध्यक्ष उपेन्द्र यादवको आधार क्षेत्र (निर्वाचन क्षेत्र)मै समाजवादी पार्टी कमजोर सावित हुँदै गएको छ। मंसिर १४ को स्थानीय तह उपनिर्वाचनमा समाजावादी पार्टीले कतिपय स्थानमा उमेदवारी नै दिन सकेन भने कतिपय स्थानमा जमानत जफत भएको छ।

सप्तरी निर्वाचन क्षेत्र नं. २ को छिन्नमस्ता– ७, हाटिमा समाजवादीले उमेदवार नै खडा गर्न सकेन। यस्तै, सिरहाको कल्याणपुर नगरपालिका– १२, वेलहामा वडाध्यक्षका उम्मेदावर किशोरी साहले १० मत मात्रै पाए। छिन्नमस्ता–७ समाजवादी पार्टीका राष्ट्रिय अध्यक्ष उपेन्द्र यादव र केन्द्रीय सदस्य एवं प्रदेश २ को भूमि व्यवस्था, कृषि तथा सहकारीमन्त्री सैलेन्द्रप्रसाद साहको निर्वाचन क्षेत्र समेत हो।

हाटिमा समाजवादीले आफ्नै उम्मेदवार उठाउने प्रयास गरेको थियो। प्रदेश–२ का सचिव दिनेश कुमार यादवका अनुसार सकलदेव साह, विरेन्द्र मण्डल र शत्रुधन यादव मध्येवाट उम्मेदवार बन्ने सम्भावना थियो। तर, उम्मेदवारी दिने अन्तिम समयमा राजपाकी उम्मेदवार प्रमिलादेवी यादवलाई समर्थन गर्‍यो।

२०७४ सालदेखि नै राजपा र समाजवादीको तालमेल भएकाले यसपटक पनि समर्थन गरेको समाजवादीका जिल्ला अध्यक्ष केदार यादव बताउँछन्। तर, स्थानीय स्तरमा भने मतदाता र उम्मेदवारको अवस्था हेरेर समाजवादीले उम्मेदवारी नदिएको चर्चा छ। जिल्ला अध्यक्ष यादवकै भनाइले पनि उक्त कुरालाई पुष्टि गर्छ। ‘राजपाको तुलनामा हामी कमजोर थियौं, त्यसैले समर्थन गरेर अघि बढ्यौं,’ उनले भने।

मत परिणामले पनि समाजवादीको कमजोर अवस्थालाई पुष्टि गरेकाे छ। समाजवादीसहित नेपाली कांग्रेसले पनि अन्तिम समयमा प्रमिलालाई नै समर्थन गरे। तर, मधेसका प्रभावशाली पार्टी राजपा, समाजवादी पार्टी र नेपाली कांग्रेसको मत जोड्दा पनि प्रमिलाले ११ मतको सकसपूर्ण जित निकालिन। मलेठ आन्दोलनपछि मधेसमा प्रभाव गुमाएको भनिएको नेकपाका अच्छेलाल यादवले ५२९ ल्याउँदा प्रमिलाले ५४० मत पाइन्।

हाटिका १ हजार ४ सय ३ मतदाता मध्ये १ हजार १ सय १४ जनाले मतदात गरेका थिए। जसमध्ये नेपाली कांग्रेसका शिव नारायण मण्डलले १५, जनमत पार्टीका दिनेश कुमार यादवले ११, राप्रपाका गजेन्द्र मण्डल र स्वतन्त्र उम्मेदवार धीरेन्द्रकुमार यादवले २/२ र अर्का स्वतन्त्र उम्मेदवार नुर हुसन मंसुरीले १ मत पाए। १४ मत बदर भएको मुख्य निर्वाचन अधिकृत चन्द्रमणी ज्ञवालीले जानकारी दिए।

यसैगरी, सिरहाको कल्याणपुर नगरपालिका–१२ बेलहामा समाजवादीका किशोरी साहले १० मत प्राप्त गरे। संगठन कमजोर हुँदाहुँदै पनि उनले अध्यक्ष पदमा उमेदवारी दिएका थिए। समाजवादी पार्टीका जिल्ला अध्यक्ष अशोक कुमार यादव पनि संगठन कमजोर भएका कारण अवस्था नाजुक भएको स्वीकार्छन। ‘हाम्रा धेरै कार्यकर्ता पहिले नै राजपामा गए,’ उनले भने ‘उम्मेदवार पनि कमजोर सावित भएकाले नतिजा राम्रो आएन।’ उक्त वडामा ८२५ मत ल्याएर नेपाल कम्युनिस्ट पार्टी (नेकपा)का दिलिप कुमार यादव विजयी भएका छन्।

बेलहामा ५ जना स्वतन्त्रसहित १३ जनाको उम्मेदवारी परेको थियो। कूल ३४५० मतदाता रहेकाेमा २४८० मत खसेकाे थियाे। जसमध्ये राष्ट्रिय प्रजातन्त्र पार्टीका मो.बसिर राईनले १४१, राप्रपा संयुक्तका मो.अतावुल राईनले २५, जनमत पार्टीका मो.अताउल राइनले १६०, नेपाल लोकतान्त्रिक पार्टीका राजलाल सदायले ५ र स्वतन्त्र उमेदवार रामअशिष सिंहले ३ मत पाए । स्वतन्त्र उम्मेदवारहरु सूर्यनारायण राय, श्यामबाबु दास, गौरीशङ्कर यादव र हेबु मुखियाले आफ्नै मतसमेत सुरक्षित गर्न सकेनन्। उनीहरुले एक मत पनि पाएनन् । ४२ मत बदर भएको मुख्य निर्वाचन अधिकृत योगेन्द्र प्रसाद साहले बताए।