नेपालगन्ज– बाँकेको राप्ती नदी किनारका बाढी तथा डुबान प्रभावित करिब एक हजार परिवारहरु सामुदायिक वनमा टहरा बनाएर बस्न बाध्य भएका छन्।
बाढी र डुबानका कारण घर भत्किएर बिचल्लीमा परेका कारण सामुदायिक वन क्षेत्रमा टहरा बनाएर बस्न बाध्य भएको बाढी पिडितहरुले बताएका छन्।
बाँकेको फत्तेपुरमा मात्रै ६ सय ५० परिवारहरु सामुदायिक वनमा टहरा बनाएर बसेका छन्।
सामुदायिक वनमा टहरा बनाए पनि अधिकांश बाढी प्रभावितहरुसँग टिन तथा त्रिपाल नहुँदा खुल्ला आकाशमै रात काट्न विवश छन्। शिवशक्ति सामुदायिक वनमा टहरा बनाएर बस्दै आएकी चन्द्रकला थारुले खाद्यान्नको अभाव हुँदा भोकभोकै रात काट्नु पर्ने अवस्था आएको बताइन्।
राप्ती नदीको कटान तथा डुबानको उच्च जोखिममा रहेको फत्तेपुरका स्थानीय बासिन्दाहरु बर्षौंदेखि बाढी तथा डुबानको चपेटामा पर्दै आएका छन्।
बाढी प्रभावितहरुले सरकारसँग वर्षाैंदेखि नदि कटान तथा डुबान नहुने सुरक्षित स्थानमा घरबासका लागि जग्गा उपलब्ध गराउन माग गर्दै आएका छन्। तर, सुरक्षित स्थानमा पुनःस्थापना हुन नसकेका कारण प्रभावित परिवार सामुदायिक वनमा टहरा बनाएर कष्टपुर्ण अवस्थामा बस्न बाध्य भएको राप्ती सोनारी गाउँपालिका वडा नम्बर ७ का राम लखन थारुले बताए।
बाढी प्रभावितहरुले सरकारले सुरक्षित स्थानमा बसोबासको व्यवस्था नगर्दासम्म सम्म सामुदायिक वनमै घर टहरा बनाएर बस्ने बताएका छन्।
यो वर्ष आएको बाढीबाट बाँकेमा १ हजार ३ सय घर पूर्ण रुपमा क्षतिग्रस्त हुँदा ६ हजार १ सय १६ जना विस्थापित भई बस्ती नजिकको जंगलमा बस्दै आएका छन्।
सरकारले सुरक्षित स्थानमा बसोबासको व्यवस्था नगर्दै जिल्ला वन कार्यालयले वन अतिक्रमण गरेको भन्दै हटाउनका लागि सूचना जारी गरेपछि बाढी प्रभावितहरु थप समस्यामा परेका छन्।
बाढी प्रभावितका नाममा हालसम्म करिब २८ हेक्टर वन अतिक्रमण भई सकेको बाँकेका जिल्ला वन अधिकृत पुष्पराज बड्तौलाले बताए।
अतिक्रमण गरिएको वन क्षेत्रबाट अतिक्रमण हटाउनका लागि प्रयास भए पनि चुनावको मुखमा अतिक्रमण गरी बनाएको घर टहरा नहटाउन सत्तारुढ दलबाटै तीब्र दबाब परेको वन अधिकृत बड्तौलाले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
