विराटनगर– विष्णुमाया राई जापानमा रहेका आफ्ना छोरा–बुहारीलाई भेट्न उतै जाने तयारीमा थिइन्। उनी मुखैमा आएको चाँड दशैँ मनाउन जापान जान लागेकी थिइन्। यसैका लागि आमासँग विदा माग्न उनी एक दिन अगाडि मोरङको कानेपोखरी–३ स्थित हर्कपुरमा रहेको दाजुको घरमा बास बस्न पुगेकी थिइन्।
तर, दुर्भाग्य विहान ३ बजे लागेको आगलागीमा घरका अन्य सदस्यसँगै उनको पनि जलेर मृत्यु भएको छ। दशैंको मुखमा भएको यो घटनाले अहिले गाउँले सबैलाई शोकमग्न बनाएको छ।
५५ वर्षीया चन्द्रबहादुर राईको किराना पसल भएको दुई तले घरमा बिहान अचानक आगलागी भएको थियो। आगलागीमा घरभित्र सुतेका चन्द्रबहादुर राई, ८६ वर्षीया आमा गंगामाया राई, श्रीमती ४६ वर्षीया पार्वता राई र बहिनी ४४ वर्षीया विष्णुमाया राईको जलेर मृत्यु भएको जिल्ला प्रहरी कार्यालय, मोरङले जनाएको छ। चन्द्र पूर्व वडाअध्यक्ष पनि हुन्।
विराटनगर, इटहरी र दमकबाट आएका तीन वटा दमकल, स्थानीय र प्रहरीको सहयोगमा विहान ५ बजे आगो नियन्त्रणमा आएको थियो। प्रहरीको प्रारम्भिक अनुसन्धानले घरको विद्युतीय सर्किट सर्ट हुँदा आगलागी भएको बताएको छ। घरमा चारैजना निद्रामा रहेकाले आगलागी भएको भेउ नपाएको आशंका गरिएको छ।
आगलागीमा १ करोड बढीको क्षति भएको पथरी प्रहरीले जनाएको छ। आगलागीबाट एउटा हाते ट्रयाक्टरसहित घरका सबै सामान जलेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
