कैलाली– कैलालीको धनगढीका दुई पसलमा तालाबन्दी गरिएको छ। कालोबजारी र कर छली गरेको भन्दै बुधबार धनगढीका दुई पसलमा तालाबन्दी गरिएको हो ।
वाणिज्य तथा आपूर्ती राज्यमन्त्री कर्ण विकको नेतृत्वमा गएको अनुगमन टोलीले धनगढीस्थित अनमोल विश्वास सु सेन्टर र पञ्कज ईन्टरप्राईजेजमा ताला लगाएको हो । अनुगमन टोलीले आवश्यक कागजपत्र ल्याएर जिल्ला प्रशासनमा उपस्थित हुन भन्दै उक्त दुई्टा पसलमा तालाबन्दी गरेको राज्यमन्त्री विकले जानकारी दिए।
योसँगै अनुगमन टोलीले म्याद नाघेका खाद्यान्नहरु जफत गरि नष्ट गरेको छ । धनगढीका विभिन्न खाद्यान्न पसल, खुद्रा पसलहरुमा अनुगमन गर्दा अधिकाँस पसलमा मूल्य सूची नराखेको, म्याद नाघेका सामानहरु विक्री वितरण भइरहेको पाएको थियो।
धनगढीस्थित राज स्टोरमा म्याद नाघेको बिस्कुट, ससी लगायतका खाद्यान्नहरु बरामद गरिएको जनाइएको छ । अनुगमन टोलीले उक्त सामानहरु बरामद गरि नष्ट गरेको छ ।
यस्तै टोलीले धनगढीका सुनचाँदी पसलहरुको अनुगमन गर्दा सुन पसलेहरुले कामदारलाई न्यून ज्याला दिइरहेको र आफुले बनाएको सुनबाट बढी ज्याला असुल गरिरहेको पाइएको थियो । सुन पसलहरुको अनुगमन गर्दा गुणस्तर तथा नाप तौल कार्यालयले पुनः कमजोरी देखाएको छ।
मंगलबारको अनुगमनका क्रममा ढक तराजु नलिएर अनुगमनमा उपस्थित भएका गुणस्तर तथा नापतौलका कार्यालयले बुधबार भने सुन चादी पसलहरुको तराजुको तौल उचित भए÷नभएको छुट्याउन सकेन । नापतौल कार्यालयलाई सुनचाँदी व्यापारीहरु यसरी गर्दा ठिक हुन्छ भनेर देखाउन खोज्दै थिए । कुनै पनि तराजु बाहिरबाट आयात हुँदा नापतौलले प्रमाणित गर्ने प्रावधान छ । नापतौलले प्रमाणित गरेको तराजुमात्र बजारहरुमा प्रयोग हुने गरेका छन् । तर, राज्यमन्त्रीको अनुगमनका क्रममा तराजु ठिकभएको नभइको छुट्याउनै गाह्रो भएको थियो । नापतौल कार्यालयलका कर्मचारीको पसलेसँग मिलेमतो भएको आशंका अनुगमनका क्रममा गरिएको थियो ।
यस्तै खाद्य संस्थान सेती अञ्चल कार्यालयमा पनि टोलीले अनुगमन गरेको छ । कार्यालयको अनुगमनका क्रममा खाद्य संस्थानले सुपथ मूल्य पसलमा चामल र पिठो विक्री वितरण गर्ने भनेको भएपनि सुपथ मूल्य पसलबाट चामलमात्र विक्री वितरण गरिरहेको पाइएको थियो । खाद्य संस्थानले बजार मूल्यभन्दा पाँच रुपैया कममा सुपथ मूल्यबाट चामल विक्री वितरण गरिरहेको छ ।
राज्यमन्त्री विकले खाद्य संस्थानलाई दशैतिहार अवधिभर आवश्यकपर्ने चामलहरु अभाव हुन नदिने गरि काम गर्न निर्देशन दिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
