काठमाडौं– प्रहरीले अवैध मुद्रा तस्करी र हुण्डीमा कडाइ गरेपछि सुन तस्करीको संगठित गिरोहले सुनसँग दुर्लभ जडिबुटी यार्सागुम्बाको बार्टर (साटासाट) गरिरहेको खुलेको छ।
देशभरबाट संकलित यार्सागुम्बा काठमाडौं हुँदै हवाई र स्थलमार्गबाट चीन पठाउने र सोको भुक्तानी सुन मार्फत हुने गरेको तथ्य प्रहरीले पत्ता लगाएको हो । यसमा चिनियाँ नागरिकको प्रत्यक्ष संलग्नता रहँदै आएको अनुसन्धानमा देखिएको छ।
महानगरीय अपराध महाशाखाले भदौ १९ गते बरामद ८८ किलो सुन प्रकरणमा जोडिएका थप पाँच जनालाई सोमबार पक्राउ गरेपछि यार्सासँग सुन साट्ने गरेको नयाँ तथ्य बाहिर आएको हो।
महाशाखाले पक्राउ गरेका पाँच जनामध्ये न्यूरोडस्थित रञ्जना कम्प्लेक्सको कार्यविनायक सुनचाँदी गहना पसलका सञ्चालक गणेशदत्त बडुले यार्सागुम्बाको कारोबारको भुक्तान सुनमा लिने गरेको खुलेको हो।
प्रहरी उच्चस्रोतका अनुसार, लामो समयदेखि सुन पसलको आवरणमा यार्सागुम्बाको अवैध कारोबारमा संलग्न बडुले पश्चिमका विभिन्न हिमाली क्षेत्रबाट यार्सा संकलन गरी चीनतर्फ तस्करी गर्दै आएका थिए । दार्चुला घर भएका बडुले सोही पसल मार्फत दुर्लभ जडिबुटी, विदेशी मुद्रा र सुनको अवैध कारोबार गर्दै आएका थिए । बडुको पसलमा राजस्व विभाग समेतको टोलीले छापामारी करिब ११ लाख नेपाली रुपैयाँ बराबरको अमेरिकी डलर र भारतीय रुपैयाँ समेत बरामद गरेको छ।
यस्तै, सोमबार नै पक्राउ परेका सत्यनारायण अग्रवाल यसअघि २०७२ पुस २३ मा बरामद साढे नौ किलो सुनको मुख्य कारोबारी थिए । अग्रवाल त्यसबेलै विक्रम मित्तल, विवेक मित्तल र भागीरथ चौधरीसँगै पक्राउ परेका थिए । मित्तल र चौधरीले ल्याएको सुनको भुक्तान हुण्डी मार्फत गर्ने क्रममा अग्रवाल पक्राउ परेका हुन् । यसपटक पनि उनी सोही आरोपमा पक्राउ परेका छन् । भारत विहार मधुवनीका अग्रवाल काठमाडौं नरदेवीमा रविश्या ट्रेडर्सको आवरणमा अवैध हुण्डी र सुन तस्करीमा संलग्न रहँदै आएका छन्।
महाशाखाका अनुसार, सुन कारोबारमा संलग्न भारत महाराष्ट्र घर भई वटुमा सुन खार्ने पसल सञ्चालकहरु पशुपति सुनचाँदीका नन्दकुमार मर्गले, सिद्धनाथ सुनचाँदीका उल्लास दिनकर सालुखे समेत पक्राउ परेका छन् । यस्तै, पक्राउ पर्नेमा बाङ्गेमुढामा रहेको शाक्य सुनचाँदी पसलका सञ्चालक शुभरत्न शाक्य पनि छन्।
जिल्ला अदालत काठमाडौंको आदेशले धरौटीमा छुटेका अग्रवाल हुण्डी र सुनको अवैध तस्करीको आरोपमा दोस्रो पटक पक्राउ परेका छन्।
महाशाखाका प्रमुख एसएसपी दिवेश लोहनीले ८८ किलो सुन प्रकरणमा जोडिएका चिनियाँ दम्पतीको सम्पर्कमा रहेर काम गर्दै आएका थप पाँच व्यक्ति पक्राउ गरेको जानकारी दिए । उनले पक्राउ परेका ब्यक्ति विभिन्न ब्यवसायिक आवरणमा रहेकाले राजस्वको टोलीसँगै गएर कारबाही गरिएको बताए ।
महाशाखाले ठमेलस्थित काठमाडौं वन होटल सञ्चालक चिनियाँ दम्पत्ती याङ वेन विङ र उनका पति पान विई मिङ नै ८८ किलो सुन तस्करीका मुख्य अभियुक्त रहेको बुधबार मात्रै औपचारिक रुपमा स्विकार गर्दै थप अनुसन्धान गरिरहेको जनाएको छ।
प्रहरी स्रोतका अनुसार चिनियाँ दूतावासमा कार्यरत कर्मचारीको प्रत्यक्ष सम्पर्कमा रहेका चिनियाँ दम्पत्तीको मोबाइल बालुवाटारस्थित दूतावास आसपासमा पुगेर स्विच अफ भएको थियो । प्रहरीले चिनियाँ दम्पत्तीलाई समेत संगठित अपराधमा प्रतिवादी बनाएर कारबाही अघि बढाएको छ।
महाशाखाले सुन प्रकरणमा मुख्य अभियुक्त बनाएका दुई चिनियाँ दम्पत्तीको सम्पर्क सूत्र केलाउने क्रममा सोमबार आठ जनालाई पक्रेको थियो । पक्राउ परेकामध्ये पाँच जनाको चिनियाँ दम्पतीसँग प्रत्यक्ष संलग्नता देखिएपछि बुधबार संगठित अपराधमा म्याद थप गरेको हो ।
प्रहरीले सोही प्रकरणमा रसुवाबाट केरुङ नाका खाली गाडी लैजाने र सुन लोड गरी रसुवा ल्याउने जिम्मेबारी पाएको गिरोहका थप दुई जना यसअघि पक्राउ गरेको थियो ।
सुन तस्करीका लागि प्रयोग भएको टाटा स्ट्रोम गाडीलाई रसुवाबाट केरुङ लैजाने र केरुङबाट रसुवा हुदै काठमाडौं ल्याउने चालक पक्राउ परेका हुन्।
जिल्ला प्रहरी कार्यालयले केरुङ नाकाको रेर्कड अनुसार खाली गाडी केरुङ लैजाने दाम्पा तामाङ र सुन लोड गराएर रसुवा ल्याउने दिलिप खड्कालाई पक्राउ गरेको हो । रसुवा प्रहरी प्रमुख डिएसपी शरद थापा क्षेत्रीले प्रहरी रेर्कडमा गाडी लैजाने र ल्याउने दुई जनालाई पक्राउ गरेको जानकारी दिए । महाशाखाले सुनसहित चालक मनोज अधिकारीलाई पक्रेको छ । बरामद गाडी सिप्रदी ट्रेडिङमा चालक श्याम महर्जनका नाममा दर्ता रहेको छ।
महाशाखाले क्षेत्रपाटीबाट बा १७ च ६४२७ नम्बरको गाडीसहित चालक मनोज अधिकारीलाई भदौ १९ मा नियन्त्रणमा लिएको थियो । त्यसक्रममा गाडिको विभिन्न पार्टपुर्जामा कालो टेपले बेरेर लुकाएका एक केजी लेखिएको ८८ थान सुनका बिस्कुट बरामद भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
