काठमाडौं– प्रदेश २ मा निर्वाचनविरोधी गतिविधिमा संलग्न तराई जनतान्त्रिक मुक्ति मोर्चा गोइत समूहका एक जनासहित १९ जनामाथि प्रहरीले कारबाही थालेको छ।
प्रहरीले सर्वसाधारणलाई आतंकित बनाउन सुतली बम राख्ने, धाकधम्की दिने र निर्वाचनमा मतदान नगर्न उर्दी गर्ने १९ जना प्रदेश–२ का ८ जिल्लाबाट पक्राउ परेका हुन्।
‘केही छिटफुट बाहेकका घटना देखिएको छैन, घटनास्थलमा तत्काल सेना सहितको प्रहरी टोली पुग्ने गरेको छ,' प्रदेश प्रहरी प्रमुख एआइजी विजयलाल कायस्थले भने, 'निर्वाचन शान्तिपूर्ण हुनेछ।’
आइतबार बिहान सर्लाहीको बलरामा सुतली बम बिस्फोट हुँदा एक बालिका सामान्य घाइते भएकी छन्। हालसम्म डेढ दर्जनभन्दा बढी सुतली बम बरामद गरिएको उनले बताए।
नेपाली सेना, सशस्त्र प्रहरी र नेपाल प्रहरीका गरी करिब ७० हजार सुरक्षाकर्मी प्रदेश २ मा सक्रिय छन्।
सेनाले हातहतियार सहित गस्ती गरिरहेको छ भने सशस्त्र र प्रहरी सम्मिलित टोली विभिन्न नाकामा खटिएका छन्। सीमा नाका ७२ घन्टाका लागि बन्द गरिएको छ। थप सुरक्षाका लागि सेनाको टोली समेत सीमा–नाकामा तैनाथ गरिएको कायस्थले बताए।
निर्वाचन विरोधी क्रियाकलापमा संलग्न केही व्यक्ति समेत पक्राउ परेका छन्। बढी सक्रिय देखिएका नेपाल कम्युनिस्ट पार्टी, जनतान्त्रिक मुक्ति मोर्चा ज्वाला सिंह र गोइत समूह तथा सिजन समूहका कार्यकर्ता प्रहरी निगरानीमा रहेको उनले बताए।
एआइजी कायस्थका अनुसार सुरक्षा फौजले ठाँउ-ठाँउमा बम डिस्पोजल टोली र तालिमप्राप्त कुकुरको प्रयोग गरिरहेको छ।
प्रहरी प्रवक्ता डिआइजी मनोज न्यौपानेका अनुसार प्रदेश २ मा खटिएका प्रहरीबाहेक नजिकको प्रदेशमा रहेका सुरक्षाकर्मीलाई समेत तयारी अवस्थामा राखिएको छ। निर्वाचनका क्रममा सुरक्षाकर्मी अपुग भए ती प्रदेशबाट समेत सुरक्षाकर्मी परिचालित हुने उनले बताए। ‘आइतबारसम्म प्रदेश २ अपेक्षित शान्त रहेको छ, सोमबार मतदानका लागि सम्पूर्ण तयारी पूरा भएको छ,’ डिआइजी न्यौपानेले भने।
खुला सिमाना, सशस्त्र समूहका गतिविधि, विप्लव माओवादी तथा सिके राउत समर्थित कार्यकर्ता निर्वाचनको प्रमुख सुरक्षा चुनौती मानिएको छ। दलबीच हुन सक्ने सम्भावित भिडन्त र मतगणनामा हुन सक्ने हुलहुज्जत पनि चुनौतीका रुपमा रहने केन्द्रीय निर्वाचन सुरक्षा समितिले विश्लेषण गरेको छ।
प्रदेश २ मा एक सय ३६ स्थानीय निकायका लागि ३७ हजार बढीको उम्मेदवारी परेको छ। कुल मतदाता २६ लाख ६४ हजार ९ सय ५० ले ३ हजार ५ सय ७८ मतदान केन्द्रमा मतदान गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
