रौतहट- निर्वाचनमा स्वास्थ्य क्षेत्रका सयौं कर्मचारी खटाइएपछि रौतहटमा स्वास्थ्य सेवा प्रभावित बनेको छ।
स्वास्थकर्मीहरु चुनावमा खटिएपछि उपचार नपाएर यहाँ एक बालकको ज्यान गएको छ। उपचारका लागि अस्पताल लगिएका राजदेवी नगरपालिका-४ मुडबलवाका प्रमोद महतोका ३ वर्षीय छोरा शुभमको ज्यान गएको हो।
पुरानो पर्खाल भत्किएर गम्भीर घाइते भएका बालकलाई आफन्तले उपचारको लागि जिल्ला अस्पताल गौर लगेका थिए। उपचार गर्ने स्वास्थ्यकर्मी नहुँदा एक घन्टासम्म अस्पतालमा छटपटिएर बालकको मृत्यु भएको आफन्तले बताएका छन्।
मृतकका बाबु प्रमोद महतोले समयमा नै अस्पताल लैजाँदा पनि डाक्टरको अभावमा छोराको मृत्यु भएको बताए।
विभिन्न मतदान केन्द्रहरुमा अस्पताल, हेल्थपोस्ट, प्राथमिक स्वास्थ्य केन्द्रका २ सय ५० स्वास्थ्यकर्मी खटाइएको छ। जिल्लामा २ वटा अस्पताल, ४ प्राथमिक स्वास्थ्य केन्द्र, ९२ स्वास्थ्य चौकीबाट स्वास्थ्यकर्मी खटाइएको हो।
केही दिनअघि सरुवा भएका जिल्ला जनस्वास्थ्य कार्यालयका प्रमुख नवल किशोर झाले चुनावमा कर्मचारी खटिएपछि स्वास्थ्य सेवा प्रभावित भएको बताएका छन्।
निधारमा सानो घाउ आएर उपचार गराउन आएकी अनुष्का चौधरीले स्वास्थ्यकर्मी नभएपछि फर्कन बाध्य भएको बताइन्।
गर्मीको मौसममा ज्वरो, रुघाखोकी, झाडापखालाका बिरामी बढ्ने समयमा स्वास्थ्यकर्मीहरु नहुँदा निजी क्लिनिकमा जँचाउन र औषधि किन्न बाध्य हुनुपरेको स्थानीयको गुनासो छ। ग्रामीण भेगमा रहेका स्वास्थ्य चौकीहरु बन्द हुँदा सेवाग्रही थप मर्कामा परेका छन्।
स्वास्थ्य जस्तो संवेदनशील क्षेत्रका कर्मचारीलाई निर्वाचनमा नखटाएको भए यस्तो समस्या नआउने मृतक बालकका बाबु प्रमोदले बताए।
अधिकांश स्वास्थ्य संस्थाहरुमा अहेब, असिस्टेन्ट, अनमीहरु नहुँदा पियनहरुबाट सेवा लिनुपर्ने अवस्था छ।
बिहान १० देखि ५ बजेसम्म खुल्ला हुनुपर्ने राजमार्ग आसपासमा रहेका स्वास्थ्य संस्थाहरु एक घन्टा खोलेर बन्द हुने गरेको सेवाग्रहीले गुनासो गर्दै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
