वीरगञ्ज– वीरगञ्ज महानगरपालिकाको मेयर पदका आकांक्षी मुद्दाभन्दा मनी (पैसा), मसस्ल (बाहुबल) र निश्चित समुदायको मतमा निर्भर प्रायः देखिएका छन् । साविकका गाविसमा रहेका जातीय र समुदायको भोट निर्णायक हुने देखिएपछि अहिले उम्मेदवार यस्ता समूहका नेतामार्फत मतदाता प्रभावित गर्ने ध्याउन्नमा देखिए ।
आचारसंहिता उल्लंघन गरेर खर्च गरेको छैन : अजय द्विवेदी
नेपाली कांग्रेसबाट मेयर पदका उम्मेदवार जिल्ला पार्टी सभापति अजय द्विवेदीको एजेन्डामा ‘स्मार्ट सिटी’ रहे पनि उनलाई एजेन्डाले मात्रै निर्वाचनमा जित सम्भव नभएको राम्रो हेक्का छ। पहाडी समुदायको सान्तवना मतका लागि ज्येष्ठ नागरिक शान्ति कार्कीलाई उपमेयर उम्मेदवार बनाउन जोड दिएका उनले आफ्ना विकास योजनासँगै समुदायसँग जोडिएका लोकप्रिय कार्यक्रम समेत घोषणापत्रमा समेटेका छन्।
ट्रम्प निर्वाचन लड्न सक्छन् भने म किन नसक्नु : बसरुद्धिन अन्सारी
अघिल्लो संविधानसभा निर्वाचनमा नेकपा माओवादीका उम्मेदवार बसरुद्दिन अन्सारी अहिले नेकपा एमालेबाट मेयर उम्मेदवार बनेका छन्। सहरको कायापलटको दाबी गर्ने अन्सारीलाई सबैभन्दा ठूलो भर उनकै धार्मिक समुदायको छ। करिब १७ हजारको हाराहारीमा रहेका मुस्लिम मतदाता मात्रै रिझाउन सके निर्वाचन परिणाम आफ्नो पक्षमा आउने उनको आँकलन छ।
यसका लागि अहिले उनले धर्मगुरु र पुराना मुस्लिम नेतालाई आफ्नो पक्षमा बनाउने रणनीति बनाएका छन्। वीरगञ्ज महानगरका सडक र युवा रोजगारलाई मुख्य एजेन्डा बनाएका अन्सारी एमालेको सांगठनिक संरचनाका कारण निर्वाचन आफ्नो पक्षमा हुने अनुमानसहित पार्टी फेरेर चुनावी मैदानमा उत्रिएका हुन्।
मेरो प्रतिस्पर्धा जनताको सोचसँग छ : रहबर अन्सारी
वीरगञ्ज महानगरपालिकाको मेयर पदमा नेकपा माओवादी केन्द्रले उम्मेदवार बनाएका रहबर अन्सारी जति सामाजिक सञ्जालमा लोकप्रिय छन्, स्थलगत रुपमा त्यो लोकप्रियता पाउन परिवेश र प्रविधिको पहुँच बाधक देखिएको छ। अन्य उम्मेदवार भन्दा कान्छा र आर्कषक व्यक्तित्वका धनी रहबरलाई पछिल्लो पुस्ताले पछ्याए पनि वीरगञ्जको सोचमा उनले पकड जमाउन कठिन रहेको बुझ्न सकिन्छ।
राजपाको मुद्दामा जनताको साथ छ : राजेशमान सिंह
मधेस आन्दोलनले स्थापित गरेको मुद्दा संसदसम्म पुर्याएर मतदाताको सहानुभूति पाएको राष्ट्रिय जनता पार्टी (राजपा) नेपालभित्र उम्मेदवार छनोटमा विवाद देखियो। टिकट नपाएपछि पूर्व मेयर विमल श्रीवास्तव रातारात पार्टी छाडेर मधेसी जनअधिकार फोरम लोकतान्त्रिकबाट उम्मेदवार बने। राजपाले महानगरपालिकामा बाहुबली नेता तथा राजपा महासचिव राजेशमान सिंहलाई उम्मेदवार बनाएको छ। वीरगञ्जका युवामाझ लोकप्रिय रहे पनि औसत मतदाताका लागि सिंहले अझै धेरै मिहिनेत गर्नुपर्ने देखिन्छ।
दुवै मधेस आन्दोलनमा अग्रपंक्तिमा देखिएका राजेशमान पछिल्लो नाकाबन्दीपछि थिलथिलो बनेको वीरगञ्जको अर्थतन्त्रका लागि एक जिम्मेवार व्यक्तिका रुपमा चित्रित छन्। यसले करिब ४ हजारको संख्यामा रहेको मारवाडी समुदायको मतमध्ये थोरैमात्र उनको पक्षमा आउन सक्छ।
ठूल्ठूला राजनीतिज्ञ व्यापारी भएका छन् : विजय सरावगी
स्थापित व्यवसायीको परिचय बनाएका विजय सरावगी समेत महानगरको मेयर दौडका बलिया दावेदार देखिएका छन्। योजनावद्ध रुपमा निर्वाचनको तयारीमा अन्य उम्मेदवारभन्दा पहिलादेखि सक्रिय सरावगी वीरगञ्जको पुरानो शान स्थापित गर्न आफू उम्मेदवार बनेको दाबी गर्छन्।
बैकिङ क्षेत्रमा विवादास्पद सरावगीले संघीय समाजवादी फोरमबाट टिकट पाउन नेतालाई आर्थिक प्रलोभनमा पारेको स्थानीय कार्यकर्ताको आरोप छ। यसले सांगठनिक रुपमा पर्सामा बलियो रहे पनि पार्टी कार्यकर्ताकै मत समेत सरावगीको विपक्षमा जानसक्ने अनुमान गरिन्छ। तर पहिलो, दोस्रो दुवै चरणको चुनावमा सहभागी समाजवादी फोरमका उम्मेदवार रहेकाले जिल्ला अध्यक्ष प्रदीप यावदले उनको पक्षमा ६ महिनादेखि माहोल बनाइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
