वीरगञ्ज महानगरपालिकामा नेकपा एमालेको तर्फबाट मेयर पदका प्रत्यासी बनेका काठमाडौं र वीरगञ्ज नेसनल मेडिकल कलेजका सञ्चालक बसरुद्दिन अन्सारीले नेपाल लाइभसँगको विशेष कुराकानीमा आफ्नो जित सुनिश्चत देखेपछि विपक्षीले अनेक लाञ्छना लगाउन थालेको बताए। उनले आफ्नो वीरगञ्ज नेसनल मेडिकल कलेज र काठमाडौं नेसनल मेडिकल कलेजमा दाउदको लगानी प्रमाणित भए कुनै पनि सजाय भोग्न तयार रहेको बताएका हुन्।
उनले आफू एमालेमा प्रवेश गरेसँगै सम्बन्धन, कर छली र दाउदको लगानी जस्ता निराधार आरोप विपक्षीको डिजाइनमा लगाएइको बताए । अन्सारीको दाउदसँग साँठगाँठको खुलासा नेपाल लाइभले गरेको थियो । भारतीय दूतावासले २०६२ भदौ २२ मा परराष्ट्र मन्त्रालयमा पत्र लेख्दै अन्सारी सञ्चालक रहेका मेडिकल कलेजमा दाउदको लगानी रहेकाले छानबिन गर्न आग्रह गरेको थियो।
‘म राष्ट्रवादी मान्छे हुँ, मेयर पदमा मनोनयन दिएयता विरोधीहरु तर्सिएर विभिन्न आरोप लगाएका छन्,’ कुराकानीमा उनले भनेका छन् । वीरगञ्जमा नेपाल लाइभका लागि रुपेश श्रेष्ठले अन्सारीसँग गरेको कुरकानी:
तपाईं अर्कै पेशाको मान्छे कसरी राजनीतिमा आउनुभयो ?
- अमेरिकी राष्ट्रपति ट्रम्प पनि अर्कै क्षेत्रबाट आएका हुन नि । ट्रम्प निर्वाचन लड्न सक्छन् भने म किन नसक्नु ! वीरगञ्जका नेताहरुले यहाँको परिस्थिति जुन निर्माण गरे, वीरगञ्जलाई राजनीति गर्ने र बन्द-हडताल गर्ने अखडा बनाए, त्यो सबै तोड्नका लागि मेरो उम्मेदवारी हो।
पहिले कांग्रेसको शुभचिन्तक हुनुहुन्थ्यो, माओवादीमा आउनुभयो । अहिले एमालेबाट निर्वाचन लड्दै हुनुहुन्छ । किन ?
- मान्छे जित्नका लागि लड्ने हो । जहाँबाट जित सुनिश्चित हुन्छ, त्यहीँबाट लड्ने हो । समय र परिस्थितिले मान्छेलाई परिवर्तन गर्छ । मैले धेरै अध्ययन गरेपछि मात्र एमालेमा प्रवेश गरेको हुँ । एमाले ‘क्याडरवेस’ पार्टी हो । यहाँका कार्यकर्ता (पार्टीको नीतिप्रति) अडिग हुन्छन् । देशप्रेमी पार्टी भनेको नै एमाले हो । कसैसँग झुकेको छैन, झुक्नेवाला पनि छैन । मलाई पूर्ण विश्वास छ । म पनि राष्ट्रवादी मान्छे हुँ । मेरो जन्मभूमि, कर्मभूमि सबै यहीँ हो, त्यसैले यसका लागि शहीद हुन तयार छु।
तपाईं विवादित मान्छे । नेसनल मेडिकल कलेजको विषयमा विवाद छ नि ?
- मेरो विषयमा अनगिन्ती कुरा हुन्छ । मलाई दुःख लाग्छ । म एउटा नेपाली भएर व्यापार गर्न पाउने कि नपाउने ? नेसनल कलेज सम्बन्धनको विषयमा जुन कुरा उठिरहेको छ, म भन्न चाहन्छु– मलाई सम्बन्धन कसले दियो ? सरकारले दियो । अस्पताल बनाउन कसले भन्यो ? नेपाल सरकारले । मेरो आफ्नो पैसा लगानी भइसकेपछि के मैले व्यपार गर्न पाउँदिनँ त ? सर्वोच्च अदालतले मान्यता दिएको कुरालाई प्रधानमन्त्री जस्तो मान्छेले सम्बन्धन काट्नुपर्छ भन्दा दुःख लाग्छ।
कुनै पनि मेडिकल कलेजले राष्ट्रप्रति वफादार भएर काम गर्दैन भने त्यसलाई बन्द गरे हुन्छ । त्यसमा म सहमत छु । प्राइभेट मेडिकल कलेजहरुले ८६ अर्ब रुपैयाँ लगानी गरेका छन् । यी मेडिकल कलेजहरुले गर्दा विदेश जाने पैसा रोकिएको छ । नेपालमा रोजगारी पनि सिर्जना गरेको छ । यो कुरा पनि हेर्नुपर्छ। वीरगञ्जमा हामी वार्षिक १४ करोड रुपैयाँ ट्याक्स तिर्छौं । २४ सयलाई प्रत्यक्ष रोजगारी दिएका छौं।
तपाईं संलग्न रहेको मेडिकल कलेजमा दाउदको लगानी भन्ने पनि आयो नि ?
- केही कुरा पाएन भने मान्छेले जे पनि भन्छ । म च्यालेन्ज गर्छु, आज कसैले प्रमाणित गरिदेओस्, सरकारले बन्द गर्नुपर्दैन, म आफैं बन्द गर्छु । यसअघि पनि म निर्वाचनमा उठेको थिएँ । १७ वर्षदेखि राजनीतिमा छु । यस अगाडि कुनै कुरा आएन, अहिले आइरहेको छ ।
भनेपछि तपाईं एमालेमा प्रवेश गरेपछि यो बखेडा भएको हो ?
- शतप्रतिशत । पहिले मधेसमा एमाले बढारिसकेका छौं भन्थे, लखेटिसकेका छौं भन्थे । उम्मेदवार दर्ताको दिन एमालेको शक्ति देखेपछि आत्तिएका छन् । अहिले पर्सा जिल्ला नै एमालेमय भयो भनेर भनिरहेका छन् । मलाई आरोप लगाउनु भनेको पराजित मानसिकताको उपज हो । अरु केही होइन।
मेयरको उम्मेदवारको रुपमा तपाईंका योजना के छन् ?
- मैले मेयर जितेपछि पहिलो प्राथमिकतामा बाटोघाटो निर्माणलाई राखेको छु । यहाँ बाटो चौडा पार्ने होइन, बाटो नै छैन । पहिले बाटो बनाउनुपर्ने आवश्यकता छ । बाटो भनिएको ठाउँमा ३–४ फिट खाल्टो छ । दोस्रो प्राथमिकतामा नाला छ । नाला व्यवस्थित गर्न सकिएन भने जति नै सडक बनाए पनि त्यो खराब हुन्छ । तेस्रोमा फोहोर छ । रक्सौलबाट आउँदा बोर्डरमै नाक थुन्नुपर्ने अवस्था छ । अरु धेरै छन्।
यतिको लागि कति समय लाग्छ ?
- मसँग पहिले नै डिपिआर (योजना) तयार छ । एक वर्षमा जनताले महसुस गर्ने काम गरेर देखाउँछु।
तपाईंको अरु योजना के–के छन् ?
- वीरगञ्ज स्वास्थ्य र शिक्षाको लागि ठूलो ‘हब’ हो । यसले तराईका पाँच वटा जिल्ला ओगटेको छ । भारत विहारको पूर्वी र पश्चिम चम्पारनलाई जोड्दा लगभग तीन–साढे तीन करोड जनसंख्या यो क्षेत्रमा बसोबास गर्छन् । यहाँ पर्यटनको पनि ठूलो सम्भावना छ । मेडिकल टुरिजम प्रमाणित भइसकेको छ । गढीमाईको कुरा गर्ने हो भने गिनिज बुक अफ वर्ल्ड रेकर्डमा दर्ता भइसकेको छ।
यो निर्वाचनमा आफ्नो प्रतिद्वन्दी कसलाई मान्नुभएको छ ?
- मैले यो चुनावमा आफ्नो प्रतिद्वन्दी कसैलाई मानेको छैन । बरु अरु सबै पार्टीले मलाई उनीहरुको प्रतिस्पर्धी मानेका छन् । हामीले उम्मेदवारीको दिनमै देखाइसक्यौं, हाम्रो ताकत कति छ भनेर! निर्वाचनमा मैले पैसा खर्चिएको छैन । यदि कसैले पैसा खर्च गरेर जित्छु भन्छ भने त्यो दिवास्वप्न मात्र हुनेछ।
हेर्नुहोस् बसरुद्धिन अन्सारीसँगको भिडियो वार्ता:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
