वीरगञ्ज महानगरमा नेपाली कांग्रेसका तर्फबाट मेयरको उम्मेदवार हुन् अजय द्विवेदी । पहिलो संविधानसभा सदस्य उनी दोस्रो संविधानसभा निर्वाचनमा पर्सा–२ बाट पराजित भएका थिए । कांग्रेस वृत्तमा उनको नाम प्रदेशसभामा सांसद उम्मेदवार बनाउने र जित हासिल गरेमा मुख्यमन्त्रीका सम्भावित उम्मेदवारको रुपमा चर्चा थियो । तर, उनी महानगरपालिकाको मेयरमा उठे ।
प्रदेशको सम्भावित मुख्यमन्त्रीका रुपमा चर्चा गरिएका द्विवेदी मेयरमा किन खुम्चिए ? वीरगञ्जको विकासका लागि उनीसँग के–के एजेण्डा छन् ? नेपाल लाइभका लागि रुपेश श्रेष्ठले उनीसँग कुराकानी गरेका छन्।
चुनावको तयारी कस्तो चल्दै छ?
- चुनावको गतिविधिमा व्यस्त छु । दौडादौड छ। जनताको बीचमा राजनीतिककर्मीको रुपमा जाँदा मैले जनतालाई पाठशाला ठानेको छु । धेरै कुरा जनताबाट सिक्ने अवसर पाइरहेको छु।
तपाईंको उम्मेदवारी प्रदेशसभामा हुने र मुख्यमन्त्रीमा पनि उठाउने चर्चा थियो, महानगरमै अघि सर्नुको कारण के हो?
- पार्टीले मेरो आवश्यकता यहाँ देख्यो । स्थानीय तहबाटै कार्यकर्ताहरुको दबावपछि केन्द्रीय नेताहरुले महागनरमा मलाई नै उठाउने निर्णय गर्नुभयो । पार्टीको कार्यकर्ता भएको हिसाबले मैले मलाई महानगरमा उम्मेदवार बनाउने केन्द्रको निर्णय काट्न सकिनँ । म संसदमा पनि थिएँ, संसद जनताका समस्या उठाउने नियम-कानुन बनाउने कुरामा बढी केन्द्रित हुन्छ । प्रदेशसभामा के हुन्छ, त्यो अनिश्चित छ । तर, एउटा निश्चित कुरो के छ भने म उपमेयर पनि भएको हुँ, सांसद पनि भएको हुँ । दुवै अनुभव भएकाले महानगरका लागि अझ उपयुक्त उम्मेदवार हुँ भन्ठानेर मेयरमा उठ्न तयार भएँ । वीरगञ्जको विकासका लागि मेरो अनुभव र ऊर्जा दुवैको प्रयोग गर्छु।
पहिलेको भन्दा वीरगञ्जको परिस्थिति अहिले फरक छ । दोस्रो संविधानसभाको निर्वाचनमा पराजित तपाईं महानगरमा के कारणले जित्छु जस्तो लाग्छ ?
- हामी ‘मिसन पोलिटिक्स'मा विश्वास गर्छौं । नतिजा के आउँछ, त्यसको प्रवाह हुँदैन । मेरो हारको कारण रुपैयाँ हो । मैले १० लाख बढी खर्च गर्ने आँट गरेको भए त्यतिबेलै चुनाव जित्थेँ । चुनावको बेला पैसा दिनुपर्ने थुप्रै ठाउँ थिएँ, तर म त्यहाँ गइनँ । पैसा बाँडेर चुनाव जित्ने पक्षमा म छैन । हामी बेथितिको राजनीति होइन, परिवर्तनको लागि राजनीति गर्छौं । अहिले हामी जस्तो मान्छे राजनीतिमा टिक्ने कि नटिक्ने गम्भीर प्रश्न छ । तर, परिवर्तनको राजनीतिमा म दृढ छु । मिसनको राजनीतिमा लागेको व्यक्तिलाई नतिजाको चिन्ता हुँदैन । मलाई आत्मविश्वास छ, मेरो पार्टी संगठन आम जनताको भरोसा र निष्ठाको राजनीति हार्दैन, जित्छ।
स्थानीय तहमा जनताका धेरै अपेक्षा हुन्छन् । तपाईंसँग के मुद्दा छ, जसले तपाईंलाई जिताउँछ ?
- जनतामा अजय द्विवेदीले काम गर्छ भन्ने भरोसा छ । म पहिलो संविधानसभा सदस्यमा निर्वाचित भएका बेला कांग्रेसको सरकार थिएन । मैले त्यसबेला जति स्वास्थ्यचौकी बनाएँ, वीरगञ्जमा अहिले त्यो भन्दा बढी संख्यामा स्वास्थ्य चौकी छैन । मैले जति पुल बनाएँ, त्यसमा एक दुई थप भए होलान् । त्यो भन्दा बनेको छैन।
मैले सांसद विकास कोषको १० लाख रुपैयाँबाट जति बाटो निर्माण गरेँ, त्यसपछि त्योभन्दा बढी केही काम हुन सकेन । यसले गर्दा जनताले म काम गर्न सक्ने मान्छे हो भन्ने भरोसा गरेका छन् । वीरगञ्जको इतिहासमा पहिलो चोटि किसान र कृषि बजेट यसपाली आउँछ । साविक वीरगञ्जको क्षेत्रभन्दा तेब्बर क्षेत्र अहिले थपिएको छ । त्यसको विकास मेरो पहिलो प्राथमिकता हो । मैले भनेको छु- थपिएका क्षेत्रहरुमा सहरी पूर्वाधार विकास गर्ने, कृषि क्षेत्रको विकास गर्ने । साविकको सहरी इलाका पनि भद्रगोल छ । एउटा मुख्य सडक बाहेक कुनै बाटो पनि ठीक छैन । बाटो बनाउनुपर्नेछ । अब ६ लेनको बाटो बन्दै छ, भन्सार सर्दै छ, सुख्खा बन्दरगाह बन्दै छ । वीरगञ्ज अब पश्चिमतर्फ बढी व्यस्त हुन्छ । पश्चिमतर्फबाट कति वटा बाटोले सबै क्षेत्रलाई जोड्ने यी विषयमा मैले उठाएका एजेन्डाका कारण जनताले मलाई भरोसा गरेका छन्।
ती एजेण्डा कार्यान्वयन चाहिँ कसरी हुन्छ?
- म आफैं पश्चिमी क्षेत्रको बासिन्दा भएको हुनाले गल्ली–गल्ली थाहा छ । समस्याबारे म जानकार छु । समाधान पनि मलाई थाहा छ । ठाकुरराम क्याम्पसको पछाडिको बाटो सुख्खा बन्दरगाहसँग जोड्ने बित्तिकै वीरगञ्ज छिर्ने सबैभन्दा छोटो बाटो त्यो हुनेछ । यस्तै, सुख्खा बन्दरगाहको गेटबाटै सीधा मालपोत निस्कने बाटो छ । त्यो बाटो चौडा गर्ने बित्तिकै जाम कम हुन्छ । यस्तै, रानीघाटको बाटो बबनाघाटसँग जोड्नका लागि पुल तयार हुने अवस्थामा छ । यसका लागि म लागिपरेको छु।
वीरगञ्ज राष्ट्रकै महत्वपूर्ण आर्थिक क्षेत्र पनि हो । यहाँ रहेका उद्योगको विकास गर्न तपाईंको के योजना छ ?
- महानगरपालिले चाहेर मात्रै उद्योगको विकास हुने होइन । महागरपालिकाले औद्योगिक विकासका लागि रचनात्मक सहयोग गर्ने हो । उद्योग व्यापार फस्टाउने पहिलो आधार भनेको सुरक्षा हो । सुरक्षा भएन भने यहाँ कोही बस्न सक्दैन । असुरक्षाका कारण यहाँका उद्योगी-व्यवसायी पलायन भएका छन् । हडताल आन्दोलनको अवस्था सिर्जना हुन नदिन, श्रमिक संगठन राजनीतिक संगठनसँग उद्योगको सुमधुर सम्बन्ध कायम गर्न महानगरपालिकाको राजनीतिक संयन्त्रले समन्वयात्मक भूमिका निर्वाह गर्छ । मलाई सबैले विश्वास गर्ने भएकाले सबै राजनीतिक दलहरुका संगठनबाट समेत मैले सहयोग पाउने अपेक्षा गर्छु।
उपमेयमरमा तपाईंले वृद्ध उम्मेदवारलाई अघि सार्नुभयो । युवालाई स्थान दिन नचाहेको हो?
- पर्साको राजनीतिको कुरा गर्ने हो भने नयाँ पुस्ताको राजनीतिमा वर्चश्व छ । त्यसमा अजय द्विवेदीको पनि भूमिका छ । मेरो मात्रै भूमिकाले होइन, उहाँहरुको योग्यताका कारण पनि युवाको राजनीतिमा वर्चश्व कायम भएको हो । यसपाली नैतिक प्रश्न पनि आयो हाम्रो अगाडि । पर्साको राजनीतिमा शान्ति कार्की जस्तो हैसियत भएको व्यक्ति अरु छैन । पर्साको राजनीतिका लागि उहाँले जस्तो लगानी अरु कसैले गरेको छैन । उहाँले उपमेयरमा जित्नुभयो भने त्यो पदको गरिमा बढ्छ।
पदको गरिमा बढाउनेभन्दा महत्वपूर्ण काम गर्ने कुरा होला नि त !
- शान्ति कार्कीले काम पनि गर्नुहुन्छ । उहाँमा यति ऊर्जा र स्फूर्ति छ । उहाँ ८० वर्षको युवा हुनुहुन्छ।
महानगरपालिकाको मेयर हुनु चानचुने कुरा होइन चानचुने हिसाबले पनि पुग्दैन यो पटक तपाईंको खर्च कति छ?
- चुनावी प्रतिस्पर्धामा भएपछि अलिअलि खर्च त हुन्छ । तर, आचारसंहिताको उल्लंघन गरेर मैले खर्च गरेको छैन । अहिलेसम्म मेरो दुई लाख जति खर्च भयो होला।
दुई लाख मात्रै?
- कोही पत्याउँदैन, तर त्यति पनि भएको छैन । मेरो हिसाब-किताब पारदर्शी रुपमा सार्वजनिक गर्छु।
महानगरको मेयर भएमा तपाईंको प्राथमिकताका काम के हुनेछन्?
- म कागजी महानगरलाई महानगर बनाउँछु । पुरानो क्षेत्रको सुधार र नयाँ निर्माण गर्छु । महानगरको पुरानो संयन्त्रबाट त्यो सम्भव छैन । अहिलेको कर प्रणालीले पनि जनताको आशा अनुसारको काम गर्न सक्दैन । महानगरको काम गर्ने प्रणालीलाई आमूल परिवर्तन गर्छौं।
विज्ञ सम्मिलित स्थानीय योजना आयोग महानगरले बनाउँछ । राजनीतिज्ञ सबै विषयको ज्ञाता होइन, अलग-अलग विषयका ज्ञातालाई अलग-अलग जिम्मेवारी दिन्छौं । उहाँहरुले महानगरको योजनामा काम गर्नुहुन्छ र मेरो कामको निगरानी पनि गर्नुहुन्छ । दक्ष व्यावसायिक मान्छेहरुको साथ, सहयोग र समर्थन लिएर म मेरो मिसन पूरा गर्छु । वीरगञ्जलाई सूचना-प्रविधिको केन्द्रका रुपमा विकास गर्छु । यो एजेण्डा अघि सार्दा मान्छेले मलाई पत्याएका छैनन्, तर म गरेर देखाउँछु।
हेर्नुहोस् अजय द्विवेदीसँगको भिडियो वार्ता:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
