काठमाडौं- राजनीतिक दलहरुले आचारसंहिताको पूर्ण पालना नगर्दा निर्वाचन आयोग स्पष्टीकरण सोध्दैमा हैरान भएको छ।
आयोगले निर्वाचन आचारसंहिता पालनाका लागि प्रधानमन्त्री शेरबहादुर देउवालाई ध्यानाकर्षण गराएको छ भने सरकारका उपप्रधानमन्त्री र मन्त्रीहरुलाई स्पष्टीकरण सोधिसकेको छ।
नेपाल लोकतान्त्रिक फोरमका पार्टी अध्यक्ष एवं उपप्रधानमन्त्री विजयकुमार गच्छदार, गृहमन्त्री जनार्दन शर्मा सहित केही राज्यमन्त्रीले आचारसंहिता मिचेको उजुरी आयोगमा परेको थियो।
यस्तै, तटस्थ भूमिकामा बस्नुपर्ने उपसभामुख समेत पार्टीको चुनावी कार्यक्रममा केन्द्रित भएपछि आयोगले उपसभामुखलाई समेत स्पष्टीकरण सोधिसकेको छ।
आयोगले बारम्बार निर्वाचन आचारसंहिताको पूर्ण पालना गर्न मन्त्री सहित अन्य राजनीतिक दललाई आग्रह गरे पनि आचारसंहिता मिच्ने क्रम बढ्दो छ।
एक साताको अवधिमा निर्वाचन आयोगमा आचारसंहिता उल्लंघनका ३ सय ५० उजुरी परेका छन्। तीमध्ये २९ उजुरीमाथि आयोगले कारबाही अघि बढाएको छ।
'हामीले दलहरुलाई आचारसंहिता उल्लंघन नगर्न ध्यानाकर्षण गराए पनि पालना भएको पाइँदैन, स्पष्टीकरण सोध्दासोध्दा आयोग हैरान भइसक्यो,' आयोगका प्रवक्ता नवराज ढकालले भने, 'आचारसंहितको पूर्ण पालना गर्न आयोग सबैलाई आग्रह गर्छ।'
आयोगले ध्यानाकर्षण गराए पनि आचारसंहिता विपरीतका गतिविधि सरकार स्वयंबाट भइरहेको छ।
निर्वाचन आयोगले प्रधानमन्त्री देउवालाई आचारसंहिताविपरीत मन्त्रिपरिषद् विस्तार नगर्न भने पनि प्रधानमन्त्रीले सार्वजनिक रुपमै 'केही दिनभित्रै मन्त्रिपरिषद् विस्तार हुने' अभिव्यक्ति दिँदै हिँडेका छन्। 'बाध्यतावश सरकार विस्तार भएको हो, अब केही दिनमै अरु सदस्य थप हुन्छ,' प्रधानमन्त्री देउवाले विराटनगरमा मंगलबार भनेका थिए।
उपप्रधानमन्त्री गच्छदार पनि सरकारी गाडीमै चुनावी प्रचारमा सक्रिय छन्।
निर्वाचन आयोगले प्रचारप्रसारमा टिसर्ट, तुल, ब्यानर, फ्लेक्स प्रयोग नगर्न भनेको थियो। तर दलहरुले त्यसलाई बेवास्ता गर्दै अत्यधिक प्रयोग गरेपछि नष्ट गर्न आयोग आफै सक्रिय बनेको छ। निर्वाचन आयोगले बारामा ३ हजार थान तुल, ब्यानर, फ्लेक्स र पर्चा जफत गरी नष्ट गरेको छ।
बारामा अनुगमनका लागि खटिएको सहसचिव गजेन्द्र ठाकुरको टोलीले सो परिमाणमा तुल ब्यानर नष्ट गरेको हो।
यो पनि पढ्नुस् : निर्वाचन आयोग सक्रिय बनोस् (विशेष सम्पादकीय)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
