काठमाडौं– विश्व चर्चित आइफोन निर्माता कम्पनी ‘एप्पल इन्कर्पोरेसन’ले अमेरिकाको स्थानीय समयअनुसार मंगलबार बिहान १० बजे आफ्नो चर्चित ब्रान्ड आइफोनको बहुप्रतिक्षित आठौं संस्करण सार्वजनिक गर्दैछ।
समारोहमा ‘एलटिई’ सहित ‘एप्पल वाच’, ‘फोरके एचडिआर एप्पल टिभी’ र ‘एयरपड’ पनि सार्वजनिक हुने अनुमान गरिएको छ।
एप्पलले क्यालिफोर्नियाको कपर्टिनोस्थित एप्पल पार्क क्याम्पस परिसरमा निर्मित स्टिभ जब्स अडिटोरियममा सार्वजनिक गर्न लागेको हो। यसअघि एप्पलले आफ्ना सबै प्रोडक्ट सान फ्रान्सिस्कोस्थित बिल ग्राहम अडिटोरियम र इन्फाइनिटी लुप क्याम्पसमा सार्वजनिक गर्दै आइरहेको थियो।
आइफोन प्रेमी वा एप्पल ‘एफिसियान्डो’ हरूका लागि सार्वजनिक गर्न लागिएको आइफोन–८ भन्दा पनि लञ्ज गर्न लागिएको स्टिभ जब्स अडिटोरियम अहिले आकर्षणको केन्द्रविन्दु बनेको छ। आइफोनप्रति आशक्त युवाहरू आइफोनको नयाँ संस्करण किन्न वा बुक गर्न दुई÷तीन दिनसम्म लाइनमा उभिने गर्थे।
तर अहिले तिनै आइफोन क्रेजीहरू नयाँ फोनभन्दा सार्वजनिक गरिने अडिटोरियमप्रति बढि उत्सुक देखिएका छन्।
एप्पलका संस्थापक जब्सको सम्झनामा निमार्ण गरिएको अडिटोरियममा जम्मा हजार सिटमात्र छ। आजको सार्वजनिक समारोहमा उपस्थित हुने व्यक्तिले एउटा टिकटका लागि १४ हजार अमेरिकी डलर तिरेका छन्। ‘स्टेट अफ दि आर्ट’ मानिएको अडिटोरियम जमिनमुनि तयार पारिएको छ।
अडिटोरियम क्याम्पस हातादेखि दक्षिणपूर्वस्थित डाँडामा १ सय ७५ एकडमा फैलिएको छ। अडिटोरियमभित्र उत्पादन प्रदर्शन गर्न विशेष ‘हिडेन’ कक्ष बनाइएको छ। अत्याधुनिक अडिटोरियमप्रति यति धेरै उत्सुकता उत्पन्न भएको छ कि विभिन्न सञ्चारमाध्यमका पत्रकारसमेत अडिटोरियम हेर्न लालायित भएका छन्।
एप्पलका प्रमुख कार्यकारी अधिकृत टिम कुकले कम्पनीलाई सफलताको शिखरमा पुर्याएकाले जब्सको सम्झनामा डाँडामा अडिटोरियम बनाइएको बताए। जब्सको सन् २०११ मा क्यान्सरका कारण ५६ वर्षको उमेरमा निधन भएको थियो।
एप्पलले आइफोनका तीन संस्करण आइफोन ८, आइफोन ८ प्लस र आइफोन एक्स एकैसाथ सार्वजनिक गर्दैछ। एप्पलले ठूलो आकारको आइफोन एक्स आफ्नो दसौं वार्षिकोत्सवका अवसरमा निकाल्न लागेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779363027.jpg)
-1764146706.png)
