भक्तपुर- २०७२ को भूकम्पमा घर भत्किएर पुनःनिर्माणका क्रममा रहेका लाभग्राहीलाई सरकारले भक्तपुरबाट अनुदानको काठ उपलब्ध गराउन सुरु गरेको छ।
डिभिजन वन कार्यालय भक्तपुरले बुधबार काठ वितरणस्थल भक्तपुर सूर्यविनायक नगरपालिका– ७ जगातेस्थित चाइनिज इँटा तथा टायल कारखानामा सञ्चालन गरेको काठ वितरण डिपोको उद्घाटन गरेको छ। उद्घाटन कार्यक्रममा प्रतिनिधिसभाका सदस्य एवं पूर्वउद्योगमन्त्री महेश बस्नेतले भूकम्प पीडित एवं लाभग्राही भक्तपुर नगरपालिका–५ का कृष्णमाया चिकंबन्जारलाई काठ प्रदान गर्दै काठ वितरणको शुभारम्भ गरे।
कार्यक्रममा उनले भक्तपुरका भूकम्पपीडितलाई काठ लिन अब ललितपुरको बालकुमारीमा धाउनु नपर्ने बताउँदै यहाँबाट सुरु भएको काठ वितरणले लाभग्राहीलाई निकै राहत मिलेको बताए।
बस्नेतले सूर्यविनायकमा रु ५ अर्बको लागतमा आगामी पाँच वर्षमा निर्माण सम्पन्न गर्ने गरी सुरु भएको राष्ट्रिय प्राणी उद्यानलाई तीन वर्षमै सम्पन्न गर्ने गरी काम अगाडि बढाएको बताउँदै यस वर्ष सरकारले रु ८३ करोड बजेट दिन लागेको बताए।
कार्यक्रममा डिभिजनल वन अधिकृत फणिन्द्र पोखरेलले लाभग्राहीलाई विगतमा ५० क्युफिट काठ उपलब्ध गराए पनि काठ उत्पादन कम भएकोप्रति लाभग्राही २५ क्युफिट मात्रै काठ उपलब्ध गराएको बताए। उनका अनुसार बाहिर प्रति क्युफिट रु पाँच हजार ८०० पर्ने काठलाई सरकारले भूकम्प लाभग्राहीका लागि भने रु दुई हजार ७०० मा वितरण गरिरहेको छ।
भक्तपुरका ५३६ लाभग्राहीले ललितपुरको बालकुमारीबाट ३६ हजार क्युफिट काठ लिएको र काठ माग गर्दै आवेदन दिनेमध्ये बाँकी एक हजार ८१६ लाभग्राहीलाई भक्तपुरबाटै काठ वितरण गरिनेछ। भक्तपुरमा ६०५ क्युफिट काठ आएको जानकारी दिँदै पोखरेलले तत्काल एक लाख क्युफिट काठ माग भएको र सबै लाभग्राहीले काठ माग गरेमा दुई लाख ६० हजार क्युफिट काठ आवश्यक रहने जानकारी दिए।रासस
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।