काठमाडौं - एनसेलले नेपाल एसोसिएसन अफ ट्राभल अपरेटर्स (नाटो)सँग नेपाल भ्रमणमा आउने अन्तर्राष्ट्रिय पर्यटकका लागि मोबाइल कनेक्टिभिटी सहज बनाउने उद्देश्यले रणनीतिक सहकार्य गरेको छ।
यससम्बन्धी समझदारीपत्र (एमओयू) एनसेलका प्रमुख कन्ज्युमर बिजनेस अधिकृत उपाङ्ग दत्त र नाटोका अध्यक्ष विश्वेश श्रेष्ठले बिहीबार नेपाल पर्यटन बोर्डमा आयोजित कार्यक्रममा हस्ताक्षर गरेका हुन्।
सहकार्यअन्तर्गत नेपालका विभिन्न स्थानमा भ्रमण गर्ने पर्यटकलाई परिवार तथा साथीभाइसँग सहज रूपमा सम्पर्कमा रहन आवश्यक मोबाइल कनेक्टिभिटी उपलब्ध गराइनेछ। नाटोले आफ्नो विस्तृत ट्राभल अपरेटर सञ्जालमार्फत अन्तर्राष्ट्रिय पर्यटकलाई एनसेलका कनेक्टिभिटी सेवाबारे जानकारी गराउन सहयोग गर्नेछ।
कार्यक्रममा एनसेलका प्रमुख कन्ज्युमर बिजनेस अधिकृत दत्तले एनसेलको देशव्यापी सञ्जाल र नाटोको पर्यटन क्षेत्रको पहुँचलाई उपयोग गर्दै नेपाल भ्रमणको अनुभवमा भरपर्दो कनेक्टिभिटीलाई सहज रूपमा जोड्ने उद्देश्य रहेको बताए।
उनले सहकार्यले एनसेलको #NepalCalling अभियानलाई प्रवर्द्धन गर्नसमेत सहयोग पुग्ने र नेपाललाई प्रमुख पर्यटकीय गन्तव्यका रूपमा थप स्थापित गर्न भूमिका खेल्ने बताए।
नाटोका अध्यक्ष श्रेष्ठले पर्यटन भनेकै मानिस, संस्कृति र अनुभवबीचको सम्बन्ध स्थापित गर्ने क्षेत्र भएकाले पर्यटकलाई नेपाल भ्रमण अवधिभर सम्पर्कमा रहन सहज हुने गरी एनसेलसँग सहकार्य गर्न पाउँदा खुसी लागेको बताए।
राजमार्गमा खानेपानी तथा सरसफाइ पूर्वाधार कनेक्टिभिटीबाहेक एनसेलले आफ्नो कर्पोरेट सामाजिक उत्तरदायित्व (सीएसआर) कार्यक्रमअन्तर्गत एनसेल फाउन्डेसनमार्फत प्रमुख राजमार्गमा आधुनिक खानेपानी, सरसफाइ तथा स्वच्छता (वास) पूर्वाधार निर्माणमा नाटोलाई सहयोग गर्ने भएको छ।
यसअन्तर्गत पहिलो चरणमा धादिङको गजुरीमा नमुना परियोजना सञ्चालन गरिनेछ।
प्रमुख राजमार्ग हुँदै यात्रा गर्ने पर्यटक तथा स्थानीय समुदायका लागि पर्याप्त सरसफाइ सुविधाको आवश्यकता बढ्दै गएकाले यस्तो पूर्वाधार निर्माण गर्न लागिएको एनसेलले जनाएको छ।
यो पहलले नेपालमा दिगो तथा जिम्मेवार पर्यटन विकासप्रति दुवै संस्थाको साझा प्रतिबद्धतालाई समेत अघि बढाउने अपेक्षा गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
