एजेन्सी – प्यालेस्टिनी लडाकु समूह हमासले आज चार जना बन्धकको शव बुझाउने भएको छ भने शनिबार ६ जना बन्धक इजरायललाई हस्तान्तरण गर्ने बताइएको छ । हमासका गाजा प्रमुख तथा मुख्य वार्ताकार खलिल अल हय्याले यस कुराको घोषणा गगरेका हुन् ।
हस्तान्तरण गरिने चार शवमध्ये तीन जना एकै परिवार अर्थात ‘बिबास फ्यामिली’का रहेका छन् । ती तीन जनामा श्रीमती शिरी बिबास र उनका दुई छोरा केफिर बिबास र एरिएल बिबासको शव रहेको बताइएको छ ।
२०२३ अक्टोबर ७ को आक्रमणका क्रममा हमासले बन्धक बनाउँदा केफिरको उमेर जम्मा ९ महिना र एरियलको उमेर चार वर्ष रहेको थियो । केफिर हमासले अपहरण गरेका सबैभन्दा कलिलो उमेरका बन्धक हुन् । यी तिनै जना इजरायली सेनाले गरेको बमबारीमा २०२३ को नोभेम्बरमै मारिएको आरोप हमासले लगाउँदै आएको छ ।
यी बालकका पिता तथा शिरीका श्रीमान यार्डेन बिबासलाई पनि हमासले बन्धक बनाएकोमा उनलाई यसै महिनाको सुरूमा मुक्त गरेको थियो । यार्डेनलाई हमासले परिवारसँगै नभई बेग्लै स्थानबाट आफ्नो नियन्त्रणमा लिएको थियो ।
यस्तै हमासले शनिबार पूर्व निर्धारितभन्दा दोब्बर अर्थात ६ जना बन्धक रिहा गर्ने घोषणा गरेको छ । हमासले शनिबार रिहा गर्ने ६ बन्धकमध्ये दुई जना भने २०१४ र २०१५ मा गाजाभित्र प्रवेश गरेपछि हमासले बन्धक बनाएका इजरायली नागरिक रहेको जनाइएको छ । अन्य चार जना भने २०२३ को अक्टोबर आक्रमणका क्रममा बन्धक बनाइएका इजरायली नागरिक रहेका छन् ।
इजरायल सरकारले पनि शनिबार रिहा हुने भनिएका बन्धकको नाम पुष्टि गरेको छ । इजरायलले चलायमान घर ‘मोबाइल होम’ र निर्माण उपकरण गाजाभित्र प्रवेश गर्न दिने सहमति जनाएपछि हमासले निर्धारितभन्दा दोब्बर जीवित बन्धक रिहा र चार मृत बन्धकको शव हस्तान्तरण गर्न सहमति जनाएको बताइएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
