सहकारी ठगी प्रकरण : जीबी राईसहित ३ जनाविरुद्ध जारी भएको डिफ्यूजनलाई रेड नोटिसमा कन्भर्ट गर्न पत्राचार

सुरक्षा/अपराध

नेपाल लाइभ आइतबार, माघ १४, २०८० २०:२२

काठमाडौं– सहकारी ठगी प्रकरणमा जोडिएपछि पोखराको सूर्यदर्शन बचत तथा ऋण सहकारी संस्थाका अध्यक्ष जीबी राईसहित पूर्व अध्यक्ष भूपेन्द्र राई र थानबहादुर बुढामगरविरुद्ध जारी भएको डिफ्यूजन नोटिसलाई रेड नोटिसमा कन्भर्ट गर्न पत्राचार गरिएको छ।

आइतबार जिल्ला प्रहरी कार्यालय कास्कीले प्रहरी प्रधान कार्यालयलाई पत्राचार गर्दै डिफ्यूजन नोटिसलाई रेड नोटिसमा कन्भर्ट गर्न अनुरोध गरेको हो। कास्की प्रहरीको उक्त पत्रपछि प्रहरी प्रधान कार्यालयको एनसीबीले इन्टरपोल महासचिवालयमा पत्राचार गर्नेछ। त्यसपछि उनीहरुविरुद्ध रेड नोटिस जारी हुनेछ।

आइतबार पूर्वअध्यक्ष भूपेन्द्र र थानबहादुरविरुद्ध डिफ्युजन नोटिस जारी भएको थियो। यसअघि शुक्रबार सूर्यदर्शन सहकारीका अध्यक्ष जीबी (गितेन्द्रबाबु) राई विरुद्ध डिफ्युजन नोटिस जारी भएको थियो।

सहकारी ठगी प्रकरण : जीबी राई विरुद्ध डिफ्युजन नोटिस जारी

जिल्ला प्रहरी कार्यालय कास्कीले जीबी राईसहित भूपेन्द्र, थानबहादुर र शिवबहादुर गुरुङ (महेन्द्र भोटे)विरुद्ध डिफ्यूजन नोटिस जारी गर्नका लागि भन्दै प्रहरी प्रधान कार्यालय नक्साललाई गत पुस ५ गते पत्राचार गरेको थियो।

कास्की प्रहरीको उक्त पत्रपश्चात इन्टरपोलको नेपाल शाखा नेशनल सेन्ट्रल ब्युरो (एनसीबी) काठमाडौंले प्रहरीको अन्तर्राष्ट्रिय संगठन इन्टरपोलमा पत्राचार गरेको थियो।

एनसीबी काठमाडौंको अनुरोधपछि उनीहरुविरुद्ध डिफ्यूजन नोटिस जारी भएकोमा आज फेरि कास्की प्रहरीले रेड नोटिसमा कन्भर्ट गर्न पत्राचार गरेको हो। रेड नोटिस जारी भएपछि झन छिटो पक्राउ परेर डिपोर्ट हुने भएकाले रेड नोटिसमा कन्भर्टका लागि पत्राचार गरिएको प्रहरी स्रोतले जानकारी दियो।

सहकारीको रकम हिनामिना गरेको प्रकरणमा जीबी राईसहित १ दर्जन व्यक्ति अझै फरार छन्। महेन्द्र भोटेविरुद्ध पनि डिफ्युजन नोटिस जारीका लागि पत्राचार गरिएको थियो। तर इन्टरपोलमा पत्राचार गरेको विषय सार्वजनिक भएपछि भोटेसँगै भविश्वर अर्याल आफैं अदालतमा उपस्थित भएका थिए। कास्की जिल्ला अदालतले उनीहरु दुवै जनालाई पुस १८ गते पुर्पक्षका लागि कारागार चलान गरेको थियो।

सहकारी ठगी प्रकरण: जीबी राईपछि पूर्वअध्यक्ष भूपेन्द्र र थानबहादुरविरुद्ध पनि डिफ्युजन नोटिस जारी

सहकारीका कोषाध्यक्ष कुमार रम्तेलसहितका व्यक्ति पनि पक्राउ परिसकेका छन्। जीबी राई ग्यालेक्सी फोर–के टेलिभिजनका सञ्चालकसमेत हुन्। उनीविरूद्ध अरू सहकारीमार्फत् ठगी गरेकोसमेत आरोप छ। कास्कीमा मात्रै १९ हजार भन्दा बढी बचतकर्ताको १ अर्ब ३५ करोड रुपैयाँ भन्दा बढी रकम हिनामिना गरेको आरोप छ। यो मुद्दा अहिले कास्की अदालतमा विचाराधीन छ। रकम हिनामिना प्रकरणमा सहकारी ऐन र मुलुकी अपराध संहिताको ठगीसम्बन्धी कसुरमा उनीहरुविरुद्ध मुद्दा चलाइएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

डढेलोका कारण धुवाँ फैलिएपछि लस एन्जलसका बासिन्दालाई घरभित्रै बस्न आग्रह

सिद्धान्त मिल्नेसँग पार्टी एकता हुन्छ : कमल थापा

जानकी मन्दिरमा सवा लाख दीप प्रज्वलन( तस्विरहरु)