काठमाडौं– सरकारले सञ्चालनमा ल्याएको द्रुतबस आइतबारदेखि ३६ वटा सञ्चालन गरिने भनिए पनि पहिलो दिन २९ वटा मात्रै चलेका छन्। ११ वटा बस थप गरिए पनि पहिलो दिन यात्रु कम हुँदा सबै द्रुतबस चलाउन नसकिएको यातायात व्यवस्था विभागका महानिर्देशक उद्धव प्रसाद रिजालले बताएका छन्।
सोमबारबाट सबै बस सञ्चालनमा ल्याउन प्रयास गरिने उनको भनाइ छ। उक्त बस पहिलेभन्दा व्यवस्थित तरिकाले सञ्चालन गरिने उनले बताए।
यसअघि भौतिक पूर्वाधार तथा यातायात मन्त्रालयको प्रयासमा असोज ३ गते संविधान दिवसको दिनदेखि सञ्चालनमा आएको थियो। काठमाडौं उपत्यकामा बढ्दो ट्राफिक जामका बीच सार्वजनिक सवारी प्रयोग गर्ने यात्रुलाई छिटो गन्तव्यमा पुग्न सजिलो होस् भन्ने उद्देश्यले सूर्यविनायक–रत्नपार्क द्रुत बस सेवा सञ्चालनमा ल्याइएको हो। तर दशैंदेखि भने उक्त सेवा स्थगित भएको थियो। दशैंमा यात्रुहरुको चाप कम भएको भन्दै द्रुत बस सेवा बन्द गरिएको थियो।
‘द्रुत बस बन्द भएका बेला ती बसहरु व्यवसायीले चलाइरहेका थिए। समयमा गन्तव्यमा पुग्न सकेनौँ भनेर यात्रुको गुनासो आएपछि यात्रुको गुनासोलाई सम्बोधन गर्दै आइतबारदेखि ११ वटा बस थप गरिएको हो,’ उनले भने।
कसरी व्यवस्थित गरिन्छ?
व्यवस्थित तरिकाले पुनः सञ्चालनमा आएका ३६ वटा बसमध्ये १८ बस एकतर्फी र १८ बस अर्कोतर्फी सञ्चालन गरिनेछ। प्रत्येक बस ३–३ मिनेटको फरकमा छुट्ने रिजाल बताउँछन्। यसअघि यी बस ५/५ मिनेटको फरकमा छुट्ने गरेका थिए।
यस्तै उक्त सञ्चालन भएको समयमा नियमित अनुगमन गरिने समेत उनले जानकारी दिए। ‘कुन बसमा कति यात्रु चढे, कुन क्षेत्रमा बसलाई आवतजावतमा समस्या भयो भन्नेबारेमा सर्वेक्षण गरिनेछ। पहिला ट्राफिक प्रहरीबाट जानकारी लिने गरिन्थ्यो,’ रिजालले भने, ‘अब यी बस चलेको समयमा बस चलाउँदा देखिएका समस्या टिपोट गरी समाधान गरिन्छ।’
कति यात्रु बोकेर कति समयमा गन्तव्यमा पुग्यो भन्नेबारे विभागले सर्वेक्षण गर्ने उनी बताउँछन्। पहिला कति समयमा कहाँ पुग्यो भनेर ट्राफिक प्रहरीबाट जानकारी लिइँदै आएको तर सो जानकारीबाट प्रभावकारी नभएको भन्दै विभाग आफैं सर्वेक्षणमा खटिएको उनको भनाइ छ।
‘सूर्यविनायकदेखि ४५ मिनेटमा रत्नपार्क पुर्याउने उद्देश्यले काम गरिरहेका हौं। ४५ मिनेटमा गन्तव्यमा पुगेको छ कि छैन? पुगेको छैन भने के समस्याले ४५ मिनेटमा पुग्न नसकेको भन्ने पत्ता लगाएर सहजीकरण गर्छौं,’ उनले भने।
४५ मिनेटमा पुगिरहेका छन् भने त्योभन्दा कम समयमा कसरी पुर्याउन सकिन्छ, त्यसबारे प्रक्रिया अगाडि बढाउने जानकारी उनले दिए।
कति खर्चियो द्रुत बसमा
सडक विभागका महानिर्देशक सुशीलबाबु ढकालले बिहान र बेलुकी आवागमनको उच्च समयमा द्रुत बस कम भएको गुनासो आएकाले बसको संख्या थपेर चलाइएको बताए। महानिर्देशक ढकालले द्रुत बस सेवा सञ्चालनका लागि यसअघि करिब ३ करोड रुपैयाँ खर्च भएको बताए। उनले अहिले पुनः सञ्चालनका लागि भएको खर्चबारे सार्वजनिक हुने बताए। द्रुत बस सेवा सञ्चालनको सम्पूर्ण जिम्मेवारी यातायात व्यवस्था विभागको रहेको उनले बताए।
तर, यातायात व्यवस्था विभागका महानिर्देशक रिजालले भने द्रुत बस सञ्चालन गर्दा के कति खर्च लाग्यो भन्नेबारे विभागलाई विवरण नआएको बताए।
‘भक्तपुर सडक खण्ड र काडमाडौं सडक खण्ड गरी दुई सडक खण्ड छन्। के कति खर्च भयो भन्नेबारे हामीलाई कुनै तथ्यांक उपलब्ध भएको छैन,’ रिजालले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765711869.png)
-1764146706.png)
-1763721444.png)
-1765273665.jpg)
