काठमाडौं- सत्ताधारी नेपाली कांग्रेसका सांसद सुनिल शर्मा गत साउन २५ गने गोल्फुटारबाट पक्राउ परे। उनलाई नेपाल प्रहरीको केन्द्रीय अनुसन्धान ब्यूरो (सीआईबी)को टोलीले पक्राउ गरेको थियो। उनलाई नक्कली शैक्षिक प्रमाणपत्र बनाएको कसुरमा पक्राउ गरिएको थियो। उनले एमबीबीएस पढ्दा पेस गरेको आईएस्सीको प्रमाणपत्र नै नक्कली रहेको बताइएको छ।
सीआईबीले शर्मालाई थुनामै राखेर अनुसन्धान गर्दै भोलिपल्ट जिल्ला अदालत, काठमाडौंमा उपस्थित गराएको थियो। तर न्यायाधीश दण्डपाणी शर्माको एकल इजलासले थुनामुक्त राखेरै अनुसन्धान गर्न आदेश दियो। अन्य पाँच चिकित्सकलाई भने थुनामै राखेर अनुसन्धान गर्न आदेश भएको छ। आदेशपछि शर्मा भने त्यसै दिन बेलुका रिहा भएका थिए।
रिहा भएका शर्माले सरकार विरुद्ध आक्रोश पोख्नु स्वाभाविक थियो। उनले संसद्मा र बाहिर आफ्नो पक्षमा उभिने सत्तापक्ष र विपक्षी पार्टीका सांसदलाई पनि धन्यवाद दिए। रोचक चाहिँ, उनले प्रमुख प्रतिपक्षी दल नेकपा एमालेका अध्यक्ष केपी शर्मा ओलीको प्रशंसा गरे।
'मेरो पिताजीसरह रोल निर्वाह गरिदिनुभएको, राष्ट्रनायकको रुपमा उहाँले आफूलाई उभ्याउनुभएको, केपी शर्मा ओली', शर्माले थपे, 'मैले अस्ति पनि केही गुणहरु केपी शर्मा ओलीको राम्रा छन् भनेको थिएँ, उहाँ र उहाँको पार्टीलाई, म फरक पार्टीको मान्छे भए तापनि, म हृदयको अन्तस्करणबाट धन्यवाद दिन चाहन्छु। म उहाँलाई भेट्छु पनि। उहाँले यसरी हामीसँग बुबुराहरु, जो फरक पार्टीमा रहेर, डेमोक्रेसीको पक्षमा लडिरहेका छौँ, यो देश बनाउने पक्षमा लडिरहेका छौँ, यसरी नै राष्ट्रनायकहरुले सधैं हामीलाई बचाउँदै जानुपर्छ।'
ओलीले हौसला प्रदान गरेको भन्दै शर्माले संसद्मा एमालेको तर्फबाट खेलिएको भूमिकाको पनि चर्चा गरे। 'मैले पार्लियामेन्टमा पनि देखेँ। धेरैपछि मेरो मन रोयो', उनले भने।
विराटनगरस्थित नोबेल मेडिकल कलेज र सिनामंगलस्थित काठमाडौं मेडिकल कलेजका सञ्चालकसमेत रहेका शर्माका विवादका विषयमा अनेक प्रसंग यसअघि नै सार्वजनिक भइसकेका छन्।
शर्मा रिहा हुनुभन्दा अघि त्यसै दिन दिउँसो बसेको प्रतिनिधि सभा बैठकमा एमालेले उनकै विषय उठायो। सुन प्रकरणमा उच्चस्तरीय छानबिन समितिको माग गरेर संसद् अवरोध गर्दै आएको एमालेका तर्फबाट बोलेकी ज्वालाकुमारी साहले त्यो समितिको आवश्यकताको विषयमा ध्यानाकर्षण गराइन्। त्यसपछि शर्माको पक्राउको विषयमा विरोध जनाइन्।
'नेपाली कांग्रेसका माननीय सुनिल शर्मा, जसले सुन काण्डमा उच्चस्तरीय छानबिन आयोग गठन हुनुपर्छ भनेर आवाज उठाइरहनुभएको थियो। त्यस्तो व्यक्तिलाई कुन हिसाबबाट समातिएको छ? यो कानुनले मिल्दैन,’ साहको भनाइ थियो, 'उहिले नै म्याद सकिएको प्रमाणपत्रलाई अहिले बखेडा झिकेर समातिएको छ। यसको घोर आपत्ति व्यक्त गर्न चाहन्छु।'
साहले शर्मा पक्राउको विरोध गरिरहँदा एमालेका सांसदहरु भने टेबल ठोकिरहेका थिए।
त्यसै दिन ओलीले 'पुरुष परीक्षा' नामक पुस्तक विमोचनमा पनि शर्माकै पक्ष लिएका थिए। 'सुनिल शर्माको सर्टिफिकेट फेक हो भने, यो दुई दिनमा बनाएको हो? सरकारको आलोचना गरेपछि यही दुई दिनमा बनाएको हो? अर्थमन्त्री र गृहमन्त्रीको राजीनामा गर भनेपछि? यसमा कमजोरी देखियो भनेपछि?', उनले थपे, 'सुनिल शर्मालाई तत्काल पक्रिएको नि, यदि थियो भने किन लुकाउनुभयो अस्तिअस्ति? जाली सर्टिफिकेट भएको मान्छे किन लुकाउनुभयो? अस्तिअस्ति किन उम्मेदवार बनाउनुभयो? चेपेर राखेको रहेछ नि त। होइन भने किन समात्या? यस्तो कपटकपूरण खेल खेल्नुहुँदैन। विकनेस थियो भने अस्तिअस्ति किन लुकाएको? साँचै हो भने किन अस्ति नै लुकाएको? साँचै हो भने पनि अहिल्यै पक्राउ पर्नुपर्ने, दुई दिन बोलेपछि त्यसपछि 'बोल त, अब कोही बोल त, सुनिल शर्मा बनाइदिन्छु', त्यही हो सन्देश।'
साउन २ गते त्रिभुवन विमानस्थलको सम्पूर्ण जाँच प्रक्रिया पूरा गरी झन्डै एक क्विन्टल सुन बाहिरिएको थियो। त्यसलाई सिनामंगल छेउबाट राजस्व अनुसन्धान विभागको टोलीले पक्राउ गरेपछि एमालेले गृहमन्त्री र अर्थमन्त्रीको संलग्नता बिना त्रिभुवन विमानस्थलको सुरक्षा प्रणाली र भन्सारबाट सुन बाहिरिन सम्भव नभएको भन्दै उच्चस्तरीय छानबिन समितिको माग गरेको थियो। एमालेले साउन १० गतेको प्रतिनिधि सभा बैठकमा यो विषयलाई जोड दिएर उठाएको थियो। सोही बैठकमा कांग्रेस सांसद शर्माले पनि मन्त्रीद्वयको राजीनामा माग गरेका थिए।
'उहाँहरुले समय लिने हो भने तीन दिन, पाँच दिन, सात दिन लिएर भन्नसक्नुपर्छ, यसको मुख्य नाइके पक्रिन्छौँ। होइन भने उहाँहरुले यो अनुसन्धानको प्रक्रियालाई सहज बनाउनका निम्ति अहिलेलाई कमसे कम सुनको मुख्य मालिक पत्ता नलागुञ्जेलसम्मका निम्ति राजीनामा गरेर प्रजातान्त्रिक पद्धति र अभ्यासलाई कदर गर्नुपर्छ', उनले भने।
त्यतिबेला देशबाहिर रहेका प्रधानमन्त्री फर्किएपछि उनले अनसन बस्ने चेतावनी समेत दिएका थिए। 'प्रधानमन्त्री फर्किएपछि पनि सुनको भरिया नभई मुख्य व्यक्ति पक्राउ नपर्ने हो भने सदनभित्रबाट आमरण अनसन घोषणा गर्न चाहन्छु', उनले भने।
शर्मा आइतबार (आज) बिहान ओलीलाई भेट्न उनको निवास बालकोट पुगेका थिए। त्यसबारे पत्रकारले सोध्दा उनले 'बाले भनिहाल्नुहुन्छ नि!' भन्दै ओलीतिर संकेत गरेका थिए। ओलीले भने शर्मा भेट्न आएकोमा आफूलाई खुसी लागेको बताए। उनले न्यायको विषय भएकाले आफू शर्माको पक्षमा उभिएको पनि बताए।
ओलीले आइतबार (आज) आयोजना गरेको पत्रकार सम्मेलनमा पनि पटकपटक शर्माको प्रसंग निकाले। उनले शर्माको सर्टिफिकेटका बारेमा आफू जाँचकी नभएको भने तर यतिबेला किन छानबिन गरेको भन्दै प्रश्न पनि उठाए। शर्माले मन्त्रीको राजीनामाको कुरा उठाएकाले नै पक्राउ गरिएको ओलीले दोहोर्याए।
ओलीले शर्मामाथि जाली मुद्दा लगाइएको पनि बताए। 'गठबन्धनकै सांसद (सुनिल शर्मा) पनि बोलेमा समाइदिन्छु, थुनिदिन्छु, भनाइ मात्रै होइन व्यवहारमा समाउने र थुन्ने, जाली मुद्दा लगाउने, अहिले प्रमाणित नभएसम्म त्यो मुद्दा जाली नै हो, प्रमाणित भएछ भने भोलि अर्को रहेछ भनौँला। अनि यस ढंगले अडान लिनुको पछाडि के छ?', उनको प्रश्न थियो।
शर्मालाई समाउनै नहुने ओलीको तर्क थियो। उनको प्रश्न थियो, 'के सुनिल शर्मा जत्तिको, हस्पिटल चलाएको, मेडिकल कलेज चलाएको, अरु विभिन्न गतिविधिहरु गरिरहेको, एउटा जननिर्वाचित सांसद यस्ता कुरामा के देश छाडेर भाग्ला? अनि हतारहतार उसलाई गिरफ्तार गरेर कारबाही गर्नुपर्ला?'
एमालेका सचेतक महेश बर्तौलाले राज्यले सरकारको विषयमा प्रश्न उठाउनेप्रति बदलाभावमा उत्रिन खोज्यो भन्ने प्रसंगमा अध्यक्ष ओलीले आफ्नो अभिव्यक्ति दिएको बताए। 'न्यायको कुरामा, सत्यको कुरामा तेरो र मेरो भन्ने नहुन सक्छ। सत्य कुरा बोल्नुपर्छ', उनले भने, 'यसमा बोल्नै हुँदैन। यसमा बोल्दा एमालेको सारा साख समाप्त भयो भन्ने होइन। अध्यक्षले आफ्ना पार्टीका कार्यकर्ताको बारेमा मात्रै होइन, तीन करोड नेपालीको विषयमा पनि बोल्नुपर्ने हुनसक्छ। शेरबहादुर देउवा वा प्रचण्डकै बारेमा पनि बोलिदिनुपर्ने हुनसक्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
