धनगढी– कञ्चनपुरको महेन्द्रनगरमा प्रहरीको गोली लागेर शुक्रबार साँझ मृत्यु भएका किशोरको सनाखत भएको छ।
१३ वर्षीया बालिका निर्मला पन्तको बलात्कार र हत्याको विरोधमा जारी आन्दोलनका क्रममा शुक्रबार साँझ करिब साढे पाँच बजेतिर प्रहरीले गोली चलाउँदा महेन्द्रनगर भगतपुरका सन्नी खुनाको मृत्यु भएको छ।
गोली लागेर गम्भीर घाइते उनको उपचारका क्रममा महाकाली अञ्चल अस्पतालमा मृत्यु भएको अस्पतालका एक जना कर्मचारीले बताए।
गोली प्रहारबाट कविन्द्र सिंह, दामोदर खत्री र उमेश देउवा लगायत दर्जनभन्दा बढी घाइते भएका छन्। घाइतेको महाकाली अञ्चल अस्पतालमा उपचार भइरहेको छ।
प्रत्यक्षदर्शीका अनुसार आक्रोशित भीड जिल्ला प्रशासन कार्यालयतिर आउन लाग्दा प्रहरीले गोली प्रहार गरेको थियो।
नेपाल कम्युनिस्ट पार्टी (नेकपा) का नेता भीम रावलले विवादास्पद अभिव्यक्ति दिएको भन्दै सोको विरुद्ध कञ्चनपुरमा पुनः प्रदर्शन सुरु भएकाे हो।
शुक्रबार बिहान अन्तर्वार्ताका क्रममा नेता रावलले निर्मला पन्तको हत्या प्रकरणलाई का्रग्रेसले उग्र बनाइरहेको भन्दै विवादित अभिव्यक्ति दिएका थिए।
उक्त अभिव्यक्तिको विरोधमा नेपाल विद्यार्थी संघले शुक्रबार जिल्ला प्रशासन कार्यालय कञ्चनपुर अगाडि प्रदर्शन गरिरहेका छन्। प्रदर्शनकारीलाई तितरवितर पार्न प्रहरीले एक राउण्ड हवाई फायर र केही सेल अश्रुग्यास प्रहार गरेको थियाे।
प्रहरीको गोली प्रहारबाट किशोरको मृत्यु भएपछि अहिले महेन्द्रनगर निकै तनावग्रस्त बनेको छ। शुक्रबार बिहान शान्त रहेको महेन्द्रनगरमा अपरान्हपछि एकाएक आन्दोलन चर्किएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764947412.jpg)
-1764146706.png)
