काठमाडौं- जीवनशैली, वैज्ञानिक अध्यात्म तथा योग प्रशिक्षक डा राजु अधिकारीद्वारा लिखित तीन पुस्तक, ‘परिवार सुख’, ‘संस्कारी बन्ने काइदा’ र ‘हजुरलाई विशेष उपहार’ एकसाथ लोकार्पण गरिएको छ।
काठमाडौंको पेप्सीकोलास्थित अक्षरा स्कुलमा शुक्रबार आयोजित विशेष कार्यक्रममा संस्कृतिविद् डा गोविन्द टन्डन, साहित्यकार डा तुलसी भट्टराई र प्रमुख निर्वाचन आयुक्त एवम् साहित्यकार दिनेशकुमार थपलियाले पुस्तक लोकार्पण गरे। साथै तीनै जना वक्ताले उल्लिखित तीन फरकफरक पुस्तकमा आ-आफ्ना धारणा राखे।
कार्यक्रममा डा गोविन्द डन्टनले अधिकारीको पुस्तक ‘संस्कारी बन्ने काइदा’माथि आफ्ना विचार राखे। यो पुस्तक अहिलेको समयमा अति नै सान्दर्भिक रहेको उनको भनाइ छ।
‘किनभने हामीले आफ्नो संस्कृति अनि धर्म–परम्परा बिर्संदै गएका छौं,’ उनी भन्छन्, ‘यसमा राज्यले पनि ध्यान दिएको छैन। अहिलेको शिक्षाले सूचना त दिएको छ। यसले मानिसलाई सफल पनि बनाउला। तर, असल बनाउँदैन। अधिकारीजीको ‘संस्कारी बन्ने काइदा’ले सफल मात्र होइन, मानिसलाई असल पनि बनाउँछ।’
प्रमुख निर्वाचन आयुक्त थपलियाले अधिकारीको पुस्तक ‘हजुरलाई विशेष उपहार’बारे समीक्षा गरे। पुस्तक पढ्दै गर्दा उपहार होस् त यस्तो भन्ने अनुभूति हुने उनले बताए। कुनै पनि उपहारको मूल्य त्यसको उपयोगितामा निहीत हुने र बाहिरी आवरणमा मात्र ध्यान दिन नहुनेमा पुस्तकले जोड दिएको थपलियाको भनाइ छ।
‘तर, हामी देखावटी अर्थात् चिरिच्याट्ट परेको उपहारमा मात्र सीमित छौं,’ थपलियाले भने, ‘डा अधिकारीजीको पुस्तक ‘हजुरलाई विशेष उपहार’ले साजसज्जामा मात्र ध्यान केन्द्रित गरिरहेको समाजलाई गतिलो सुझाव छ। यो सबैका लागि बहुउपयोगी छ।’
कार्यक्रममा साहित्यकार डा तुलसी भट्टराईले अधिकारीको पुस्तक ‘परिवार सुख’को समीक्षा गरे। पछिल्लो समय परिवारमा आइरहेको बेमेलले समाजलाई भड्खालोतिर लगिरहेको अवस्थामा अधिकारीको यस पुस्तकले आदर्श परिवार निर्माणमा सघाउ पुग्ने उनको भनाइ छ।
‘पारिवारिक सुखलाई प्राथमिकता दिइएर लेखिएको यो पुस्तक साँच्चिकै उदाहरणीय छ,’ उनले भने, ‘झनै अहिलेका प्रत्येक व्यक्तिले यो पुस्तकबाट प्रशस्त फाइदा लिन सक्छन्। र, आफ्नो जीवन सफल तुल्याउन सक्छन्।’
डा अधिकारीका कृति र उनका कार्यक्रम नेपाली समाजको वर्तमान पुस्ताका निम्ति उपयोगी रहेको उनले बताए। हाम्रा प्राचीन एवम् पूर्वीय धारणालाई पाश्चात्य दार्शनिकका धारणासँग मेल गराएर र उदाहरणसहित देखाएर डा अधिकारीले नेपाली समाजका लागि सुहाउँदो समाग्री तयार गरेको भट्टराईको भनाइ छ।
कार्यक्रममा लेखक डा राजु अधिकारीले लोकार्पित किताबहरूमा एउटाले भित्री जीवनलाई सिंगार्ने, अर्कोले बाहिरी जीवन सिंगार्ने र तेस्रोले सबैले सबैलाई जोड्ने अर्थात् आफूले अरुसँग जोड्ने काम गर्ने बताए।
‘परिवार सुख आजको सबैको ठूलो चाहना हो,’ उनले भने, ‘त्यसलाई सम्बोधन गर्न मैले ‘परिवार सुख’ पुस्तक लेखें। संस्कारको खडेरीलाई थोरै शान्त गर्न ‘संस्कारी बन्ने काइदा’ लेखेको हुँ। र, कालजयी उपहार अर्थात् स्थायी उपहार दिन सजिलो होस् भनेर ‘हजुरलाई विशेष उपहार’ पुस्तक लेखें।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781621001.png)
-1781591850-1781592603.jpg)
-1764146706.png)
