काठमाडौं– प्रतिनिधिसभाका सांसद हृदयेश त्रिपाठीले कर विरुद्धको आन्दोलन सुरु भइसकेको भन्दै तत्काल कर वृद्धिको समस्या सम्बोधन नभए संघियता खतरामा पर्ने चेतावनी दिएका छन्।
स्थानीय सरकारले मनोमानी ढंगले कर लगाउने काम गरिरहेको भन्दै उनले त्यसतर्फ तत्काल गम्भीर हुन सरकारको ध्यानाकर्षण गराएका हुन्। प्रतिनिधिसभाको सोमबारको बैठकको विशेष समयमा बोल्दै सांसद त्रिपाठीले कर वृद्धिको समस्या सम्बोधन समयमै गर्न नसक्ने हो भने त्यसले संघियतालाई खतरामा पार्ने बताएका हुन्।
स्याङजामा एक जना ज्योतिषलाई पनि २ हजार रुपैयाँ कर लगाइएको भन्दै उनले भने, ‘कुखुरा, परेवा जे देख्यो त्यसमा कर लगाइदिने? हुँदा–हुँदा अब मान्छे माथि कर लगाउने स्थिति आइसक्यो। यस विषयमा सरकार सचेत भएन भने कसै–कसैलाई लागेको होला संघियतालाई बद्नाम गर्नलाई यो पर्याप्त छ। तर संघीयता एक्लै अब घायल हुनेवाला छैन।’
कर विरुद्धको आन्दोलन सुरु भइसकेको जनाउँ दिँदै उनले भने, ‘त्यसतर्फ ध्यान दिइएन भने संघियता एक्लै मात्रै घायल हुनेवाला छैन। अरु चिज पनि घायल हुनेवाला छन्। त्यसकारण सबैले आफ्नो आफ्नो इष्टदेवको फोटो लिएर रुनुपर्ने अवस्था आउला।’
मनोमानी ढंगले कर थोपर्ने काम भइरहेको भन्दै उनले कर वृद्धिलाई आम जनताले निर्वाचनले दिएको उपहार भन्ने बुझ्न थालिसेकेको दावी गरे। उनले तत्काल यो समस्याको समाधान खोज्न सरकारको ध्यानाकर्षण गराए। सांसद त्रिपाठीले संघियताको असफलता भन्दा पनि कर प्रणाली र कर शैलीको विफलता भएको भन्दै कर वृद्धिको समस्या अबिलम्ब सम्बोधन गर्न सरकारसँग माग गरे।
अर्को प्रसंगमा चिनी मिल मालिकहरुको अगाडि सरकार लाचार भएको आरोप पनि लगाए। अझै पनि उखु किसानले सरकारद्धारा घोषित मूल्य पाउन नसकेको भन्दै उनले एक वर्षदेखि बाँकी रहेको किसानको रकम भुक्तानी गर्न सरकारको ध्यानाकर्षण गराए।
साउन १८ गते बसेको मन्त्रिपरिषद् बैठकले उखुको न्युनतम समर्थन मूल्यमा परिर्वतन नगरेसम्मका लागि २०७५ जेठ १५ देखि लागु हुने गरी उखु उत्पादक किसानहरुलाई प्रति क्विन्टल ६० रुपैयाँ अनुदान दिने निर्णय गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766980460.png)
-1764146706.png)
-1766928868.png)
-1766648928.png)
