काठमाडौं– कतारमा जारी विश्वकप फुटबलअन्तर्गत समूह ‘सी’को यो खेल हुनुभन्दा अगाडि दाबेदार मानिएको अर्जेन्टिनाले एसियाली राष्ट्र साउदी अरेबियालाई कम्तीमा ३–० को अन्तरले सजिलै हराउने अनुमान गरिएको थियो। दुई पटकको विश्वविजेता अर्जेन्टिनाले १० औँ मिनेटमा नै कप्तान लियोनल मेसीको पेनाल्टी गोलमा अग्रता लिएपछि त झनै जितको अन्तर फराकिलो हुने अनुमान गरिएको थियो। किनकि, एक गोल गरेपछि पनि अर्जेन्टिनाले आक्रमण निरन्तर जारी राख्यो। थप तीन गोल पनि गर्यो, तर ती सबै अफसाइड थिए।
मध्यान्तरअघि १–० ले अघि बढेको अर्जेन्टिनाले दोस्रो हाफमा पनि आक्रमण निरन्तर गर्यो। धेरै गोल गर्ने प्रयास गर्ने क्रममा अर्जेन्टिनाका रक्षकहरू अगाडि बढेका थिए। यही मौकाको फाइदा उठाउँदै साउदी अरेबियाले ४८ औँ मिनेटमा बराबरी गोल फर्कायो। सलेह अल सेहरीले उत्कृष्ट गोल गरेका थिए।
नसोचेको गोल खाएपछि अर्जेन्टिनाका खेलाडीले स्वाभाविक लय गुमाए। आक्रमण त गरिरहे तर त्यो भुत्ते थियो। यसैको मौका छोपेर साउदी अरेबियाले पुनः प्रत्याक्रमण गर्यो। ५३ औँ मिनेटमा सलिम अल दवसारीले गोल गर्दै सनसनी मच्चाए। धरै प्रयास गर्दा पनि अर्जेन्टिनाले बरारबरी गोल फर्काउन सकेन र उसले विश्वकप इतिहासकै सर्वाधिक अप्रत्यासित नतिजा आत्मसात गर्न पुग्यो। त्यतिमात्र होइन ३६ खेल अप्रत्यासित रहेको अर्जेन्टिनाले इटालीले बनाएको ३७ खेलको यात्रा भंग गर्ने क्रममा थियो। साउदी अरेबियासँगको यो हारले नयाँ कीर्तिमान बनाउने लक्ष्यमा समेत पूर्णविराम लाग्यो।
अर्कोतिर, दाबेदार अर्जेन्टिनालाई अप्रत्यासित रूपमा जितेपछि साउदी अरेबिया सरकारले सावर्जनिक विदा नै दियो। साउदी अरेबियाका समर्थक खुसीले ‘पागल’ भए। यतिमात्र होइन उनीहरूले सुपरस्टार मेसीलाई गिज्याउन थाले। त्यसमध्ये अग्रस्थानमा थिए अब्दुल्लाह अल अय्यादाह।
साउदी अरेबियाविरुद्धको हारपछि मेसी कुन दुलोमा लुकेका छन् भन्ने आशयमा अब्दुल्लाहले सामाजिक सञ्जालमा ‘ह्वेर इज मेसी’ अर्थात मेसी कहाँ छन्? भन्दै गिज्याउन थाले। यो ‘ट्रन्ड’को रूपमा एकेचोटी विश्वभरी फैलियो। विशेषगरी टिकटकमा छायो।
साउदी अरेबियापछि मेसी नेतृत्वको अर्जेन्टिनाले मक्सिकोसँग खेल्यो। त्यसबेला पनि मेक्सिकोमा समर्थकले अब्दुल्लाहकै ‘ट्रेन्ड’ पछ्याएर ‘ह्वेर इज मेसी’ भन्दै जिस्क्याए। यद्यपि, मेसी चम्किएपछि यो खेल अर्जेन्टिनाले २–० ले जित्यो।
यसपछि पनि अर्जेन्टिनाले खेलेका हरेक खेलमा ‘ह्वेर इज मेसी’ गुञ्जियो। त्यतिमात्र होइन क्रिस्टियानो रोनाल्डोको पोर्चुगल र स्पेनलाई जित्दै मोरक्कोले सनसनी मच्चाएर सेमिफाइनलमा पुग्यो। यसबेला पनि मोरक्कोका समर्थकले ‘ह्वेर इज रोनाल्डो’, ‘ह्वेर इज स्पेन’ भन्दै गिज्याएका थिए। यो पनि अब्दुल्लाहकै प्रभाव थियो।
मेसी नेतृत्वको अर्जेन्टिना मेक्सिकोपछि क्रमशः पोल्याण्ड, अष्ट्रेलिया, नेदरल्याण्ड्स र क्राेएसियालाई हराउँदै फाइनलमा पुगेको छ। यो क्रममा मेसीले ५ गोल र ३ असिस्ट गरिसकेका छन्। आइतबार हुने उपाधि भिडन्तमा साविक विजेता फ्रान्सको सामना गर्दैछ। यतिबेला भने कुनै समय ‘ह्वेर इज मेसी’ भन्दै जिस्क्याएका अब्दुल्लाह उनै मेसीको टोली अर्जेन्टिनाको पक्षमा लागेका छन्। उनी अहिले अर्जेन्टिनी समर्थकसँगै रहेर ‘भामोस अर्जेन्टिना’ अर्थात कम अन अर्जेन्टिना (अघि बढ अर्जेन्टिना) भनिरहेका छन्। अहिले अब्दुल्लाह अर्जेन्टिनाको झण्डा र जर्सीमा देखिन्छन्। यसले कतारमा विश्वकप फाइनलको माहोल झनै बढाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
