काठमाडौं– उपत्यकाका पेशेवर अपराधीबाट हुने अपहरण र फिरौती असुलीका अपराध पछिल्ला वर्ष घटेका छन्। तर, चिनजानकै व्यक्तिबाट अपहरण गरी फिरौती माग्ने घटना बढेको प्रहरीले जनाएको छ।
आइतबार मात्र काँडाघरीका ११ वर्षिय निशान खड्काको अपहरणपछि हत्या भयो। बालकले ‘अंकल’ भनेर बोलाउने नुवाकोटका गोपाल तामाङले उनको अपहरण गरेका थिए। बन्धक बनाउन नसकेपछि अपहरणकारीले उनको हत्या गरे।
गत वर्ष साउन १२ मा सोह्रखुट्ट बस्ने ५ वर्षिया बिशाल चौधरीको अपहरण भएको थियो। उनका बुबा विजयका साथी राजु विकले नै स्कुलको गेटबाटै उनलाई अपहरण गरी ५० लाख रुपैयाँ फिरौती मागेका थिए। एक हप्तापछि काँडाघारीबाट प्रहरीले बालकलाई अपहरणमुक्त बनाएको थियो।
अपहरणमा संलग्न विक र विष्णु पाण्डेलाई प्रहरीले पक्राउ गरेकोमा हाल उनीहरु जेलमा छन्।
५ फागुन २०७३ मा मखनटोलका साडी पसले श्याम सुन्दर अग्रवालको उनकै पसलमा काम गर्ने युवतीलाई प्रयोग गरि अपहरण गरिएको छ। युवती राधिका श्रेष्ठ र उनका साथीहरुले अग्रवाललाई सुन्धाराको होटलमा बोलाएर बन्धक बनाई १० लाख ७० हजार रुपैयाँ फिरौती लिएका थिए। उनका प्रेमी रहेका भक्तपुरका प्रकाश लामिछाने सो घटनाको प्रमुख योजनाकार थियो। फिरौती लिएपछि अग्रवाललाई होटलमै बन्धक बनाएर उनीहरु भागेका थिए।
अपहरणमा राधिकालाई प्रयोग गरेपछि घटनामा आफ्नो पहिचान खुल्ने डरले उनले राधिकालाई पनि सोही दिन बेलुका हत्या गरेका थिए। हत्यामा संलग्न लामिछाने गत वर्ष असोजमा प्रहरीले दुबईबाट पक्राउ गरी नेपाल ल्याएको थियो।
यीनै तीनै घटना चिनजानकै व्यक्तिबाट भएका छन्।
अघिल्ला दुई अपहरणमा पीडितहरु जोगिन सफल भएका थिए। तर, आइतबार अपहरीत बालकलाई प्रहरीले जोगाउन सकेन। अपहरणको केही घन्टामै अपहरणकारीले उनको हत्या गरे।
चिजानका व्यक्तिबाट हुने अपहरणका घटनामा अपहरीत व्यक्ति हत्या गर्ने जोखिम बढी हुने गरेको अपराध महाशाखाका प्रमुख एसएसपी धीरजप्रताप सिंह बताउँछन्।
पछिल्लो समय चिनजानकै व्यक्तिबाट अपहरण हुन थालेकोले सतर्कताको आवश्यकता देखिएको काठमाडौं परिसरका प्रमुख एसएसपी विश्वराज पोखरेल बताउँछन्।
चिनजानका व्यक्तिबाट हुने अपहरणमा खासगरी बालकहरु जोखिममा हुने गर्दछन्। यसका लागि अभिभावक सचेत हुनुपर्ने प्रहरी अधिकारीहरु बताउँछन्।
सोह्रखुट्टेका बिशाल चौधरीको स्कुलको गेटबाट नै अपहरण भएको थियो। जसमा स्कुलको समेत कमजोरी थियो। बच्चालाई अपरिचत व्यक्तिसँग जान दिइएको थियो।
बालकहरुलाई निरन्तर निगरानीमा राख्ने, अभिभावकको अनुमती बिना अन्य व्यक्तिसँग खेल्न वा घुम्न जान नदिने र बालक हराएमा तत्कालै प्रहरीलाई खबर गर्नुपर्ने प्रहरी अधिकारीहरुको सुझाव छ।
सम्बन्धित समाचार
किन अपहरित बालक जोगाउन सकेन प्रहरीले ?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
