बुटवल– मर्चवार रुपन्देहीकै ग्रामिण क्षेत्र। भौतिक रुपमा अहिले केही सुदृढ भए पनि २०२७ सालताका मर्चवार एकदमै बिकट थियो। त्यस बेला मर्चवारबाट सरकारी सेवामा काम गर्नु नै ठूलो कुरा मानिन्थ्यो। सरकारी सेवाको पनि ठूलो पदमा काम गर्नु एकदमै गौरवशाली कुरा। त्यही ‘गौरव’ पाएका ब्यक्ती हुन् लोकतान्त्रिक समाजवादी पार्टीका नेता सर्वेन्द्रनाथ शुक्ला।
२००६ साल पुस १५ गते हालको सम्मरीमाइ गाउँपालिकामा जन्मिएका शुक्लाले मेकानिकल इन्जिनियरिङमा स्नातक गरेका छन्। शुक्ला २०२७ सालमा तत्कालीन श्री ५ को सरकारको विद्युत् विभागमा रही भैरहवाको महेन्द्र सुगर मिलमा काजमा कार्यरत थिए। उनि त्यो बेला चिफ इन्जिनिर थिए।
सरकारी उद्योगमा चिफ इन्जिनिर भएकै कारण उनलाई मर्चवारका गाउँमा ‘चिफ साहेब’ भनेर बोलाउन थालिएको बताउँछन् लोकतान्त्रिक समाजवादी पार्टीका रुपन्देही जिल्ला अध्यक्ष अजय बर्मा। मर्चवारका चिफ साहेब देशमा बहुदलिय व्यवस्था आएपछि सरकारी जागिर छाडेर राजनितीमा होमिए।
२०४७ असोजमा नेपाली कांग्रेस प्रवेश गरे। २०४८ मा राप्रपा (कमल थापा) समूहमा प्रवेश गरे गरेर पहिलो पटक चुनाव लडे। नेपाल सद्भावना पार्टीसँग पराजित भए। २०४९ को स्थानीय निर्वाचनमा रूपन्देही जिल्ला विकास समितिको उपसभापति भए।
२०५१ को मध्यावधि निर्वाचनमा तत्कालीन जिल्ला विकास समिति रूपन्देहीको उपसभापति पदबाट राजीनामा दिएर प्रतिनिधि सभा सदस्यमा राप्रपा थापा समूहबाट विजयी बने। २०६४ सालमा मधेस आन्दोलनका क्रममा महन्थ ठाकुरको नेतृत्वमा तराई–मधेस लोकतान्त्रिक पार्टी गठन गरी संस्थापक सदस्य बने। त्यसको महामन्त्रीसम्म भए।
२०७० को दोस्रो संविधान सभा निर्वाचनमा तमलोपाबाट त्यही क्षेत्रबाट संसदीय निर्वाचनमा विजयी भए। २०७४ सालको आम निर्वाचनमा नेपाली कांग्रेसका प्रमोद यादवसँग पराजित भए। र अहिले फेरि शुक्ला तेस्रोपटक रुपन्देही क्षेत्र नम्बर ४ (मर्चवार) बाट प्रतिनिधि सभा सदस्यमा निर्वाचित भएका छन्।
शुक्ला नेपालकै सबैभन्दा धेरैपटक मन्त्री बन्ने भाग्यशाली नेतामध्ये १ पनि हुन्। शुक्ला २०५२ असोजमा जलस्रोत राज्यमन्त्री, २०५३ चैतमा वाणिज्य मन्त्री , २०५४ मा सञ्चार मन्त्री , २०६१ मा पर्यटन, नागरिक उड्ययन तथा संस्कृति, वन तथा भू संरक्षण र भूमि सुधार तथा व्यवस्था मन्त्री र २०६६ मा शिक्षामन्त्री गरि ५ पटक मन्त्री भइसकेका छन्। उनी २०६१ मा नेपाल विद्युत् प्राधिकरण सञ्चालक समितिको अध्यक्ष समेत भए।
शुक्ला मर्चवारको राजनितीको मात्र नभएर मधेस राजनितीको पनि एउटा प्रमुख पात्र हुन्। शुक्लाको घर मर्चवारमै छ।
मर्चवारको राजनितीमा पछिल्लो समय उदाएका प्रतिनिधीहरु प्राय शुक्लाकै बिरोध गरेर चुनाव जित्न सफल भएका छन्। तर शुक्ला भने जिते पनि हारे पनि निरन्तर मर्चवारलाई केन्द्र बनाएर राजनिती गर्दै आएका छन्।
यस पटकको निर्वाचनमा रुपन्देही क्षेत्र नम्बर ४ मा शुक्ला आफ्ना निकटतम् प्रतिस्पर्धी नेपाली कांग्रेसका प्रमोदकुमार यादवलाई ५ हजार २९६ मतान्तरले पछार्दै विजयी भए।
कुल ७६ हजार ६७५ मतमध्ये शुक्लाले २८ हजार मत प्राप्त गरी विजयी भएको निर्वाचन अधिकृत देवेन्द्र आचार्यले बताए। निर्वाचन कार्यलयका अनुसार शुक्लका निकटतम् प्रतिस्पर्धी तथा नेपाली कांग्रेसबाट उम्मेदवार रहेका यादवले २२ हजार ७०४ प्राप्त गरेका छन्।
जनमत पार्टीका भोपेन्द्रप्रसाद यादवले १५ हजार ५२६ मत हासिल गरेका छन्। त्यसैगरी जनता समाजवादी पार्टी (जसपा) का ओमप्रकाश यादवले २ हजार ६२३, नेपाल जनता पार्टीका महेन्द्र सिंहले १ हजार ८६, नागरिक उन्मुक्ति पार्टीका सत्यदेव चौधरी ४६५, राष्ट्रिय जनमुक्ति पार्टीले १९९ तथा नेशनल मङ्गोल पार्टीले ५३ मत प्राप्त गरेका निर्वाचन कार्यालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
