भैरहवा- साउन महिनाको प्रचण्ड गर्मी। रुपन्देही, मर्चवारका खेतहरु सिँचाईको अभावले सुकिरहेका थिए। मर्चवारको ५ हजार हेक्टर बढी जमिनमा सिंचाई गर्नुपर्ने आयोजनाका नहरहरु जीर्ण बन्दा खेतमा पानी पुग्न सकेका थिएनन्।
यस्तो अवस्थामा २८ वर्षीय एक युवक खेतमा पानी पुर्याउने उद्देश्यले डोजर लिएर नहर-नहरमा पुगे। नहर सफा गरे, जीर्ण भएकालाई मर्मत गरे। र, मर्चवारका खेतहरुमा पानी पुर्याउन सफल भए।
ती व्यक्ति हुन् कन्हैया बनिया। उनी अहिले रुपन्देही क्षेत्र नम्बर ४ (क) बाट प्रदेश सभा सदस्य निर्वाचित हुन सफल भएका छन्। लोकतान्त्रिक समाजवादी पार्टी (लोसपा) मा आवद्ध उनले ३५ हजार ५ सय ७७ मत खसेकोमा १५ हजार १ सय ३७ मत ल्याई विजयी भए।
उनका निकटतम् प्रतिद्वन्द्वी जनमत पार्टीका जितेन्द्रनाथ शुक्ल (बब्लु) ले ९ हजार २ सय ५३ मत पाएका छन्। यस्तै नेपाली कांग्रेसका अष्टभुजा पाठकले ८ हजार २७ मत पाएको निर्वाचन अधिकृत देवेन्द्र आचार्यले जानकारी दिए।
बनियाले जित्नुमा गत साउनमा उनले गरेको कामकै प्रभाव भएको मर्चवारका स्थानीय बताउँछन्। बनियाको प्रदेश सभा सदस्य बन्ने प्रयास पहिलो पटक भने होइन। २०७४ मा भएको प्रदेश सभा निर्वाचनमा उनी नेपाली कांग्रेसका अष्टभुजा पाठकसँग पराजित भएका थिए।
बनिया २०७४ मा भने तत्कालीन संघीय समाजवादी पार्टीबाट प्रतिस्पर्धामा उत्रिएका थिए।
मर्चवार नेपालकै अन्न भण्डार हो। यस क्षेत्रको करिब २० हजार हेक्टरमा खेती हुने गरेको छ। यस क्षेत्रमा सिंचाईको मुख्य आधार भनेकै मर्चवार लिफ्ट सिँचाई आयोजना हो। तर जल उपभोक्ता संस्थाले सिँचाईको लागि पानी छोडेपनि नहर जिर्ण हुदा पानी खेतहरुमा नपुगेको समयमा बनियाले पहलकदमी लिँदै खडेरीको बेला खेतमा पानी पुर्याएर किसानलाई राहत प्रदान गरेका थिए। उनको यस काम त्यो समयमा चौतर्फी रुपमा चर्चामा आएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
