काठमाडौं– निर्वाचन आयोगले मंसिर ४ गते हुने प्रतिनिधि सभा र प्रदेश सभा निर्वाचनको सम्पूर्ण तयारी पूरा हुने क्रममा रहेको जानकारी दिएको छ।
निर्वाचनको मिति आउन करिब ३ साता मात्रै बाँकी रहेको अवस्थामा मतदानस्थलदेखि मतदान सामाग्री ढुवानीसम्मको सम्पूर्ण तयारी पूरा भएको प्रमुख निर्वाचन आयुक्त दिनेश कुमार थपलियाले जानकारी दिए।
‘सुगम स्थल र शहरहरुका ढुवानी वाँकी भए पनि विकट तथा भौगोलिक रुपमा अप्ठेरोस्थलमा आयोगले लगभग सबै तयारी सकेको छ,’ उनले भने, ‘अब आयोग सम्पूर्ण रुमपा तयार अवस्था छ। मतदाताले भयरहित रुपमा मत खसाल्न ढुक्क हुन आग्रह गर्दछ।’ उनले निर्वाचन क्षेत्रमा खटिने कर्मचारीदेखि अधिकृतहरुलाई तालिम लगायत अन्य सबै काम सकिएको बताए।
४ मतपत्र, ४ पेटिका, २ मतदानस्थल
प्रदेश तथा प्रतिनिधि सभाका उम्मेदवार चयनका लागि मतदाताले छुट्टा–छुट्टै ४ वटा मतपत्रमा आफूले इच्छाएको उम्मेदवारको निर्वाचन चिह्नमा मतदान गर्नुपर्ने छ।
प्रतिनिधि सभाको पहिलो हुने निर्वाचित हुने (प्रत्यक्ष) निर्वाचन प्रणालीका लागि सेतो पृष्ठभूमिमा रातो रङको निर्वाचन चिह्न भएको मतपत्र छापेको छ। यस्तै, प्रतिनिधि सभाको समानुपातिक निर्वाचन प्रणालीका लागि सेतो पृष्ठभूमिमा कालो रङ्गको निर्वाचन चिह्न भएको मतपत्रको व्यवस्था गरेको छ।
यस्तै, प्रदेश सभाको पहिलो हुने निर्वाचित हुने निर्वाचन प्रणालीका लागि सेतो पृष्ठभूमिमा रातो रङको निर्वाचन चिह्न र प्रदेश सभाकै समानुपातिक निर्वाचन प्रणालीका लागि सेतो पृष्ठभूमिमा कालो रङको निर्वाचन चिह्न भएको मतपत्रको व्यवस्था गरिएको छ।
आफ्नो परिचयपत्रसहित मतदान केन्द्रमा पुग्ने मतदातालाई सुरुमा प्रतिनिधि सभाको पहिलो हुने निर्वाचित हुने निर्वाचन प्रणालीतर्फको मतपत्र उपलब्ध गराउने व्यवस्था गरिएको छ।
यो मतपत्रमा आफूलाई मन पर्ने उम्मेदवारको निर्वाचन चिह्नमा मतदाताले मत संकेत गरिसकेपछि त्यसलाई पट्याएर नजिकैको ‘१’ लेखिएको मतपेटिकामा मतपत्र खसाल्नु पर्नेछ। यो मतपत्र खसालि सकेपछि दोस्रो चरणमा प्रतिनिधि सभाकै समानुपातिक निर्वाचन प्रणालीतर्फको मतपत्रमा इच्छाएको राजनीतिक दलको निर्वाचन चिह्नमा मत संकेत गरेपछि पट्याएर ‘२’ लेखिएको मतपेटिकामा मतपत्र खसाल्नुपर्नेछ।
तेस्रो चरणमा प्रदेश सभाको पहिलो प्रत्यक्ष निर्वाचन प्रणालीको मतपत्र उपलब्ध गराउने व्यवस्था गरिएको छ। यो मतपत्रमा इच्छाएको उम्मेदवारको निर्वाचन चिह्नमा मतदान गरिसकेपछि पट्यएर ‘३’ लेखिएको नजिकैको मतपेटिकमा मतपत्र खसाल्नुपर्नेछ। चौथो तथा अन्तिम चरणमा प्रदेश सभाको समानुपातिकतर्फको मतपत्र मतदातालाई उपलब्ध गराउने व्यवस्था गरिएको छ।
यो मतपत्रमा मतदाताले आफूले इच्छाएको राजनीतिक दलको निर्वाचन चिह्नमा मत संकेत गरिसकेपछि त्यसलाई पट्याएर ‘४’ लेखिएको नजिकैको मतपेटिकामा मत खसाल्नुपर्नेछ।
हरेक मतदान केन्द्रमा गोप्य कक्षमा राखिएको स्वस्तिक छापले मतदाताले मतपत्रमा मत संकेत गर्नुपर्ने व्यवस्था हुनेछ। मतदाताले मतदान केन्द्रमा आ–आफ्नो परिचयपत्र साथमा लिएर जानुपर्ने व्यवस्था आयोगले गरेको छ।
महिलाले तोकिएको महिलाको लाइनमा र पुरुषले तोकिएको पुरुषको लाइनमा लामबद्ध भइ मतदान गर्न पाउने गरी मतदान केन्द्रको व्यवस्थापन गर्न लागिएको छ।
गर्भवती, अशक्त, ज्येष्ठ नागरिक, बिरामी, किरियापुत्री, सुत्केरी, आफ्नो काखे बालबालिका साथमा भएकी महिला, अपांगता भएका व्यक्त तथा अन्य (लैंगिक तथा यौनिक अल्पसंख्यक) मतदातालाई लाइनमा नबसी प्राथमिकताका आधारमा मतदान गर्न पाइने व्यवस्था गरिने प्रमुख निर्वाचन आयुक्त थपलियाको भनाइ छ।
दृष्टिविहीन वा शारीरिक अशक्तता भएको वा अरू कुनै कारणले आफैँ मत संकेत गर्न नसक्ने भएको मतदाताको हकमा एकाघर परिवारको सदस्यलाई आफूसँगै मत संकेत गर्ने गोप्य कक्षमा मतदान अधिकृतको अनुमतिमा लैजान सकिने र सो नभएमा मतदान अधिकृतको सहयोग लिन सकिने व्यवस्था मिलाउन निर्देशन गरिएको प्रमुख आयुक्त थपलियाले बताए।
आसन्न निर्वाचनमा मतपत्र सानो आकारको रहेको र पहिलो हुने निर्वाचित हुने निर्वाचन प्रणालीतर्फको मतपत्रमा उम्मेदवारी दिएकाहरूको मात्रै निर्वाचन चिह्नको व्यवस्था गरिएको उनले बताए।
आयोगले मतपत्र छपाइको काम शुक्रबारदेखि निरन्तरता दिने उनले बताए। आयोगले कात्तिक २२ गतेसम्म सबै मतपत्र छापिसक्ने थपलियाको भनाइ छ।
‘आयोगको अन्य तयारीका काम सकिएका छन्। अब मतपत्र केही हो। केही छपाइ भइसकेका छन्। तिहार बिदाका कारण रोकिएको थियो। अब आज (शुक्रबार)बाट त्यसले पनि निरन्तरता पाउँछ,’ थपलियाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771141186.png)
-1771137528.png)
-1764146706.png)
-1770562345.jpg)
