नवौं खेलकुदः मैदान तयार नहुँदा हक्की खेल अनिश्चित

अन्य

रिखिराम जिसी बिहीबार, असोज २७, २०७९ १०:५०

पोखरा– नवौं राष्ट्रिय खेलकुद प्रतियोगिता अन्तर्गत हक्कीका खेलहरु बिहीबार बिहानबाट सुरु हुने तालिका थियो। सोही तालिका बमोजिम देशैभरका खेलाडी, अफिसियल खेलमैदान प्रवेश गरिसकेका थिए। तर, खेलमैदान तयार नहुँदा खेल अनिश्चित बनेको छ।

बुधबार साझसम्म सक्नेगरी काम गरिएकोमा साँझसम्म नसकिएपछि खेल बिहीबार बिहान ११ बजेका लागि सारिएको थियो। तर, अहिलेसम्म घाँस काटेर सकिएको छैन जसले गर्दा खेल हुने–नहुने अन्योल छ।

नेपाल हक्की संघका अनुसार खेलमैदान मर्मत तथा खेल सामग्री नपाउँदा बिहान ७ बजेबाट सुरु हुनुपर्ने खेल अझैसम्म अनिश्चित छ।

पुरुषतर्फको हेम्जाको गौरिशंकर खेल मैदानमा तथा महिला तर्फको गण्डकी बोर्डिङ स्कुलमा गर्ने तालिका छ। तर, उक्त खेल मैदानका घाँस काट्नुका साथै मैदान व्यवस्थापन गर्ने काम अझै नसकिएको नेपाल हक्की संघका केन्द्रीय उपाध्यक्ष हिमाल खड्काले जानकारी दिए।

‘७ बजे गर्ने भनेको हिजो साँझसम्म काम सकिएन। अहिलेसम्म पनि घाँस काट्दै छन्। हामीलाई मैदान दिइएको छैन, उनीहरुले दिइसकेपछि कतिबेला माइकिङ गर्ने हो कति बेला सुरु गर्ने हो अहिलेसम्म अनिश्चित नै छ,’ उनले भने।

मैदान व्यवस्थापनको कमजोरीका कारण मैदान मर्मतमा ढिलाई भएको खड्काले बताए। ‘१ गतेदेखि हामीले फलोअफ गर्न भनेको भनेका थियौं, बनाइदिन्छु भन्दाभन्दै २५ गतेसम्म नबनाएपछि हामी आफैं सदस्य सचिवलाई अब गेम बनाउन सक्दैनौं भन्यो। त्यसपछि मात्र रोलर पठाउनुभयो,’ उनले भने, ‘कामचलाउ तरिकाको मैदान मर्मत भएको छ।’

खेलका क्रममा खेलाडीलाई जोखिम भएको खड्काले बताए। ‘महिला खेलाडीहरुको मैदान तयार भएको छ तर खेलाडीहरुमा इन्जुरीको जोखिम छ, पुरुष खेलका लागि त मैदान नै तयार भएको छैन,’ खड्काले भने।

खेल सामग्री नदिँदा महिलातर्फ पनि सुरु हुन सकेन
हक्की महिलातर्फ गण्डकी बोर्डिङ स्कुलमा हुने तालिका छ। उक्त ठाउँमा खेलमैदानको तयार भए पनि खेल सुरु हुन सकेको छैन। खेलकुद परिषद्ले खेल सामग्री नदिँदा खेल सुरु गर्न नसकिएको नेपाल हक्की संघका उपाध्यक्ष खड्काले बताए।