पोखरा– पोखरा उद्योग वाणिज्य संघको ३४औं महाधिवेशनबाट पवन प्रजापति विजयी भएका छन्। संघको आइतबार मतगणना सकिँदा प्रजापति १ हजार ६१३ मतसहित विजयी भएका हुन्। उनका प्रतिस्पर्धी अर्जुन पोखरेलले ८९७ मत प्राप्त गरे।
प्रजापतिको प्यानलबाट उपाध्यक्षबाहेका सबै पदाधिकारी र साधारण सदस्यतर्फ १० जनामध्ये ७ जना विजयी बने। नयाँ समितिको कार्यकाल २ वर्षको हुनेछ। वरिष्ठ उपाध्यक्षमा गोकर्ण कार्की, वाणिज्य उपाध्यक्षमा उत्तममान बुद्धाचार्य, महासचिवमा बलराम आचार्य, उपमहासचिवमा शोभा गौतम र कोषाध्यक्षमा दिनेशचन्द्र बास्तोला विजयी भएका छन्। विजयी सबै पवन प्यानलका हुन्।
वरिष्ठ उपाध्यक्षमा कार्कीले अर्जुन प्यानलका हरिहर सापकोटालाई पराजित गर्दै विजयी भएका हुन्। वाणिज्य उपाध्यक्षमा बुद्धाचार्यले ९६५ मतसहित विजयी भएका हुन्। उनका प्रतिस्पर्धी शोबित पौडेलले ८७८ र कुमारीमुना बास्तोला ६६५ मत प्राप्त गरे। महासचिवमा आचार्यमा ९१० मत लिएर विजयी हुँदा केशव खत्रीले ८२९ र तारानाथ ढुंगानाले ७६९ मत प्राप्त गरे।
उपमहासचिवमा गौतमले १ हजार ७५५ र उनका प्रतिस्पर्धी हर्कबहादुर अधिकारीले ७५८ मत प्राप्त गरे। कोषाध्यक्षमा बास्तोलाले १ हजार ५९९ र हरिराज पन्तले ९०५ मत प्राप्त गरेका छन्।
उद्योगतर्फ उपाध्यक्षमा अर्जुन प्यानलका देवेन्द्र केसी विजयी भएका छन्। उनले १ हजार ७९१ मत प्राप्त गर्दै विजयी भए। उनका प्रतिस्पर्धी हिरामणि पन्तले ७२० मत प्राप्त गरेका छन्।
कार्यसमिति सदस्यमा प्रभा सुवेदी, सुदीप प्रधानाङ्ग, बालकृष्ण कोइराला, दिलिपकुमार श्रेष्ठ, भरत केसी, माधव बस्ताकोटी, कृष्णप्रसाद कोइराला, भीम गौतम, मनोजकुमार श्रेष्ठ र सुदीप ओझा विजयी बने। साधारण सदस्यमा १९ जनाले उम्मेदवारी दिएका थिए।
वस्तुगत सदस्यतर्फ जीवनप्रकाश श्रेष्ठ, प्रेमप्रसाद सुवेदी, लेखनाथ सुवेदी र लीलाधर चपागाईं विजयी भए। औद्योगिक सदस्यमा युवकबहादुर बस्नेत र कर्पाेरेट सदस्यतर्फ रामप्रसाद कँडेल र वन्दना कार्की केसी निर्विरोध भइसकेका थिए।
संघमा ३ हजार १४३ जना मतदाता रहेकामा शनिबार भएको निर्वाचनमा २ हजार पाँच सय ४९ जना मतदाता सहभागी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
