काठमाडौं– मंगलबार अभिनेत्री नीता ढुंगाना र ज्योतिषी तथा अभिनेता हरिहर अधिकारीले सामाजिक सञ्जालमार्फत् आफ्नो नयाँ फिल्म ‘ह्रस्व दीर्घ’मा दक्षिण भारतीय अभिनेता ब्रह्मानन्दनले काम गर्ने पक्का भएको सार्वजनिक गरे।
ढुंगाना र अधिकारीले बनाइरहेको उक्त फिल्ममार्फत् ब्रह्मानन्दनले नेपाली फिल्ममा डेब्यु गर्दैछन्। ‘ह्रस्व दीर्घ’मा ब्रह्मानन्दनसँगै अन्य भारतीय कलाकार तथा प्राविधिकहरुले पनि काम गर्ने पक्का पक्कि भइरहेको छ। जसमध्ये प्रदीपराम सिंह रावत, सुनिल वर्मा केही नामहरु हुन्। फिल्म खिच्नेमा पनि बलिउडकै चर्चित कविरलाललाई अनबोर्ड लिइएको छ। उक्त फिल्म ‘ह्रस्व दीर्घ’लाई चन्द पन्तले निर्देशन गर्दैछन्।
मंगलबार नेपाली फिल्ममा काम गर्ने सम्झौता भएका ब्रह्मानन्दन दक्षिण भारतमै मात्र नभएर हिन्दी भाषाका फिल्महरु प्रदर्शन हुने सम्पूर्ण क्षेत्रमा चर्चित कलाकार हुन्। अपवाद बाहेक ब्रह्मानन्दनले अभिनय नगरेका दक्षिण भारतीय फिल्महरु पाउन गाह्रो छ।
हास्यव्यंग्यमा प्रखर रहेका ब्रह्मानन्दन धेरै फिल्महरुमा ‘मसला’को रुपमा अभिनय गर्दै दर्शकलाई हसाउन माहिर मानिन्छन्। मुख्य गरि तेलगु फिल्ममा अभिनय गर्ने ब्रह्मानन्दन संसारभरमै सबैभन्दा धेरै फिल्ममा काम गर्ने जीवित कलाकार पनि हुन्। उनलाई यो शीर्षकका लागि गिनिज वर्ल्ड रेकर्ड नै दिइएको छ। हालसम्म उनले हजारभन्दा धेरै फिल्ममा काम गरिसकेका छन्।
तेलगु मात्रै नभएर भारतभर बन्ने विभिन्न क्षेत्रीय सिनेमा तथा बलिउडमध्येकै पनि ब्रह्मानन्दन सबैभन्दा धेरै पारिश्रमिक पाउने हास्यकलाकार हुन्। १९५६ फेब्रुअरीमा भारतको आन्द्रप्रदेशको गुन्टुरस्थित सट्टेनापल्लीमा जन्मिएका ब्रह्मानन्दनले आफ्नो अभिनय यात्राको सुरुवात थिएटरबाट गरेका थिए।
जीवनका केही समय उनले भारतको पश्चिम गोदावरी जिल्लामा शिक्षकको रुपमा पनि काम गरे। शिक्षककै रुपमा कार्यरत रहँदा उनले थिएटरमा काम गर्ने र मिमिक्री आर्टिस्टको रुपमा काम गर्ने गर्थे।
ब्रह्मानन्दनको डेब्यु भने टेलिभिजनबाट भयो। सन् १९८५ मा उनले दूरदर्शन टेलिभिजनको तेलगु भाषाको क्षेत्रीय प्रसारणबाट प्रदर्शन हुने ‘पकापकलु’ नामक कार्यक्रमबाट पर्दामा प्रवेश गरेका थिए। उनले टेलिभिजन कार्यक्रममा गरेको अभिनयबाट प्रसन्न भएका निर्देशक जन्द्यालाले उनलाई १९८७ मा फिल्ममा प्रवेश गराए।
आफ्नै निर्देशनमा रहेको फिल्ममा जन्द्यालाले ब्रह्मानन्दनलाई रोल दिएका थिए, जुन उनको डेब्यु फिल्म पनि थियो। १९८७ को उक्त फिल्मको नाम ‘अहा ना–पल्लान्टा’ थियो। उक्त फिल्ममा अरा गुन्डुको भूमिकामा देखिएका ब्रह्मानन्दनको रोललाई समिक्षकदेखि दर्शक सम्पूर्णले मन पराए।
ब्रह्मानन्दनको ‘कमिक’प्रस्तुतिले धेरेको मन जित्यो। त्यसयता ब्रह्मानन्दन निरन्तर फिल्ममा देखिरहेका छन्। १९८८ देखि १९९० सम्म उनले काम गरेका सबैजसो फिल्महरु उनको करिअरका महत्त्वपूर्ण फिल्महरु हुन्। ‘विवाह भोजानम्बु (१९८८)’, ‘चोपुलु कलिसिना शुभाभेला (१९८८)’, ‘बोन्दुभुलोस्तुन्नरु जग्राता (१९८९)’, ‘बोब्बीली राजा (१९९०)’लगायतका फिल्महरुले निकै चर्चा कमाएका थिए।
१९९० अघि ब्रह्मानन्दन फिल्ममा मुख्य भूमिकामा पनि देखिएका थिए। १९९० पछि भने उनले आफूलाई हास्यकलाकारको रुपमा देखाउन थाले। फिल्ममा उनले गरेको काम व्यंग्यात्मक र हास्यरसले भरिएको हुन्थ्यो। जसकारण उनको चर्चा पनि निकै भएको थियो।
सन् १९९३ मा प्रदर्शनमा आएको फिल्म ‘मनी’मा गरेको कामका लागि उनले पहिलोपटक अवार्ड पनि पाएका थिए। उनलाई फिल्ममा गरेको अभिनयका लागि ‘उत्कृष्ट पुरुष हास्यकलाकार नन्दी अवार्ड’ दिइएको थियो।
ब्रह्मानन्दन निरनन्तर फिल्ममा देखिइरहेका छन्। उनले फिल्म क्षेत्र र कला समुदायमा पुर्याएको योगदानको कदर गर्दै भारत सरकारले उनलाई सन् २००९ मा सम्मान पनि गरेको थियो। भारत सरकारले सन् २००९ मा ब्रह्मानन्दनलाई ‘पद्यश्री’ अवार्ड प्रदान गर्दै उनको योगदानको सम्मान गरेको थियो।
सम्मान र पुरस्कारकै कुरा गर्ने हो भने ब्रह्मानन्दनले विभिन्न भूमिकाका लागि हालसम्म दर्जनौं सम्मान पाएका छन्। २००२ मा फिल्मफेयर, ६ वटा नन्दी अवार्ड, ६ वटा सिनेमा अवार्ड, तीन दक्षिण भारतीय अन्तर्राष्ट्रिय सिनेमा अवार्डलगायतका दर्जनौं अवार्ड उनको नाममा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786360041.jpg)
-1767836232.jpg){kind=logo}
-1786602170.png)
-1789631269.jpg)
