काठमाडौं– नबिल बैंकले नेपाल बंगलादेश बैंकलाई मर्ज गर्ने भएको छ। यसका लागि दुवै बैंकले अनौपचारिक रुपमा सहमति गरेर आ–आफ्नो तर्फबाट प्रक्रिया अघि बढाइसकेको श्रोतले बताएको छ। मर्जरको लागि दुवै बैंकले मर्जर समिति गठन समेत गरिसकेका छन्।
नबिल बैंकले सञ्चालक उदयकृष्ण उपाध्यायको संयोजकत्वमा यसअघि गठन भएको मर्जर समितिलाई नै उक्त जिम्मेवारी दिएको बैंकको श्रोतले जानकारी दिएको छ। नबिल बैंकले नेपाल बंगलादेश बैंकलाई मर्जर गर्ने भन्दा पनि प्राप्ति गर्ने प्रक्रियामा लागेको देखिन्छ।
नबिल र नेपाल बंगलादेश बैंक मर्जर तथा प्राप्तिमा जाने भन्ने हल्ला धेरै समय अगाडिबाट नै चल्दै आएको थियो। जसको कारण नेपाल बंगलादेशको सेयर मूल्य पटक पटक घटबढ् हुने गरेको पनि थियो।
कुनै पनि बैंक मर्जर हुनका लागि त्यसको सेयर मिलान अनुपात (स्वाप रेसियो) को विषयमा कुरा मिल्न पहिलो आवश्यकता रहेको हुन्छ। यसअघि सोही कुरा नमिल्दा बैंकको मर्जरको प्रक्रिया अगाडि बढ्न नसकेको चर्चामा आएको थियो। यी दुवै बैंकबीच अहिले ती विषयमा कुरा मिलिसकेकाले औपचारिक रुपमा दुवै संस्थाले प्रक्रिया अघि बढाएका हुन्।
स्रोतका अनुसार नेपाल बंगलादेश बैंकको प्रमुख सेयरधनी बंगलादेशको आईएफआईसी बैंकले उक्त सेयर बिक्री गरेर बाहिरिन लागेको छ। नेपाल बंगलादेश बैंकमा आईएफआईसी बैंकको ४० प्रतिशत (तीन करोड ६८ लाख २७ हजार ४२६ कित्ता) सेयर रहेको छ।
उक्त सेयर चौधरी ग्रुपले खरिद गर्न लागेको बताइन्छ। आजसम्मको समझदारी अनुसार एक साताभित्रै सहमतिपत्रमा हस्ताक्षर (एमओयू) गर्ने योजना रहेको नबिल बैंक श्रोतले जानकारी दिएको छ।
मर्जरको हल्लाले नेपाल बंगलादेश बैंकको सेयर मूल्य बढ्यो
नबिल बैंकसँग मर्जरमा जाने हल्लाले नेपाल बंगलादेश बैंकको सेयर मूल्य यससाताको कारोबार दिनहरुमा बढेको छ। यस साताको अन्तिम कारोबार दिन बुधबार यस बैंकको सेयर मूल्य ९.०८ प्रतिशतले बढेको नेपाल स्टक एक्सचेन्जले जानकारी दिएको छ।
हाल नेपाल बंगलादेश बैंकको मूल्य प्रतिकित्ता ४०२ रुपैयाँ रहेको छ। यस्तै, बुधबारसम्मको नेप्सेको तथ्यांक हेर्दा नबिलको १४५० रुपैयाँ सेयर मूल्य रहेको छ।
नबिलले गत आर्थिक वर्षको नाफाबाट घोषणा गरेको ३३.६ प्रतिशत सेयर बोनस र ४.४ प्रतिशत नगद लाभांश वितरण गर्न बाँकी नै छ। यसका लागि नबिल बैंकले शुक्रबार (भोलि)का लागि बुक क्लोज मिति तय गरेको छ।
बुकक्लोजपश्चात बैंकको मूल्य समायोजन भएर १०८५.३३ रुपैयाँमा सेयर कारोबार खुला हुने छ। नेपाल बंगलादेश बैंकले गत आर्थिक वर्षको नाफाबाट १२ प्रतिशत सेयर बोनस र ३.५ प्रतिशत नगद लाभांश वितरण गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
