सौराहा– नेकपा एमालेका नेता भीम रावलले 'असहज' वातावरणका बीच आफूले प्राप्त गरेको मतलाई महत्वपूर्ण ठानेको बताएका छन्।
मंगलबार साँझ चितवनको सौराहामा सञ्चारकर्मीसँग कुरा गर्दै रावलले भने, 'जुन वातावरणमा मैले यो मत प्राप्त गरेँ, त्यसलाई महत्वपूर्ण रुपमा लिएको छु।'
अध्यक्षको प्रतिस्पर्धामा केपी शर्मा ओलीसँग पराजित भएका रावलले आफू पार्टीको केन्द्रीय कमिटी सदस्य नरहेको पनि स्पष्ट पारेका छन्।
आफूले अध्यक्षमा मात्र उम्मेदवारी दिएको र त्यहाँ पराजय भोगेपछि अहिलेको अवस्थामा कुनै कमिटीमा नरहेको रावलको भनाइ छ।
'निर्वाचन आयोगसँग पनि मैले अध्यक्षमा मात्र उम्मेदवारी दिने हो, सदस्य होइन भनेको थिएँ। आयोगले दुईटै पद हो भने दुईटै लेख्नुहोला, एउटा भए एउटै हुन्छ भनेको थियो। वरिष्ठ उपाध्यक्ष (त्यसबेलाका महासचिव)लाई पनि मैले भनेको थिएँ। मतदान गर्नेबेला मेसिनमा सार्दाखेरी मैले देखेँ, अनि मैले त्यसबारे थप प्रष्ट पारेको थिएँ,' रावलले भने।
रावलले विधान महाधिवेशनबाट पारित गरिएको विधान र जनताको बहुदलीय जनवाद (जबज)अन्तर्गत अगाडि सार्न खोजिएको विषयलाई महाधिवेशनमा सम्बोधन गर्न नसिकएको बताए।
'विधान महाधिवेशनबाट जुन विधान पारित गरिएको थियो, जनताको बहुदलीय जनवाद (जबज) अन्तर्गत् जे कुरा अगाडि सार्न खोजेका थियौं, त्यसलाई यहाँ सम्बोधन गर्न सकिएन,' रावलले भने। नेता रावलले यस विषयमा आफूले पछि विवेचना गर्ने पनि बताए।
कमिटीमै नरहँदा कसरी काम गर्नुहुन्छ? भन्ने प्रश्नमा रावलले भने, 'भर्खर त महाधिवेशन सकियो, त्यसलाई भोलि सोचौंला नि।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
