काठमाडौं- प्रधानमन्त्री शेरबहादुर देउवाले हस्तकलाको व्यापारसँग सम्बन्धित करका समस्यालाई समाधान गर्ने बताएका छन्।
शुक्रबार काठमाडौंमा आयोजित नेपाल हस्तकला महासंघको १८औं हस्तकला व्यापार मेला तथा १६औं हस्तकला प्रतियोगिताको उद्घाटन गर्दै प्रधानमन्त्री देउवाले हस्तकला व्यापारको लागि करको समस्या समाधान गर्न सहजीकरण गर्ने बताएका हुन्।
उनले नेपाली हस्तकलालाई आधुनिक फेसनमा समावेश गराउन सके यसप्रतिको आकर्षण बढ्ने बताए। उनले भने, 'नेपालमा यस्तै महत्त्वपूर्ण उपलब्धिहरु हुन सक्छन्। हामीले हस्तकलालाई अझ विकास गर्न सक्यौं, कहिलेकाहीँ आधुनिक फेसनसँग मिल्ने पनि बनाउनुपर्ने हुन्छ। त्यसकारण त्यस्तै किसिमका कपडाहरु, फेसनसँग म्याच खाने कपडाहरु बनाउन सक्नुभयो भने त्यसले आकर्षण बढ्नेछ भने त्यस्तै कला पनि नेपालभरि नै वृद्धि हुनसक्छ।’
प्रधानमन्त्री देउवाले हस्ताकलाको मौलिक सीप नयाँ पुस्तामा हस्तान्तरणका लागि तालिम दिनुपर्ने आवश्यकता रहेको बताए।
कार्यक्रममा बोल्दै संस्कृति, पर्यटन तथा नागरिक उड्डयनमन्त्री प्रेमबहादुर आलेले नेपाली पहिचान र संस्कृति झल्कने हस्तकला विदेशमा निर्यात गरी विदेशमासमेत नेपाली चिनारीको प्रचार भएको बताए। उनले भने, ‘नेपाली हस्तकला व्यवसायीहरुले स्थानीय स्रोत, साधनको प्रयोग गरी स-साना औजारले नेपालको कला, संस्कृति, जीवनशैली झल्किने ढुंगा र धातुका मुर्तिहरु, काष्ठबाट बनेका विभिन्न काष्ठकलाहरु, तामाङ सभ्यताका थाङ्का चित्रहरु, मिथिला सभ्यताका चित्रहरु, पश्मिना, गलैँचा, ढाका कपडाका विभिन्न सामानहरुको उत्पादन तथा निर्माण गरी विदेशमा निर्यात व्यापार गरेर देशको चिनारी र प्रचारको साथै विदेशी मुद्रा देशभित्र भित्राउन सफल भएको छ।’
मन्त्री आलेले वार्षिक छ अर्ब रुपैयाँ मूल्य बराबरको हस्तकला विश्वका ८० देशमा निर्यात भएको बताए। आन्तरिक बजारमा दुई अर्ब रुपैयाँ बराबरको कारोबार गरी प्रत्यक्ष वा अप्रत्यक्ष रुपमा करिब सात लाखको संख्यामा रोजगारी सिर्जना भएको उनले जानकारी दिए। १८औं हस्तकला व्यापार मेला आगामी ५ गतेसम्म चल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791363924.png)
-1786602170.png)
