काठमाडौं- नेपाली कांग्रेसका नेता प्रकाशमान सिंहले आफूविरुद्ध दुष्प्रचार गर्नेहरुले हद नाघेको टिप्पणी गरेका छन्।
प्रदेशन १ को राजधानी विराटनगरमा बुधबार गणेशमान सिंह स्मृति फाउण्डेसनले आयोजना गरेको कार्यक्रममा बोल्दै उनले पार्टीमा सभ्यताको बहस हुनेगरे पनि आफूविरुद्ध टिप्पणी गर्नेहरु असभ्य भएको उल्लेख गरे।
शशांक कोइरालाले प्रकाशमान सिंहलाई काठमाडौं बाहिर कसैले नचिन्ने भनि दिएको अभिव्यक्तिमाथि कसैको नाम नलिइ जवाफ दिँदै उनले आफू ‘ग्रासरुट’ बाट राजनीति र संगठन गरेर आएको बताए। पदमा बसेर काम नगरेकाहरुले आफूविरुद्ध कुप्रचार गरेको उनको भनाइ थियो।
'संविधान जारी हुँदा उपप्रधान मन्त्री भएको मान्छे हुँ, गिरिजाप्रसाद कोइरालाको पालामा उपसभापति, शुशिल कोइरालाको निर्वाचित महामन्त्री र शेरबहादुरले पार्टी विभाजन गर्दा पनि जिम्मेवार पदमा बसेर काम गरेको मान्छे हुँ म,' उनले भने, 'आफू कुनै पदमा बसेको छैन, अरुलाई पनि त्यही देख्ने, फलानेकोको के छ के छ भन्दै उफ्रने।'
नेता सिंहले पहिले पहिले काठमाडौंले पनि नचिन्ने भन्दै आफूविरुद्ध प्रचार भए पनि पछिल्लो समय काठमाडौं बाहिर कसैले नचिन्ने भन्दै दुष्प्रचार नियतवस् हुन थालेको भन्दै आक्रोश पोखे। आफू १२ औं महाधिवेशनमा सभापति सुशिल कोइरालाले भन्दा बढी मत ल्याएर महामन्त्री जितेको भन्दै अहिले आफूसँग भोट छैन भन्नेहरुले इतिहास हेर्न चेतावनी दिए।
“पहिले काठमाडौमा चिन्दैन भन्थे अहिले काठमाडौंमा चाहिँ चिन्छ, बाहिर चाहिँ चिन्दैन भन्छन्,” उनले भने।
नेता सिंहले आफ्नो राजनीतिक इतिहास पल्टाएर हेर्न पनि आग्रह गरे। आफू गणेशमान र मंगलादेवीको छोरा भए पनि पार्टी र देश संकटमा पर्दा ज्यानको बाजी राखेर आन्दोलनमा होमिएको बताए। “हो म गणेशमान र मंगलादेवी सिंह को छोरा हुँ र म पार्टी संकटमा हुँदा ज्यानलाई बाजी राखेर काम गरेको मान्छे पनि हुँ,” उनले भने । त्यतिबेला अहिले मै हुँ भन्ने नेता कहाँ थिए सबैलाई याद हुनु पर्यो नि!'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।