रामपुर– तिहारको समयमा बढी मात्रामा प्रयोग हुने झिनियाँको माग बढ्न थालेपछि रामपुरका घरेलु उद्यमीलाइ भ्याइनभ्याइ भएको छ।
यहाँका घरेलु उद्यमीले तयार गर्ने झिनियाँ रोटीको माग पाल्पालगायत अन्य ठाउँबाट पनि आउन थालेपछि भ्याइनभ्याइ भएको हो। झिनियाँको माग बढेपछि यहाँका घरेलु उद्यमीसमेत खुसी छन्। गत वर्ष कोरोना भाइरस सङ्क्रमणको उच्च जोखिमका कारण राम्रोसँग व्यापार हुन सकेको थिए।
नेपाली समाजमा तिहारको भाइटीकामा सप्तरङ्गी झिनियाँ कोसेलीको रुपमा दाजुभाइलाई खुवाउने परम्परा रहेपनि अन्य चाडबाडमा पनि यसको माग बढ्न थालेपछि बाह्रैमहिना झिनियाँ रोटी बनाउन भ्याइनभ्याइ भएको उद्यमी बताउँछन्।
यहाँका उद्यमीले दसैंतिहारलाई लक्षित गरी दुई महिना अगाडिदेखि नै झिनियाँ रोटी बनाउन थालेका थिए। विशेषगरी तिहारको बेलामा झिनियाँको माग अत्याधिक हुने भएकाले आफूले एक महिनादेखि झिनियाँ रोटी बनाइराखेको रामपुर नगरपालिका–५ राङ्गभाङ्गका मैयाँ (लक्ष्मी) श्रेष्ठले बताइन्।
उनको दैनिकी यतिखेर झिनियाँ बनाउँदैमा बितेको छ। तिहारको अवधिमा मात्रै ९० क्विन्टलभन्दा बढी झिनियाँ बिक्री गरेकी उनले यही सिजनमा सात लाख रुपैयाँसम्मको झिनियाँका परिकार बिक्री गर्ने बताइन्। रामपुरमा व्यवसायिक रुपमा झिनियाँ उत्पादन गर्ने पुरानो उद्यमी श्रेष्ठले आठ जनालाई रोजगारीसमेत दिएकी छन्। घरभित्रै बसेर छोटो समयमा राम्रो कमाइ गर्न सकिने उनले बताइन्।
तिहारमा दाजुभाइलाई सप्तरङ्गी टिकासँगै सप्तरङ्गी झिनियाँसमेत खुवाउने परम्परा रहेकाले उद्यमीहरु विभिन्न रङ्गका झिनियाँ निर्माण गर्न व्यस्त देखिएका छन्। उद्यमीहरुका अनुसार एक हजार ४०० को चामलबाट करीब दुई हजार ५०० देखि तीन हजारसम्मको झिनियाँ तयार गर्न सकिन्छ। थोक मूल्यमा दर्जनको एक सय रुपैयाँ तथा फुटकर रु १५० मा बिक्री गर्दै आइरहेका यहाँका उद्यमीले यतिबेला झिनियाँ तयार गरेर सुकाउनमा व्यस्त हुने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
