काठमाडौं- नेपाल राष्ट्र बैंकले आयातित वस्तुमा ५० प्रतिशतभन्दा बढी कर्जा प्रवाह हुँदा बैंकिङ क्षेत्रमा तरलताको समस्या आएको जनाएको छ। राष्ट्र बैंकका गभर्नर महाप्रसाद अधिकारीले मुलुकको आन्तरिक उत्पादन र आर्थिक वृद्धिमा भन्दा पनि बढी मात्रामा आयातित वस्तुमा कर्जा प्रवाह हुँदा सो समस्या देखिएको प्रस्ट पारेका हुन्।
नेपाल आर्थिक पत्रकार समाज (सेजन)ले सोमबार काठमाडौंमा आयोजना गरेको ‘गहिरिँदो तरलता अभाव : कारण र समाधान’ विषयक अन्तर्क्रिया कार्यक्रममा बोल्दै उनले कोभिडका कारण रेमिट्यान्स घटनु, कर्जा प्रवाहको समय थप गर्नु, सरकार परिवर्तनसँगै बजेट पुनर्विचार हुँदा पनि त्यसको प्रत्यक्ष असर बैंकिङ क्षेत्रको तरलतामा देखिएको बताए।
‘राष्ट्रिय राजनीतिको पनि असर भयो। सरकार परिवर्तन भयो। सरकार परिवर्तन भएपछि बजेटमा पुनर्विचार भयो। पुनर्विचार गर्ने भएपछि सुरुमै खर्च गर्ने अवस्था भएन। यसको असर पनि तरलतामा पर्यो। तर, पछिल्लो दिनमा खर्च भएको अवस्था छ। कर्जा जानु विजनेसका लागि ठिकै छ तर हामीकहाँ समस्या आन्तरिक उत्पादन र आर्थिक वृद्धिमाभन्दा पनि बढी आयातको वृद्धिमा गाँसिएको देखिन्छ। गएको कर्जामध्ये ५० प्रतिशतभन्दा बढी आयातमा खर्च भइरहेको पाउँछौं। यसले पनि बैंकिङ क्षेत्रमा तरलताको अवस्था देखिएको छ,' गभर्नर अधिकारीले भने।
उनले उत्पादनमूलक क्षेत्रमा कर्जा प्रवाह गर्न पनि बैंक तथा वित्तीय संस्थाहरुलाई सचेत गराए। उनले सस्तो ब्याजदरमा कर्जा दिने कामले पनि बैंकिङ क्षेत्रमा तरलताको अभाव देखिने अवस्था आएको बताए।
नेपाल उद्योग वाणिज्य महासंघका अध्यक्ष शेखर गोल्छाले तरलता अभावका कारण ४५ लाख लगानीकर्ता प्रभावित भएको बताए। उनले ब्याजदर बढ्नुले साना उद्यमी, व्यवसायीहरुको पुनर्उत्थान तत्काल गर्न सकिने अवस्था नरहेको गुनासो गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
.jpg)
-1763721444.png)
