काठमाडौं- भिडियो स्ट्रिमिङ माध्यम ‘नेटफ्लिक्स’ केही महिनाअघिसम्म १० अर्बभन्दा धेरै घाटामा थियो। यो वर्ष नेटफ्लिक्सको सेयरमा पनि आठ प्रतिशतभन्दा कम थियो। धेरैले नेटफ्लिक्सले यो घाटाबाट उठ्न नसक्ने अनुमान गरिरहेका थिए।
व्यापार घाटादेखि दर्शकमा पहिलेको जस्तै उत्साह नपाइरहेको नेटफ्लिक्स मानिसहरुको अपेक्षाविपरीत भयो। एकाएक अर्बौंको व्यापार घाटा बेहोरिरहेको नेटफ्लिक्सले एउटा शोका कारण आफैंलाई पुन:जीवितजस्तै बनायो।
उक्त शो थियो, कोरियाली वेब सिरिज ‘स्क्विड गेम।’
सेप्टेम्बर १७ मा नेटफ्लिक्समार्फत् सार्वजनिक भएको उक्त सिरिजले विश्वबजारमा चर्चामा कमाउनुका साथै नेटफ्लिक्सलाई पनि व्यापार घाटाबाट उठ्न मद्दत गरेको छ। स्ट्रिमिङका लागि अमेजन प्राइम, डिज्नी प्लस, एचबीओ म्याक्सजस्ता अन्य ओटीटी माध्यमको सुरुआत भएयता निरन्तर ओरालो लागिरहेको नेटफ्लिक्सको बजार स्क्विड गेम सिरिजकै कारण फेरि उठेको छ। उक्त सिरिज सार्वजनिक भएयता नेटफ्लिक्समा चार करोडभन्दा धेरै नयाँ प्रयोगकर्ता नेटफ्लिक्समा थपिएका छन्।
स्क्विड गेम सार्वजनिक भएको सुरुआती चार हप्तामा यो विश्वकै सबैभन्दा धेरै हेरिएको सिरिज थियो। निरन्तर चार हप्तासम्म उक्त स्थान यसैले ओगट्यो। सो अवधिमा विश्वभरबाट नेटफ्लिक्समै मात्र यो सिरिजलाई एक अर्ब ४२ करोड दर्शकले हेरिसकेका थिए।
कोरियाको परिवेशमा निर्माण भएको सिरिजको चर्चा कोरियामाभन्दा बाहिरी देशमा बढी छ। विश्वभरका ९० देशमा सार्वजनिक भएको उक्त सिरिजका ९५ प्रतिशतभन्दा धेरै दर्शक कोरिया बाहिरका छन्।
करिब एक घण्टाका नौ एपिसोड छन् स्क्विड गेममा। स्क्विड गेम ४५६ जना ऋणमा डुबेका मानिसहरु, जो आफ्नो आर्थिक अवस्थाका कारण अञ्जान परिवेश र परिस्थितिमा आयोजना हुने खेल खेल्न पुग्छन्, उनीहरुको कथा हो। उनीहरुले पाँच खेल खेल्नुपर्ने हुन्छ, जुन खेलहरु जितेमा उनीहरुले सोचेभन्दा निकै धेरै रकम पुरस्कारको रुपमा पाउँछन्। उक्त रकम जित्नेको जीवनलाई परिवर्तन गर्नमा पर्याप्त हुन्छ।
तर, खेलमा हारे उनीहरुलाई खेलबाट हटाइन्छ। यहाँ खेलबाट हटाउनु भनेको उनीहरुलाई मारिनु हो। जसले खेल जित्न सक्दैनन्, उनीहरुले खेलमा भएका गार्डहरुले हत्या गरिदिन्छन्। जसले ती सम्पूर्ण खेल सफलतापूर्वक जित्छ उसले तीन करोड ९० लाख अमेरिकी डलर बराबरको पुरस्कार पाउँछ।
बालबालिकाले खेल्ने खेलमा आधारित रहेको एउटा सिरिजले कसरी विश्वभर यस्तो चर्चा कमायो त? के छ स्क्विड गेममा जसले नेटफ्लिक्सकै भविष्य निर्धारण गर्ने किसिमको व्यापार गरेको छ?
सिरिजमा कोरियाली बालबालिकाले खेल्ने साधारण खेलहरुलाई हिंसात्मक रुपमा देखाइएको छ। सिरिजका निर्देशक ह्वान डोङ्-ह्युकले एक अन्तर्वार्तामा भनेअनुसार हुर्केका मानिसहरुले बच्चाको खेल जित्न ज्यानको बाजी थापेको कारण मानिसहरु यो सिरिजप्रति आकर्षित भएका हुन्। खेलहरु साधारण भएका कारण दर्शकहरुले खेलका नियममाभन्दा पनि खेल खेल्ने पात्र र ती खेलहरुको चरित्रमा केन्द्रित भएर आफूलाई जोड्न सकेका कारण सिरिज चर्चित भएको उनले ठानेका छन्।
अर्कातिर, सिरिजमा भएका पात्रहरु रिलेटेवल छन्। दर्शकले ती पात्रहरुमा आफूलाई सहजरुपमा राखेर हेर्न सक्छन्। सामाजिक रुपमा तल्लो तहमा रहेका पात्रहरुले आफ्नो जीवनका लागि खेलिरहेको खेल र त्यसमार्फत् रमाइरहेका केही कुलीन (इलाइट) वर्गलाई सिरिजमा देखाइएको छ। सिरिजमा रहेका भीआईपीहरु सामाजिक रुपमा माथिल्लो तहमा भएका व्यक्तिहरु हुन्, जो तल्लो तहका व्यक्तिहरुको दुर्दशा देखेर रमाइरहेका हुन्छन्। कुनै घोडा दौडमा बाजी थापिएजस्तै उनीहरु मानिसको जीवनमाथि बाजी थापेर सरह खेलको स्वाद लिन्छन्। सिरिजमा एक खेल सकिएपछि को जीवित हुन्छ र को मृत हुन्छ भन्ने कुरामा रमाइरहेका भीआईपी र खेल खेलिरहेका पात्रहरु हाम्रै समाजको यथार्थसँग जोडिन्छन्।
सिरिज सार्वजनिक भएपछि समीक्षकहरुले पनि यो सिरिजलाई कोरियाली समाजमा भएको आर्थिक र सामाजिक असमानतामाथिको टिप्पणीको रुपमा समीक्षा गरेका थिए। यसका निर्देशकले पनि आफूले आधुनिक पुँजीवादी समाजमा भइरहेको चरम प्रतिस्पर्धा देखाउने किसिमको काम गर्न खोजेको बताएका थिए। सन् २००८ देखि आर्थिक मन्दीको शिकार भइरहेको विश्वमा त्यसको असरले ग्रसित निम्न वर्गका मानिसहरुले आफ्नो जीवनलाई निरन्तरता दिनका लागि ऋण तिर्न कुन हदसम्म गएका छन् भन्ने सिरिजमा देखाइएको छ। तर, एउटा वर्गका लागि बाध्यता भएको यो कुरा अर्को वर्गका लागि रमाइलोको माध्यमजस्तै बनेको छ। अहिलेको समाजमा भइरहेको असमानता, जीउनकै लागि भइरहेको प्रतिस्पर्धाजस्ता यथार्थलाई सिरिजमा बालबालिकाको खेलको माध्यमबाट देखाइनुले पनि दर्शकलाई यसतर्फ आकर्षित गरेको देखिन्छ।
अर्कातिर, बालबालिकाको खेलमा वयस्क मानिसले गरेको अभिनय निकै शानदार छ। सिरिजको प्रमुख पात्र सियोङको भूमिकामा अभिनय गरेका लि जंग जेइदेखि कांग सी बियोकको भूमिकामा रहेका होयन जंग, अब्दुल अलिको भूमिकामा रहेका अनुपम त्रिपाठी, ओ इल नामको भूमिकामा रहेका योङ सु ओलगायतका सबै कलाकारको अभिनय सिरिजमा बराबर महत्त्वपूर्ण छ। सिनेमाको लेखनमा नै हरेक पात्रको भूमिकालाई केन्द्रित गरेर उनीहरुको चरित्र निर्माणदेखि सिरिजभर उनीहरुले चाल्ने हरेक कदम र उनीहरुको मृत्यसम्मका घट्नाक्रमहरुलाई ‘पर्फेक्ट’ बनाएर निर्माण गरिएको छ।
दक्षिण कोरियाबाट उत्पादन भइरहेका फिल्मदेखि गीतसंगीत तथा अन्य मनोरञ्जनका सामग्रीहरुभन्दा फरक रहेर बनेकै कारण पनि स्क्विड गेमले अर्कै ‘हाइप’ बनाएको छ। कोरियाली ‘के-पप’ विश्वमा जमाएको वर्चश्व, प्रेम कथामा आधारित सिनेमा तथा सिरिजबीच ‘सर्भाइभल’ जन्रमा निर्माण भएको स्क्विड गेमले बाहिरी विश्वलाई कोरियाली समाजको असमान यथार्थ उद्घाटित गरेको छ।
स्क्विड गेमको निर्माण सफलतापूर्वक गरिएको छ। यसका दृश्यहरुलाई उल्लेखनीय रुपमा न्याय गर्दै खिचिएको छ। सिनेमा वा कुनै पनि दृश्यसँग सम्बन्धित कुरा हेर्दा आवश्यक हुने ‘आश्चर्य’ सिरिजमा दर्शकले पाउँछन्। हरेक एपिसोडमा दर्शकले अपेक्षा गरेभन्दा फरक किसिमको दृश्य देखिन्छ।
उदाहरणका लागि सिरिजमा अन्य प्रतिस्पर्धीसँगै खेलमा भाग लिइरहेका ओ इल नामलाई दर्शकले सिरिजको अन्त्यसम्म नपुग्दा सामान्य प्रतिस्पर्धीको रुपमा सोचिन्छ। तर, सिरिजको अन्त्यमा यो खेलको सुरुआतकर्ता नै ऊ भएको रहस्य खुल्छ। अस्पतालको बेडमा मृत्यु कुरिरहेको इल नामले आफूलाई जीवनमा मनोरञ्जन चाहिएका कारण आफूले मृत्युसँग साक्षात्कार हुने खेल सुरु गरेको बताउँदा त्यसले दर्शकलाई पनि सोच्न बाध्य बनाउँछ। दर्शकले अपेक्षा गरेविपरीत सिरिजमा दृश्यहरु आउनुले पनि यसलाई सफल हुनमा भूमिका खेलेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
