मङ्गलबारे- प्रधानमन्त्री शेरबहादुर देउवाले बाढीपहिरो पीडितका लागि थप राहतको व्यवस्था गर्ने बताएका छन्।
इलाम र पाँचथरको बाढीपहिरो प्रभावित क्षेत्रको निरीक्षणपछि पाँचथरको फाल्गुनन्द गाउँपालिकाको जलसिङ माविमा आयोजित कार्यक्रममा उनले चाँडै मन्त्रिपरिषद्को बैठक राखेर राहतसम्बन्धी थप निर्णय लिने बताएका हुन्।
उनले सरकारले यसअघि नै मृतकका परिवारलाई दुई लाख रुपैयँ राहत उपलब्ध गराउने निर्णय गरिसकेको स्मरण गराउँदै सरकारले थप राहतको व्यवस्था गर्ने घोषणा गरेका हुन्। उनले भने, 'पहिरोले घर बनाउने ठाउँ नहुनेलाई जग्गा जमिन दिएर भए पनि घर बनाइदिने र घर भत्किएकालाई घर बनाउन मद्दत गर्छौं, हामीले स्थलगतरुपमा नै अध्ययन गरेका छौँ, भएको क्षति नोक्सानीको सरकारले मूल्याङ्कन गरेर क्याबिनेट बसेर निर्णय लिन्छौँ।'
प्रधानमन्त्री देउवाले बेमौसममा परेको पानीले मेचीदेखि महाकालीसम्म ठूलो क्षति पुर्याएको जनाउँदै सरकार पीडितको साथमा रहेको बताए। पहिरोपीडितलाई सम्बोधन गर्दै उनले भने, 'हामी तपाईंहरुको साथमा छौं, त्यही भएर हामी आएका हौं।'
उनले बाढीपहिरोबाट प्रभावित क्षेत्रका नागरिकलाई एकै ठाउँमा बसोबास गर्ने व्यवस्था मिलाउने वा नयाँ सहर बनाउने विषयमासमेत सोचिरहेको बताए। उनले भने, 'नेपाल गाउँको देश हो, नेपालबाट गाउँ हटाउन सकिँदैन, धेरैलाई गाउँको माया छ गाउँ छाड्न सक्दैनन्, गाउँमा गर्न सकिने कुरा गाउँमा नै पुर्याउन सकिन्छ।'
यसैबीच, नेपाली कांग्रेसका सभापतिसमेत रहेका उनले पार्टीको महाधिवेशन तोकिएकै मितिमा हुने बताए। कांग्रेस कार्यकर्तालाई छुट्टै सम्बोधन गरेका देउवाले भने, 'दुई-चार दिन यताउता हुनु सामान्य कुरा हो, महाधिवेशन तोकिएकै मितिमा हुन्छ।' देउवाले सहमतिमा नै नेतृत्व चयनको प्रयत्न गर्न कार्यकर्तालाई निर्देशनसमेत दिए।
'भरसक सहमतिमा नै गर्नुहोस्, सहमति नभए प्रतिस्पर्धा हुन्छ, हार्नेले जित्नेलाई सघाउने हो,' उनले भने। निरीक्षणका क्रममा प्रधानमन्त्रीसँगै सूचना तथा सञ्चार प्रविधिमन्त्री ज्ञानेन्द्रबहादुर कार्की, ऊर्जा तथा जलस्रोतमन्त्री पम्फा भुसाललगायत सहभागी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1763559424.jpg)
-1764080971.png)
