काठमाडौँ- राष्ट्रिय ध्वजाबाहक नेपाल वायुसेवा निगम (नेपाल एयरलाइन्स)का कर्मचारीले विगत १०४ दिनदेखि गरिरहेको आन्दोलन स्थगित भएको छ। गएको सोमबार संस्कृति, पर्यटन तथा नागरिक उड्डयनमन्त्री प्रेम आलेसँग छलफल गरेपछि कर्मचारीले आन्दोलनका कार्यक्रम स्थगित गरेका हुन्।
वायुसेवा निगमलाई कम्पनी मोडलमा लैजाने प्रक्रिया अघि बढेपछि संस्थालाई निजीकरण गर्न लागिएको भन्दै निगमभित्रका ट्रेड युनियनले आन्दोलन गर्दै आएका थिए। उनीहरुले गत असार १८ देखि असोज २५ सम्म कार्यालय समयमा निरन्तर धर्ना र नाराबाजी गर्दै विरोध जनाएका थिए।
नयाँ सडकस्थित निगमको मुख्यालयमा बिहान १० बजेदेखि दिउँसो १ बजेसम्म हरेक दिन कर्मचारीले धर्नाको कार्यक्रम गर्ने गरेका थिए। झण्डै तीन महिनापछि संस्कृति, पर्यटन तथा नागरिक उड्डयन मन्त्रालयले विभागीय मन्त्री पाएपछि निगमभित्रको समस्या किनारा लाग्ने वातावरण बनेको हो।
प्रधानमन्त्री शेरबहादुर देउवाले असोज २२ गते पर्यटन मन्त्रीमा प्रेम आलेलाई नियुक्त गरेका थिए। निगमलाई कम्पनी लिमिटेड बनाउने, ५१ प्रतिशत शेयर निजी क्षेत्रलाई दिने र निगमको अस्तित्व नै मेटाउने गरी बोर्ड लागेको भन्दै कर्मचारीले विरोधस्वरुप गरेको आन्दोलनको एक सय दिनमा निगमको तालुक निकाय संस्कृति, पर्यटन तथा नागरिक उड्डयन मन्त्रालयले मन्त्री पाएको थियो। पदबहालीका क्रममा मन्त्री आलेले निगमलाई सुदृढ र प्रभावकारी ढंगले अघि बढाउने उद्घोष गरेका थिए।
निगमका महाप्रबन्धक डिमप्रसाद पौडेलका कारण वायुसेवा निगम घाटामा गइरहेको कर्मचारीको आरोप थियो। निगमका महाप्रबन्धक पौडेलले निगमलाई निजीकरण गर्न प्रबन्ध पत्र र नियमावली परिवर्तन गरेर मन्त्रालय पठाएको पनि कर्मचारीको दाबी थियो। कर्मचारी आन्दोलन रोक्न पर्यटन मन्त्रालयले निगमलाई निजीकरण गर्ने विषयमा छलफलसमेत नभएको र कम्पनी मोडलमा लैजाने प्रस्तावलाई अगाडि नबढाएको स्पष्ट पारेको थियो।
तर, कर्मचारीले आन्दोलन रोकेका थिएनन्। आन्दोलनका कारण महाप्रबन्धक पौडेल १०२ दिनदेखि कार्यालय पुग्न सकेका थिएनन्। कर्मचारीको आन्दोलन स्थगित भएसँगै लामो समयदेखि अस्तव्यस्त बनेको निगमको काम कारबाही सहज हुने महाप्रबन्धक पौडेलको भनाइ छ।
‘विभागीय मन्त्री आएसँगै निगमका कर्मचारीले जिम्मेवारी महसुस गरेर संघर्षका कार्यक्रम स्थगित गरेका छन्, यसले निगमको सकारात्मक सन्देश गएको छ। बाँकी काम कारबाहीलाई प्रभावकारी ढंगले अघि बढाउँछौँ’, उनले भने। निगमलाई कम्पनी लिमिटेड बनाउने कार्ययोजनाबारे पुनः छलफल गरेर मात्र निर्णय लिइने पनि महाप्रबन्धक पौडेलले बताए।
मन्त्री आले तथा वायुसेवा निगमका कर्मचारीबीच निगमका महाप्रबन्धक पौडेलका विषयमा उठेका समस्या कानूनसम्मत तरिकाले समाधान गर्ने सहमति पश्चात आन्दोलनका सबै कार्यक्रम स्थगित भएको नेपाल राष्ट्रिय कर्मचारी युनियनका अध्यक्ष सुवास डाँगीले जानकारी दिए। उनले भने, ‘महाप्रबन्धक र हामी कर्मचारीबीच समस्या समाधान गरिने सहमति भएको छ, मन्त्रीले हामीलाई १५ दिनको समय दिनुभएकाले हामीले आफ्ना आन्दोलनका कार्यक्रमलाई स्थगित गरेका छौँ।’
यसअघि सरकारले गठन गरेको विभिन्न सात वटा समितिले निगमलाई कम्पनी मोडलमा लैजानुपर्ने र निजीकरण गर्नुपर्छ भन्ने सुझाव दिएकाले कार्यान्वयनको पहल सुरु गरिएको निगम व्यवस्थापनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764492941.png)
-1764146706.png)
-1763721444.png)
-1763559424.jpg)
-1764080971.png)
