समाचार

टुँडिखेलमा सेनाको फूलपाती बढाइँ [तस्बिरहरु]

रासस मंगलबार, असोज २६, २०७८ १८:३१

काठमाडौं- राष्ट्रपति विद्यादेवी भण्डारीले फूलपाती बढाइँ अवलोकन गरेकी छन्। नेपाली सेनाद्वारा आज सैनिक मञ्च टुँडिखेलमा आयोजित समारोहमा सरिक भइ उनले फूलपाती बढाइँ अवलोकन गरेकी हुन्। राष्ट्रपति भण्डारी नेपाली सेनाका परमाधिपति हुन्।

समारोहमा सैनिक हेलिकप्टरबाट पुष्पवृष्टि गरिनुका साथै राइफल र तोपबाट लहरे एवं एकठ्ठा बढाइँ गरियो। त्यस अवसरमा इज्जत अर्पण कवाज, विभिन्न गुल्मद्वारा बढाइँ, मार्चपाससहितको बढाइँ र सैनिक ब्याण्डबाट मालश्री र दुर्गा स्त्रोत्रका धुन प्रस्तुत भयो।

कोभिड-१९ को सङ्क्रमण जोखिमका कारण विगत वर्षदेखि नै फूलपाती बढाइँ धर्म, संस्कृति र परम्परालाई निरन्तरता दिन सानो र छरितो कार्यक्रम गरिँदै आएको छ।

उपराष्ट्रपति नन्दबहादुर पुन, प्रधानमन्त्री शेरबहादुर देउवा, प्रधानन्यायाधीश चोलेन्द्र शमशेर राणा, सभामुख अग्निप्रसाद सापकोटा र राष्ट्रिय सभाका अध्यक्ष गणेशप्रसाद तिमिल्सिना समारोहमा सहभागी थिए।

मन्त्री, संवैधानिक निकायका प्रमुख, नेपाल सरकारका उच्च पदस्थ अधिकृत, सुरक्षा निकायका प्रमुखलगायत समारोहमा उपस्थित थिए।

बढाइँ समारोहमा आएका विशिष्ठ पाहुनालाई बलाध्यक्षरथी बालकृष्ण कार्कीले स्वागत अभिवादन गरेका थिए।