सेयरबजार निरन्तर घटेपछि इन्भेस्टर्स फोरमले सरकारसमक्ष राख्यो ५ बुँदे माग

बैंक/बिमा/सेयर

सेयरबजार निरन्तर घटेपछि इन्भेस्टर्स फोरमले सरकारसमक्ष राख्यो ५ बुँदे माग८ खर्बभन्दा बढी गुमाइसक्दा पनि सरकार र सरोकारवाला निकाय मौन रहेकोप्रति आपत्ति

नेपाल लाइभ सोमबार, असोज १८, २०७८ १५:४८

काठमाडौं- नेपाल इन्भेस्टर्स फोरमले सेयरबजार निरन्तर ओरालो लागेकोप्रति आफ्नो ध्यानाकर्षण भएको जनाएको छ। फोरमले सोमबार विज्ञप्ति जारी गर्दै सेयरबजार सुधारका लागि सरकारसँग पाँच बुँदे माग अघि सारेको छ।

लानीकर्तामैत्री नीति नियम नभएकै कारण सेयरबजारमा निरन्तर गिरावट आएको भन्दै सेयर बजारमा विश्वसनीयता बढाउनका लागि उक्त मागहरु अघि सारेको फोरमले जनाएको छ।

फोरमले केन्द्रीय बैंकले ल्याएको सेयर धितो कर्जाको सीमा खारेज गर्नुपर्ने, नयाँ ब्रोकर थप्नुपर्ने, बैंकका सहायक कम्पनीलाई ब्रोकर लाइसेन्स दिनुपर्ने, ब्रोकर कमिसन घटाउनुपर्ने, धितोपत्र बोर्ड र नेप्सेका प्रमुख यथाशीघ्र नियुक्त गर्नुपर्ने लगायतका मागहरु अघि सारेका छन्।

'नेपालको पुँजीबजारको इतिहासमा सबैभन्दा बढी पुँजीकृत रकम आठ खर्ब रुपैयाँभन्दा बढी गुमाइसक्दा पनि सरकार र यसका अन्य निकायहरू मौन रहनाले ४४ लाखभन्दा बढी लगानीकर्ताहरू अझ बढी मर्माहत भएका छन्,' फोरमद्वारा जारी विज्ञप्तिमा उल्लेख छ, 'मुलुकले दशकौंको राजनीतिक अन्योललाई पार गर्दै अबका दिनमा मुलुक आर्थिक विकास र समृद्धिको नयाँ गोरेटोमा प्रवेश गर्नेछ भन्ने नयाँ सरकारको उद्घोषले निकै उत्साहित लगानीकर्ताहरूमा अर्थतन्त्रको मेरुदण्डको रुपमा रहेको सेयरबजार निरन्तर रुपमा घटिरहनु र जिम्मेवार निकायहरू बेखबरजस्तै रहनुले भनाइ र गराइमा फरक रहेको स्पष्ट देखिन्छ।'

विषम् परिस्थितिमा संयम र धैर्यता, सुझबुझका साथ लगानी गर्न लगानीकर्तालाई फोरमले अनुरोध गरेको छ।

यी हुन् फोरमका मागहरु:

१. नेपाल राष्ट्र बैंकको मौद्रिक नीति २०७८ र एकीकृत निर्देशिकाले सेयर धितो कर्जालाई कुनै एउटा बैंकबाट चार करोड र तीन वटा बैंकबाट १२ करोडको सीमा तोकेर लगानी गर्ने वातावरणमा निरुत्साहित गरेको कारण उक्त नियम तुरुन्त खारेज गरियोस्।

२. नयाँ ब्रोकर संख्याहरू थप गरी वाणिज्य बैंकको सहायक कम्पनीलाई ब्रोकर लाइसेन्स दिइ उक्त बैंकहरूको देशभरिको सबै शाखाहरूबाट कारोबार गर्ने सुविधा विस्तार गरियोस्।

३. ब्रोकरमार्फत् हुने मार्जिन कर्जा यथाशीघ्र उपलब्ध गराइयोस्।

४. हालको कारोबार हेर्दा ब्रोकर कमिसन अत्यन्त महँगो भएको हुनाले समयसापेक्ष अविलम्ब समायोजन गरियोस्।

५. पुँजीबजारलाई नियमन गर्ने नेपाल धितोपत्र बोर्ड र नेपाल स्टक एक्सचेञ्ज लामो समयदेखि निमित्तको भरमा रहेको हुँदा उक्त नेपाल धितोपत्र बोर्ड र नेपाल स्टक एक्सचेञ्जमा योग्य व्यक्ति अविलम्ब नियुक्ति गरी यथाशक्य चाँडोभन्दा चाँडो आमलगानीकर्ताको समस्या समाधान गरियोस्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

माइती नेपाललाई एक करोड रुपैयाँ दिने प्रधानमन्त्री ओलीको घोषणा

नेपाली र भारतीय सेनाको संयुक्त अभ्यास सूर्यकिरण सम्पन्न

जापानमा ६.८ म्याग्निच्युडको भूकम्पपछि सुनामीको चेतावनी