रामपुर (पाल्पा)- पर्यटकीय गन्तव्यस्थल रहेका तालपोखरामा डुङ्गा सञ्चालन भएपछि चहलपहल बाक्लिँदै छ। पहिलो चरणको कोरोनाको कहर सुरु भएदेखि नै स्वास्थ्य सुरक्षालाई ध्यानमा राख्दै बन्द गरिएको थियो। रामपुर नगरपालिका ६ स्थित यस पर्यटकीय तालपोखरामा डुङ्गा सयर गर्दै तस्बिर खिचाउने, टिकटक बनाउने र ताल वरपर घुम्ने आन्तरिक पर्यटक बढ्दै छन्।
नेपाल महिला संघ रामपुर नगर उपसभापति सावित्रा गैह्रेले भनिन्, 'कोभिड-१९ ले अन्यत्र घुम्न जान नपाएका अवस्थामा डुङ्गामा रमाउँदा धेरै रमाईलो भयो, पर्यटक आउने फर्कने क्रम चलिरहेको छ, यहाँको वातावरणले पर्यटकलाई लोभ्याइरहेको छ।'
स्थानीयवासी पार्वती न्यौपानेले डुङ्गा सयर गरेर मन्दिर परिक्रमा गर्दा फेवातालको जस्तै अनुभूति गरेको बताइन्। कोरोनाले डुङ्गा बन्द भएका बखत पनि तालको रमणीय वातावरणसँग बेला-बेलामा आउने गरेको उनले जानकारी दिइन्। डुङ्गा बन्द गरिए पनि विभिन्न स्थानबाट आन्तरिक पर्यटक तालपोखराको बाहिरी परिसर घुमेर मात्रै भए पनि फर्कने गर्थे। कोरोनाको जोखिम कम हुँदै गएपछि पर्यटकलाई लक्षित गरी संविधान दिवसको अवसर पारेर तालपोखरामा डुङ्गा सञ्चालनमा ल्याइएको तालपोखरा संरक्षण समितिका अध्यक्ष सागरप्रसाद देवकोटाले बताए।
'ताल वरपर, उद्यान परिसरमा आन्तरिक पर्यटहरु भरिन थाले, टाढा-टाढाबाट पनि डुङ्गा चढ्नकै निम्ति पर्यटकहरु यहाँ आउँदा डुङ्गा चढ्न नपाएर निराश भएर फर्कनुहुन्थ्यो। अहिले कोरोनाको कहर कम हुँदै गएको छ, चाडपर्व पनि सुरु हुन थालेपछि स्वास्थ्य मापदण्ड पालना गरी डुङ्गा चालु गरियो,' उनले भने।
समितिका सदस्य जनक भण्डारीका अनुसार डुङ्गा सयर गर्न प्रतिव्यक्ति ५० रुपैयाँ शुल्क कायम गरिएको छ। हाल यहाँ तीन डुङ्गा प्रयोगका निम्ति व्यवस्थापन गरिएको छ। टिकटक बनाउन र फोटो, भिडियो खिच्नका निम्ति अहिले धेरै आउने गरेको जनाइएको छ। उन भने, 'बन्द भएको लामो समयपश्चात् डुङ्गा सुरु गरिएको हुँदा हाल तालमा दैनिक ५०/६० जनाले डुङ्गा सयर गर्नुहुन्छ। कतिपय पर्यटकहरु भने बाहिरबाटै अवलोकन गरेर फर्कनुहुन्छ। डुङ्गाका कारण पर्यटक आउने जानेक्रम बढ्दै गएको छ।'
पोखराको फेवातालको अनुभूति दिलाउने गरी पर्यटकीय पूर्वाधारका कार्यहरु भएपछि अहिले रामपुरको पर्यटन विकासमा यसले इँट्टा थपिदिएको छ। यसअघि डुङ्गा सञ्चालन हुँदाको समय ताल अवलोकनका निम्ति यहाँ देशका पूर्वदेखि पश्चिमका आन्तरिक पर्यटक भित्रिएको समितिले जनाएको छ। पर्यटकको उपस्थिति बढ्दै गएपछि २०७४ माघ २४ गतेदेखि तालपोखरामा डुङ्गा सञ्चालनमा ल्याइएको थियो। नियमित दुईवटा डुङ्गा सञ्चालन हुँदै आएकोमा कोरोनाको कहर सुरु भएपछि स्वास्थ्य सुरक्षालाई मध्यनजर गर्दै डुङ्गा सञ्चालन बन्द गरिएको थियो।
तालपोखरामा थप पूर्वाधार विकास गरी बाह्य पर्यटकलाई समेत यहाँ अवलोकनका लागि भित्र्याउने योजना बनाएको समितिका सचिव सुनिल देवकोटाले जानकारी दिए। तालपोखरा उद्याननजिकै बाल उद्यान निर्माण, पश्चिमपट्टीको भागमा कफी हाउस र मिनि उद्यान स्थापना गर्ने, पूर्वपट्टीको भागमा रहेको पिपलको चौतारीलाई पर्यटकीय आकर्षणको रुपमा विकास गर्ने, सोही ठाउँनजिकै बाल उद्यान निर्माण गरी नमूना पर्यटकीय गन्तव्यस्थल बनाइने समितिका पूर्वअध्यक्ष देवराज देवकोटाले जानकारी दिए।
एक सय पर्यटकीय गन्तव्यस्थलका रुपमा सूचीकृत पर्यटकीय तालपोखरामा विभिन्न स्तरोन्नतिका कार्यहरु सम्पन्न गरिएपछि यसको सुन्दरताले पर्यटकलाई लोभ्याएको छ। गत आर्थिक वर्षमा पर्यटन विभागबाट तालपोखराको स्तरोन्नतिका लागि विनियोजित ५० लाख रुपैयाँमध्ये ४७ लाख २३ हजार रुपैयाँ रकम प्राप्त भएको थियो। उक्त रकमबाट तालको पानीलाई दिगो व्यवस्थापन गर्न करिब चार महिना पानी सुकाएर तालपोखरा परिसरमा ८० मिटर लम्बाइ र ३.७० मिटर उचाइ ढुंगाको पर्खाल तथा ३०० मिटर लम्बाइ, तीन मिटर उचाइ रडको जालीसहित भित्ता ढलानको काम भएको छ।
पाल्पा सदरमुकाम तानसेनदेखि करिब ६५ किलोमिटर पूर्व रामपुरमा अवस्थित तालपोखरा करिब ४५ रोपनी क्षेत्रफलमा पानीसहितको ताल रहेको छ। तालको बीच भागमा जलेश्वर महादेवको मन्दिर छ। तालको वरिपरी घेराबार, प्रवेशद्वार, पर्यटकका निम्ति तस्बिर खिचाउन तालको आडैमा सेल्फी जोनको व्यवस्था छ। तालपोखराको नाममा पोखरीसहित पार्कसमेत रहेको छ। पार्कमा विभिन्न कार्यक्रम, वनभोजसमेत हुने गरेको छ। ताल र पार्कसहित करिब ७५ रोपनी क्षेत्रफल तालपोखरा समितिको नाममा रहेको छ। सामान्य वर्षायामको पानी जम्मा हुने पोखरीलाई विकास गरी तालका रुपमा परिणत गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764501638.png)
-1764498344.png)
-1764146706.png)
-1763721444.png)
-1763559424.jpg)
-1764080971.png)
