गण्डकीका स्थानीय जनप्रतिनिधि : यस्तो छ माधव नेपालको पार्टीको अवस्था

राजनीति

लिलु डुम्रे सोमबार, भदौ १४, २०७८ १८:१८

काठमाडौं– नेकपा एमालेबाट विभाजित भएर गठन भएको माधवकुमार नेपाल नेतृत्वको नेकपा (एकीकृत समाजवादी) को शक्तिको लेखाजोखा जारी छ। देशभरका एमाले नेता र कार्यकर्ता एकीकृत समाजवादीमा कति खुल्छन् या खुल्दैनन् भन्नेमै यो पार्टीको शक्ति कति होला भन्ने निर्भर हुनेछ। कुनै प्रदेशमा एकीकृत समाजवादीको पक्षमा खुल्ने नेता र कार्यकर्ताको पंक्ति ठूलै देखिएको छ भने कुनै प्रदेशमा भने त्यो संख्या निकै पातलो छ। त्यस्तैमध्ये हो गण्डकी प्रदेश जहाँ स्थानीय तहका जनप्रतिनिधिमा नेपाल नेतृत्वको पार्टीको पकड निकै कमजोर देखिएको छ।

नेपाल एमालेमा रहँदा पार्टी अध्यक्ष केपी शर्मा ओली गण्डकीमा सर्वाधिक बलियो देखिएका थिए। प्रदेश सभामा बलियो देखिएका ओली स्थानीय तहमा थप शक्तिशाली देखिएका छन्। प्रदेश सभामा नेपाल पक्षका एक सांसद थिए। तर, पार्टी विभाजन हुँदा तिनै प्रदेश सांसदले पनि नेपाललाई साथ दिएनन्।

प्रदेश सभा सदस्य रहेका बागलुङका इन्द्रलाल सापकोटा लामो समय नेपाल निकट थिए। नेपालले एमाले विभाजन गरी एकीकृत समाजवादी गठन गर्दा उनी भने 'पार्टी एकता'को पक्षमा रहेको भन्दै ओलीतिर लागे।

गाउँपालिका अध्यक्ष/उपाध्यक्ष र नगरपालिकाको प्रमुख/उपप्रमुखमा गण्डकीभरिमा एक जना मात्रै माधव पक्षमा देखिएका छन्। स्याङ्जाको आधिँखोला गाउँपालिकाकी उपाध्यक्ष शर्मिला देवी पौडेल क्षेत्रीबाहेक प्रमुख पदमा निर्वाचित सबै जना एमालेमा रहेका छन्।

गण्डकीका ११ जिल्लामध्ये गोरखाका स्थानीय तहमा एमाले अध्यक्ष/उपाध्यक्ष र प्रमुख/उपप्रमुख कुनै पनि पदमा विजयी भएको थिएन। लमजुङ, तनहुँ, कास्की, मनाङ, मुस्ताङ, पर्वत, स्याङ्जा, म्याग्दी, बाग्लुङ र पूर्वी नवलपरासीमा स्थानीय तहमा विजयी भएका अधिकांश जनप्रतिनिधि एमालेमै रहेका छन्।

गत निर्वाचनमा एमालेबाट गण्डकीमा १२ जना मेयरमा विजयी भएका थिए। एमालेबाट विजयी हुने उपमेयर पनि १२ जना छन्। २२ वटा गाउँपालिकाको अध्यक्षमा जीत हासिल गरेको एमालेले २४ गाउँपालिकामा उपाध्यक्ष जितेको थियो।

अध्यक्ष/उपाध्यक्ष र प्रमुख/उपप्रमुख गरी गण्डकी प्रदेशमा एमालेबाट ७० जना निर्वाचित भएका थिए। तीमध्ये एकीकृत समाजवादीमा खुलेकी स्याङ्जाको आँधिखोला गाउँपालिकाकी उपाध्यक्ष शर्मिला देवी पौडेल क्षेत्रीमात्र हुन् जो समाजवादीको केन्द्रीय सदस्य बनेकी छन्।

मनाङ
मनाङमा गत स्थानीय निर्वाचनमा एमालेबाट गाउँपालिका अध्यक्षमा २ र उपाध्यक्षमा १ जना निर्वाचित भएका थिए। मनाङमा चुनाव जितेका अध्यक्ष र उपाध्यक्ष सबै एमालेमा छन्। चामे गाउँपालिका अध्यक्ष लोकेन्द्र बहादुर घले, मनाङ डिस्याङ गाउँपालिका अध्यक्ष कान्छा घले र सोही गाउँपालिकाकी उपाध्यक्ष मैङखु गुरुङ लामा मूल पार्टी एमालेमै छन्। मनाङबाट स्थानीय तहको प्रमुख पदमा विजयी हुनेहरु एकीकृत समाजवादीमा प्रवेश नगर्ने भएका छन्।

लमजुङ
आठ स्थानीय तह रहेको लमजुङमा एकीकृत समाजवादीमा प्रवेश गर्ने जनप्रतिनिधि शुन्य बराबर छ। लमजुङमा गाउँपालिका अध्यक्ष २, उपाध्यक्ष ३ तथा नगरपालिका प्रमुख ३ र उपप्रमुख २ जना एमालेबाट विजयी भएका थिए। तीमध्ये अहिलेसम्म शतप्रतिशत एमालेमै छन्। क्व्होलासोथर गाउँपालिका अध्यक्ष प्रेमबहादुर घले, उपाध्यक्ष कुमारी मुनी गुरुङ, दोर्दी गाउँपालिका उपाध्यक्ष दिल बहादुर घले एमालेमा रहेका छन्।

वेशीशहर नगरपालिकाका प्रमुख गुमानसिंह अर्याल, उपप्रमुख लक्ष्मी देवी अधिकारी, मध्यनेपाल नगरपालिका उप्रमुख राजकुमार श्रेष्ठ एमालेमा छन्। त्यस्तै, मर्स्याङ्दी गाउँपालिका अध्यक्ष अर्जुन गुरुङ, राइनास नगरपालिका प्रमुख सिंहबहादुर थापा र सुन्दरबजार नगरपालिका प्रमुख जनकराज मिश्र एमालेमा रहेका छन्।

कास्की
पाँच स्थानीय तह रहेको कास्कीमा एमालेको तर्फबाट प्रमुख–उपप्रमुख १/१ जना विजयी भएका थिए। गाउँपालिका अध्यक्ष ३ र उपाध्यक्षमा ४ जनाले जीत निकालेका थिए।

पोखरा लेखनाथ महानगरपालिका प्रमुख मानबहादुर जिसी र उपप्रमुख मञ्जुदेवी गुरुङ एमालेमा छन्। माछापुच्छ्रे गाउँपालिका अध्यक्ष कर्णबहादुर गुरुङ, उपाध्यक्ष कृष्णकुमारी पौडेल दवाडी, मादी गाउँपालिका अध्यक्ष बेदबहादुर गुरुङ, उपाध्यक्ष विष्णुमाया आचार्य (पौडेल) एमालेमै रहेका छन्। रुपा गाउँपालिका अध्यक्ष नवराज ओझा, उपाध्यक्ष लालसुवा गुरुङ र अन्नपूर्ण गाउँपालिका उपाध्यक्ष सगुन गुरुङ एमालेमा छन्।

तनहुँ
तनहुँमा प्रमुख १, उपप्रमुख २, अध्यक्ष २ र उपाध्यक्ष १ जनाले स्थानीय तहमा एमालेबाट जीत निकालेका थिए। तीमध्ये सबै एमालेमा छन्।
घिरिङ गाउँपालिका अध्यक्ष रनबहादुर राना, उपाध्यक्ष सरस्वती घिमिरे (सिग्देल), देवघाट गाउँपालिका अध्यक्ष दुर्गाबहादुर थापा एमालेमै बस्ने भएका छन्। भीमाद नगरपालिकाका प्रमुख मेखबहादुर थापा, उपप्रमुख शारदा खनाल, शुक्ला गण्डकी नगरपालिका उपप्रमुख सविता रसाइली एमालेमा रहने भएका छन्।

स्याङ्जा
११ स्थानीय तह रहेको स्याङ्जामा एमालको तर्फबाट स्थानीय तहमा प्रमुख र उपप्रमुख २/२ जना, गाउँपालिका अध्यक्ष ५ र उपाध्यक्षमा ६ जना विजयी भएका थिए। आधिँखोला गाउँपालिकामा उपाध्यक्ष विजयी शर्मिला देवी पौडेल क्षेत्रीबाहेक सबै एमालेमा रहेका छन्।

पुतलीबजार नगरपालिका प्रमुख सीमाकुमारी क्षेत्री, उपप्रमुख महेश पुरी, फेदीखोला गाउँपालिका अध्यक्ष घनश्याम सुवेदी, उपाध्यक्ष देवी थापा एमालेमा छन्। त्यस्तै, अर्जुनचौपारी गाउँपालिका उपाध्यक्ष चिनमाया गुरुङ, आधिँखोला गाउँपालिका अध्यक्ष सुधिरकुमार पौडेल, कालीगण्डकी गाउँपालिका अध्यक्ष खिमबहादुर थापा, उपाध्यक्ष सावित्रा कोइराला एमालेमा छन्।

पहिलो संसद विघटनपश्चात् माधव नेपाल पक्षमा देखिएका गल्याङ नगरपालिका प्रमुख भुपराज अधिकारी पनि एमालेमै छन्। गल्याङ नगरपालिकाकी उपप्रमुख देवीसरा थापा पनि एमालेमै छन्। विरुवा गाउँपालिका अध्यक्ष चुनप्रसाद शर्मा, उपाध्यक्ष देवी कुमारी थापा, हरिनास गाउँपालिकाका अध्यक्ष खिम नारायण मानन्धर र उपाध्यक्ष झनमाया पराजुलीले पनि एमाले नछाड्ने भएका छन्।

नवलपरासी (पूर्व)
नवलपरासी (पूर्व)मा एमालेबाट नगरपालिका प्रमुख २, उपप्रमुख २ र गाउँपालिका उपाध्यक्ष १ जना विजयी भएका थिए। ती सबै एमालेमै छन्। कावासोती नगरपालिका प्रमुख चन्द्रकुमारी पुन, उपप्रमुख प्रेमशंकर मर्दनिया थारु, गैँडाकोट नगरपालिका प्रमुख छत्रराज पौडेल, देवचुली नगरपालिका उपप्रमुख पार्वता तिवारी र हुप्सेकोट गाउँपालिका उपाध्यक्ष स्वतन्त्र कोपिला मल्ल एमालेमै रहने भएका छन्।

मुस्ताङ
मुस्ताङमा एमालेले गत निर्वाचनमा अध्यक्ष १ स्थानमा र उपाध्यक्ष ३ स्थानमा जितेको थियो। विजयी सबै एमालेमै बसेका छन्। घरपझोङ गाउँपालिका अध्यक्ष र उपाध्यक्ष क्रमशः आशबहादुर थकाली र सर्मिला गुरुङ, दालोमे गाउँपालिका उपाध्यक्ष ढोका गुरुङ, बाह्रगाउँ मुक्तिक्षेत्र गाउँपालिका उपाध्यक्ष ढिकी गुरुङ एमालेमा छन्।

म्याग्दी
म्याग्दीमा अध्यक्षमा २ र उपाध्यक्षमा ३ जनाले एमालेबाट स्थानीय तहको निर्वाचनमा जीत निकालेका थिए। स्थानीय तहको उपल्लो पदमा निर्वाचित हुने सबैले एमाले नछाड्ने भएका छन्। धवलागिरी गाउँपालिका अध्यक्ष थमसरा पुन, उपाध्यक्ष रेशम छन्त्याल, मंगला गाउँपालिका अध्यक्ष सतप्रसाद रोका, उपाध्यक्ष सृजना केसी एमालेमा बस्ने भएका छन्। मालिका गाउँपालिका उपाध्यक्ष खरमाया विटालु पनि एमालेमै रहने भएकी छन्।

बागलुङ
बागलुङमा एमालेको तर्फबाट गत स्थानीय निर्वाचनमा नगरपालिका प्रमुख, उपप्रमुख र गाउँपालिका अध्यक्षमा २/२ जना विजयी भएका थिए। स्थानीय तहको शीर्ष तहमा विजयी सबै एमालेमा बस्ने भएका छन्।

बागलुङ नगरपालिका प्रमुख जनकराज पौडेल, काठेखोला गाउँपालिका अध्यक्ष अमरबहादुर थापा, जैमुनी नगरपालिका उपप्रमुख लिला राना एमालेमा रहेका छन्। ढोरपाटन नगरपालिका प्रमुख देवकुमार नेपाली, उपप्रमुख करमती पुन मगर र बडिगाउँ गाउँपालिका अध्यक्ष मेहरसिंह पाइजा एमालेमा बस्ने निश्चित गरेका छन्।

पर्वत
पर्वतमा एमालेको तर्फबाट स्थानीय तहको निर्वाचनमा नगरपालिका प्रमुख/उपप्रमुख १/१ र गाउँपालिका अध्यक्ष/उपाध्यक्षमा ३/३ जना विजयी भएका थिए। विजयी सबैले पुरानै पार्टीमा रहने निर्णय गरिसकेका छन्।

फलेवास नगरपालिका प्रमुख पदमपाणी शर्मा, उपप्रमुख मञ्जु अधिकारी प्यासी, महाशीला गाउँपालिका अध्यक्ष राजुप्रसाद पौडेल र उपाध्यक्ष हिराकुमारी राना एमालेमै रहेर राजनीति गर्ने भएका छन्। साथै, मोदी गाउँपालिका अध्यक्ष प्रेम शर्मा पौडेल, उपाध्यक्ष सेती महत, विहादी गाउँपालिका अध्यक्ष कमलप्रसाद भुसाल र उपाध्यक्ष कुमारी डम्बर गुरुङले एमालेमै बस्ने निश्चित गरिसकेका छन्।

एमालेबाट निर्वाचित स्थानीय तहका जनप्रतिनिधिलाई नयाँ पार्टीमा लाग्नका लागि भदौ २२ गतेसम्मको समय छ। तर, गण्डकीमा त्यस्तो संख्या अहिलेसम्म देखिएको छैन।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।