पर्यटन-उड्डयन

सुकेटार विमानस्थलमा दुई महिनापछि जहाज अवतरण

रासस शनिबार, असार २६, २०७८ १५:३०

फुङ्लिङ- कोभिड-१९ का कारणले लामो समयसम्म बन्द रहेको ताप्लेजुङको सुकेटार विमानस्थलमा आज नेपाल वायुसेवा निगमको जहाज अवतरण भएको छ।

कोभिडको कारणले दुई महिनादेखि नियमित उडान बन्द भएकामा आज पहिलोपटक जहाज अवतरण भएको हो।

नेपाल वायु सेवा निगमको जहाजले काठमाडौंबाट सात जना यात्रु लिएर आज बिहान सुकेटार आइपुगेको थियो। ताप्लेजुङबाट १६ जना यात्रु लिएर जहाज काठमाडौँ फर्केको सुकेटार विमानस्थलका स्टेसन इन्चार्ज लोकेन्द्र लिम्बूले बताए।

निगमले गत सोमबारदेखि नै नियमित उडान सुरु गरेको थियो। गत सोमबार काठमाडौंबाट नौ जना यात्रु लिएर आएको विमान मौसम खराबीका कारण अवतरण हुन नसकेपछि जहाज पुनः काठमाडौं फर्केको थियो। सोमबार अवतरण हुन नसकेको जहाज आज अवतरण भएको सुकेटार विमानस्थलका स्टेसन इन्चार्ज लिम्बूले बताए।

सुकेटारमा हप्तामा चार दिन (सोमबार, बुधबार, शुक्रबार र शनिबार) नियमित उडान हुने सुकेटर विमानस्थल कार्यालयले जनाएको छ। तत्कालका लागि काठमाडौंदेखि ताप्लेजुङसम्म सात हजार ५० रुपैयाँ विमान भाडा शुल्क र ताप्लेजुङदेखि काठमाडौं सात हजार १९० रुपैयाँ भाडा शुल्क तोकिएको कार्यालयले जनाएको छ। निगमले ताप्लेजुङदेखि प्रदेश १ को राजधानी विराटनगरमा पनि नियमित उडानको लागि प्रक्रिया आगाडि बढिरहेको लिम्बूले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।