काठमाडौं– प्रविधिको युग छ। क्यासेटको रिल छाडेर सिडी, डिभिडी, मेमोरी कार्ड हुँदै बिभिन्न एप्लिकेशनमार्फत गीत–सँगीत सुन्ने अवस्था बनिसकेको छ। अहिलेको समयमा गीतका लागि म्यूजिक भिडियो, ज्युँदो मानिसका लागि श्वासजस्तै बनिसकेको छ।
क्यासेट र सिडिको जमानामा गीतकार, संगीतकार, संगीत संयोजक, बाद्यबादकहरु पर्दा पछाडिका थिए। गीत गायकको मात्रै बन्थ्यो। परिवर्तित समयसँगै अब गीत गायकको हातबाट पनि फुस्किसकेको छ। नवगायक अर्जुन रावल गीत अब गायकको हातबाट म्यूजिक भिडियो अभिनय गर्ने कलाकारको हातमा पुगेको बताउँछन्.।
‘गीतको तौल त भिडियोले घटाएको छ नै, उल्टै श्रोताले गायक–गायिका पनि ठम्याउन छाडिसके,’ रावलले गीत–संगीतबारेको आफ्ना बालापनको स्मरण सुनाउँदै भने, ‘हामी सानो छँदा रेडियोमा सुनेको गीत र आवाजले त्यो मानिस को हो छुट्याउन सक्थ्यौं, तर अहिले गीत हिट भएपनि गायकको नाम सुनिदैन।’
गाडीमा हिँड्दा र रेडियो सुन्दा गीत जति मज्जा लाग्छ, भिडियोसहित हेर्दा अर्जुनलाई त्यति रमाइलो लाग्दैन। ‘गीत भनेको त हरेक श्रोताले आफ्नै ढंगले आफूलाई हिरो–हिरोइन बनाएर कल्पना गर्ने कुरा हो, एउटा निर्देशकको कल्पनामा सबै रमाउन कहाँ सक्छन् र ’, अर्जुन भन्छन्।
कहिलेकाहिँ गीत र फिल्म छुट्याउन नसक्ने अवस्थामा पुगेको पनि उनी बताउँछन्। भन्छन्, ‘गीतमा पनि संवाद रे, कथा रे के–के हो के–के,’ अहिलेको चलनप्रति ब्यंग्य गर्दै अर्जुन भन्छन्, ‘एउटा गीतको म्यूजिक भिडियो बनाउन लाखौं खर्च हुन्छ, त्यसको सट्टा बरु १० वटा गतिलो नयाँ गीत रेकर्ड गर्न सकिन्छ।’
भिडियोमा २० लाखसम्म खर्च गर्ने संगीत क्षेत्रले गीतकार, संगीतकार र बाद्यबादकलाई भने निःशुल्क काम लगाउन खोज्ने तितो सत्य पनि उनले सुनाए।
नवगायक अर्जुनले केही समयअघि मात्रै ‘यो माया बस्यो सासैमा’ बोलको गीत सार्वजनिक गरेका छन्। आफूलाई नजिकबाट चिनेका मानिसहरुलाई अचम्ममा पर्दै उनले सार्वजनिक गरेको गीतमा उनी आफैंले अभिनय पनि गरेका छन्।
पहिलो गीतको अनुभव साँट्दै अर्जुनले भने, ‘म गीत गाउनकै लागि विदेशदेखि नेपाल आएँ। हुन त विदेशमै बसेर पनि गीत गाउन सकिन्थ्यो, तर आफ्नो देश भनेको आफ्नै हो।’
उनी जापानमा ६ वर्ष बसे। जीवनको सबैभन्दा ऊर्जावान समय अर्काको देशमा खर्च गर्नुपर्दा उनी दुःखी छन्। त्यसैले बारम्बार जीवनको महत्वपूर्ण समय गुमाएको पछुतो गरिरहन्छन्।
अब भने उनी नेपालमै केही गर्ने उद्देश्यले अर्काको देश नजाने गरी फर्किएका छन्। ‘यहाँ पैसा कमाउने मेसो अरु नै ब्यवसाय रोजे पनि मुख्य ध्येय गीत गाउने नै हो। उनले बिगत सम्झँदै भने,’ ‘यदि १२ वर्ष अघि यो क्षेत्रमा डेब्यू भएको भए उद्देश्य पैसा कमाउने हुन्थ्यो होला, अब भने संगीतको क्षेत्रमा गतिलो गीत दिने मात्रै छ।’
अर्जुनका लागि गीत अब सोख बनेको छ। त्यसैले उनी यो क्षेत्रबाट न पैसा कमाउन चाहन्छन्, न बजारमा चलेजस्तो भाइरल गीत गाएर नाम नै। उनलाई संगीतको दुनियाँमा राम्रो काम गर्नु छ। जोड दिँदै उनले भने, ‘काम बरु थोरै होस्, तर राम्रो होस्।’
पश्चिम नेपालको बर्दियाको भुरीगाउँमा जन्मिएका अर्जुन आफू गीत गाउनकै लागि काठमाडौं आएको बताउँछन्। १२ कक्षा पास गरेलगत्तै गायक बन्ने सपना बोकेर राजधानी छिरेका उनले वर्षौंपछि मात्रै आफ्नो आवाज विश्वलाई सुनाउन सके।
उनलाई वुबा आमाले सपोर्ट गरे। केही कुराको अभाव हुन दिएनन्, तर पनि गीत निकाल्न सकेनन्। त्यो क्षण सम्झँदै उनले भने, ‘४ वर्ष साधना कला केन्द्रमा संगीतको कक्षा लिए पनि एल्बम निकाल्न नसक्दा मेरो कलाको सम्मान भएन जस्तो लाग्थ्यो, रिस उठ्थ्यो,’ उनले हाँस्दै भने, ‘अव भने रिस मत्थर भएको छ।’ कारणबारे प्रष्ट्याउँदै उनले भने, ‘अरु सफल कलाकारको स्ट्रगल सुनेर मैले त केही गरेकै रहेनछु भन्ने थाहा भयो।’
उनले पहिलो गीतको भिडियोमा अभिनय पनि गरेका छन्। चर्चित नायिका नम्रता सापकोटासँगल स्क्रीन शेयर गर्नु उनको बाध्यता थियो। एक त आफूलाई गीतको गायक भनेर चिनाउनु थियो, अर्को गीतमा ‘केटा’को अभिनय गर्ने मानिसको अभाव। म्यूजिक भिडियो नबनाउँ भनेपनि यो बिना गीत श्रोतामाझ पु¥याउनै सकस।
भिडियोका निर्देशकको सल्लाह बमोजिम उनको अभिनयलाई सबैले मन पराए। नचिन्नेहरुले उनलाई फोन गरेर सोधे रे, ‘मोडलिङ त राम्रो गर्नुहुँदो रहेछ, स्वर चाहिँ कसको हो नि ?’ यस्तो प्रश्नले आफू दंग पर्ने गरेको उनी सुनाउँछन्। ‘हुन त मेरो शरिरमा अभिनयको किरा सानैदेखि थियो,’ अर्जुन आफ्ना अभिनयप्रति सन्तुष्टि जनाउँदै भन्छन्।
गीत सार्वजनिक हुनेवित्तिकै धेरैको सकारात्मक प्रतिक्रिया पाए। कतिपयले भने भिउज किनिदिने, स्पोन्सर गरिदिने भन्दै फोन गरेको समेत उनले सुनाए। आफू यस्तो कुराको विरोधी भएको अर्जुनको भनाइ छ, ‘राम्रो गीत भए त दर्शक श्रोताले खोजिहाल्छन् नि !’
यही सन्दर्भमा उनले भाइरल गायक गायिकाको प्रसंग पनि कोट्याए। भने, ‘हाम्रो राष्ट्रिय गीत नै छ नि, गाउँछ गीत नेपाली। नेपाली हो, उसले गीत गाउँछ र गाउन पाउनुपर्छ। तर, कस्तो गीत सुन्ने भन्ने कुरा श्रोताले विचार गर्नुपर्छ। त्यो विचारका लागि सञ्चारमाध्यमले पुलको काम गर्नुपर्छ।’
मिडिया नै भाइरलको पछि लागेकाले श्रोता राम्रो गीतको पहुँचमा पुग्न नसकेको उनको ठम्याइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
