इनरुवा– सुनसरी सदरमुकामसमेत रहेको इनरुवा नगरपालिकाको पहिलो नगरसभाले आव २०७४/७५ का लागि करिब ५५ करोड रुपैयाँको बजेट सार्वजनिक गरेको छ।
नगरपालिकाको पहिलो नगरसभाले पारित गरेको ५४ करोड ६९ लाख ३१ हजारको वार्षिक बजेट नगरपालिकाका प्रमुख राजन मेहताले सार्वजनिक गरेका हुन्।
नगरपालिकाले सशर्त अनुदानको करिब १४ करोड ३९ लाख, निःशर्त अनुदानतर्फको २७ करोड ५ लाख, अन्य अनुदान ४५ लाख, जिल्ला समन्वय समितिबाट प्राप्त राजश्व बाँडफाँटबाट प्राप्त हुने ३० लाख, वैदेशिक सहायता ३० लाख, लागत सहभागिताको ७५ लाख, आन्तरिक राजश्वको ३ करोड ९५ लाख ३० हजार र अघिल्लो आर्थिक वर्षको ५० लाख गरी ५४ करोड ६९ लाख ३१ हजारको बजेट पारित गरी सार्वजनिक गरिएको हो।
पुँजीगत खर्चतर्फ नगरस्तरीय योजनाका रुपमा महानन्द पञ्चवटी पार्कका लागि ४० हजार, डोजर– रोलर– स्काभेटर– ट्रक र ट्र्याक्टरसहितका हेबी इक्विपमेन्ट खरिदका लागि एक करोड ५० लाख, खेलकुद विकास र व्यवस्थापनका लागि ५० लाख, युवा रोजगार तथा साना किसानका लागि १५–१५ लाख विनियोजन गरिएको छ।
यस्तै धार्मिकस्थलको संरक्षणका लागि ४० लाख, चाडपर्व संरक्षण र चरा संग्रहालय निर्माणका लागि २०–२० लाख, सोमबारे हाट वरिपरि पक्की सडक निर्माण र जल्पापुरमा कृषि बजार निर्माणका लागि २९–२९ लाख रुपैयाँ छुट्याइएको छ। मधेसामा कभर्ड हल निर्माण र विपद् व्यवस्थापन तथा भाषा, साहित्य, कला संस्कृतिको जगेर्नाका लागि ३०–३० लाख, पोष्ट ओडिएफका लागि १५ हजार, म्याचिङ फण्डका लागि दुई करोड, एकल महिला सशक्तीकरणका लागि पाँच लाख, महिला सशक्तीकरणका लागि १० लाख, इनरुवा प्रज्ञा–प्रतिष्ठानका लागि १० लाखको अक्षयकोष निर्माण, पत्रकार अक्षयकोष र विकासका लागि चार लाख, पुस्तकालय निर्माणका लागि २५ लाख र प्रत्येक वडामा एक करोड १० लाखका दरले बजेट विनियोजन गरिएको छ।
बजेट सार्वजनिकीकरण कार्यक्रममा नगरप्रमुख मेहताले राजनीतिक पार्टीभन्दा माथि उठेर विकास निर्माणका काममा अगाडि बढ्न सबैलाई आग्रह गरेका थिए। रासस
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।